قازاقستاننىڭ ءار ايماعىنان جينالعان 800-گە جۋىق مۇعالىمگە ءبىلىمىن جەتىلدىرىپ, بىلىكتىلىگىن ارتتىرۋعا مۇمكىندىك بەرگەن بۇل جوبا «بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعى مەن قالا اكىمدىگىنىڭ ۇيىمداستىرۋىمەن ىسكە اسىپ وتىر. ءۇش كۇنگە سوزىلعان سەمينار «بوبەكتىڭ» 20 جىلدىق مەرەيتويى اياسىندا اتقارىلاتىن شارالاردىڭ ءبىرى ەكەنىن ايتا كەتكەن ءجون.
رۋحاني-ادامگەرشىلىك ءبىلىم بەرۋ يدەياسىن تاراتۋ مەن پەداگوگتاردىڭ كاسىبي-تۇلعالىق دامۋىنا كومەك كورسەتۋدى ماقسات ەتكەن ءۇش كۇندىك سەمينار «تاربيەسىز بەرىلگەن ءبىلىم – ادامزاتتىڭ قاس جاۋى» دەگەن ءال-ءفارابيدىڭ ءسوزىن ەسكە تۇسىرەدى. ءۇش كۇن بويى جالپىادامزاتتىق قۇندىلىقتارعا نەگىزدەلگەن ءبىلىم بەرۋ مەكتەبىنىڭ نەگىزىن قالاۋشى, تايلاندتىق پەداگوگ عالىم, دوكتور ارت ونگ دجۋمساي ءدارىس وقىدى. عالىمنىڭ كوپشىلىك نازارىنا ۇسىنعان جالپىادامزاتتىق قۇندىلىقتاردى ءبىرتۇتاس ءبىلىم بەرۋ ۇدەرىسىنە ينتەگراتسيالاۋ ءتاجىريبەسى بۇگىنگى تاڭدا الەم بويىنشا قىزىعۋشىلىق تۋدىرىپ وتىر. كورشىلەس ەلدەردىڭ عالىمدارى مەن پەداگوگتارى «ءوزىن-ءوزى تانۋ» ءپانى بويىنشا وقۋ-ءادىستەمەلىك كەشەندى ازىرلەۋشىلەر «ءورلەۋ» باۇو اق-نىڭ رۋحاني-ادامگەرشىلىك ءبىلىم بەرۋ بويىنشا ترەنەرلەرى, «بوبەك» ورتالىعىنىڭ بىلىكتىلىكتى ارتتىرۋ كۋرستارىنىڭ تىڭداۋشىلارى قازاقستاننىڭ ءتۇرلى وڭىرلەرىندەگى مەكتەپكە دەيىنگى مەكەمەلەردىڭ, مەكتەپتەردىڭ, كوللەدجدەر مەن جوعارى وقۋ ورىندارىنىڭ مۇعالىمدەرى مەن باسشىلارى, «ءبوبەك» ورتالىعىنىڭ قىزمەتكەرلەرى اتالعان ماسەلە بويىنشا ءدارىس تىڭداپ, ءبىلىمىن ارتتىرۋعا ءمۇمكىندىك الدى.
قالا اكىمىنىڭ ورىنباسارى ارمان قىرىقباەۆ سارا نازارباەۆانىڭ وتاندىق ءبىلىم بەرۋ ءجۇيەسىنە «ءوزىن-ءوزى تانۋ» باعدارلاماسىن ەنگىزۋ بويىنشا قوسقان زور ۇلەسىن اتاپ ءوتتى. سونىمەن قاتار, قولعا تۇسە بەرمەيتىن دوكتور ءدجۋمسايدىڭ شەبەرحاناسىمەن تانىسۋ ءمۇمكىندىگى ەكىنىڭ بىرىنە بۇيىرا بەرمەيتىنى دە ايتىلدى.
شاراعا جەتكىنشەكتەر مەن جاسوسپىرىمدەرگە ارنالعان كوپتەگەن بىلىمدىك جانە شىعارماشىلىق جوبالاردى ىسكە اسىرىپ وتىرعان «جاندانۋ الەمى» قورىنىڭ نەگىزىن قالاۋشى ءاليا نازارباەۆا, اتقارۋشى ديرەكتورى قايرات يساحانوۆ باستاعان قۇرمەتتى قوناقتارمەن قاتار, رەسەي, ازەربايجان جانە قىرعىزستان ەلدەرىنىڭ وكىلدەرى دە قاتىستى.
سەميناردىڭ اشىلۋى مەن جابىلۋ سالتاناتىندا «ءوزىن ءوزى تانۋ» گيمنازياسىنىڭ وقۋشىلارى مەن كوللەدج ستۋدەنتتەرى, «بوبەكتىك» ءبۇلدىرشىندەر ۇسىنعان كونتسەرتتىك باعدارلاما دا بەيبىتشىلىك پەن ادامعا دەگەن ماحاببات ارقىلى ادامداردىڭ بىرىگۋى يدەياسىنا قۇرىلعان.
الماس ءنۇسىپ,
«ەگەمەن قازاقستان»
الماتى
