ازەربايجاننىڭ مەملەكەتتىك اقپارات اگەنتتىگى – AzerTac ءوز كەزەگىندە «نۇرسۇلتان نازارباەۆ لاتىن الىپبيىنە كوشۋ تۋرالى تاپسىرما بەردى» دەپ حابار تاراتتى. ەلدەگى ەڭ كوپ وقىلاتىن باسىلىمداردىڭ ءبىرى Şərq گازەتى ازەربايجاننىڭ بۇرىنعى ءبىلىم مينيسترى, تۇركىتانۋشى, پروفەسسور فەريدۋن دجەليلوۆتىڭ مىنا پىكىرىن كەلتىرەدى:
«ارينە, قازاقستاننىڭ بۇل باستاماسى وتە قۇپتارلىق قادام. ەندى باۋىرلاس ەلدەر اراسىندا ءارىپ كەدەرگىسى جويىلىپ, ءبىلىم بەرۋ سالاسى, ادەبيەت پەن عىلىمدا بايلانىس نىعايا تۇسەدى, مادەني قاتىناستارىمىز بەكيدى. قازاق ادەبيەتىمەن ءبىز بۇرىنعىدان دا جاقىن تانىساتىن بولامىز. بۇرىن ءبىز ورتالىق ازيا ادەبيەتىن كيريلل ارىپتەرىمەن وقۋعا ءماجبۇر ەدىك. ەندى بۇل كەدەرگىدەن قۇتىلاتىن بولدىق. تاريحي ورتاق ادەبي قۇندىلىقتارىمىز قايتا جاڭعىرا تۇسەدى. ءبىز دە ءالىپبيدى اۋىستىرعاندا كىتاپتار مەن مەرزىمدى باسىلىمدارىمىزدى جاڭارتتىق. قازاقستان دا وسى جولدان وتەدى. ارينە, قيىندىقتار بولادى. بىراق ۋاقىت وتە كەلە بارلىعى ورنىنا تۇسەدى. قازىر الەم لاتىن ارىپتەرىنە بەت بۇرۋدا».
سونىمەن قاتار, قازاقستانداعى «بۇل باستامانىڭ تۇپكى ماقساتىندا نە جاتىر؟», «جەرگىلىكتى حالىق بۇعان قالاي قارايدى؟» دەگەن ساۋالعا جاۋاپ ىزدەگەن باسىلىم ازەربايجان پارلامەنتى تومەنگى پالاتاسىنىڭ دەپۋتاتى, بۇقارالىق اقپارات قۇرالدارى سالاسىنداعى بەلگىلى ساراپشى ايدىن ميرزەزادەنىڭ مىنا سوزىمەن بولىسەدى:
«قازاقستان ازەربايجانمەن دوس مەملەكەت جانە ارامىزدا كەڭ بايلانىس بار. ءبىر-ءبىرىمىزدىڭ جەتىستىكتەرىمىزگە قۋانۋمەن قاتار, سىن ساعاتتا قولۇشىن بەرۋگە ءاردايىم ءازىرمىز. تۇركىتىلدەس ەلدەردىڭ باسىم كوپشىلىگى لاتىن ءالىپبيىن قولدانادى. قازاقستان وسى باعىتتا ۇزاق ۋاقىتتان بەرى جۇمىس ىستەپ كەلەدى. ەندى قازاقستان مەملەكەت باسشىسى 8 جىل ىشىندە لاتىن ءالىپبيىنە كوشۋ تۋرالى ناقتى تاپسىرما بە ءردى.
قازاقستان قازىرگى تاڭدا تۇراقتى دا تاتۋ ەل رەتىندە قالىپتاسىپ بولدى. لاتىن الىپبيىنە كوشۋدەگى باستى ماقسات – الەمدىك قوعامداستىققا ءبىر تابان جاقىنداي ءتۇسۋ, تۇركى حالىقتارىنىڭ بىرلىگىن نىعايتا ءتۇسۋ».
جەرگىلىكتى APA اگەنتتىگى مەن APA TV ارناسى نۇرسۇلتان نازارباەۆتىڭ «ەگەمەن قازاقستان» گازەتىندە جاريالانعان ماقالاسىن مازمۇنداي كەلە, ەلباسىنىڭ جوعارىداعى شەشىمىن «تاريحي قادام» دەپ باعالادى. «نازارباەۆ تاريحي قادام جاسادى. قازاقستان لاتىن الىپبيىنە كوشەدى» دەگەن اتپەن شىققان باس ماقالادا قازاقستانداعى وسى وزگەرىس جان-جاقتى تالدانادى.
ال Moderator.az پورتالى «قازاقستاننىڭ لاتىن الىپبيىنە كوشۋى تۇركى حالىقتارىنا ورتاق جازۋ قالىپتاستىرۋعا تۇرتكى بولا الا ما؟» دەگەن ساۋالعا جاۋاپ ىزدەيدى.
«ەرتە مە, كەش پە, تۇركى ەلدەرى ورتاق الىپبيگە اۋىسادى» دەگەن تاقىرىپتا جاريالانعان ماقالادا «بۇل – ءبىزدىڭ كوپتەن كۇتكەن جاڭالىعىمىز. قازاقستان مۇنداي قادامعا بارۋى ارقىلى ۇلكەن باتىلدىق تانىتىپ وتىر. وسىدان 20-25 جىل بۇرىن مۇنداي باستاما كوتەرۋ مۇمكىن ەمەس ەدى. بۇگىندە ۋاقىت دەگەنىن ىستەدى. بارشا تۇركى ەلدەرىنە ورتاق ءالىپبي جاساۋدىڭ نەگىزى قالاندى. بۇل قادام ساياسي تۇرعىدا دا وتە ماڭىزدى», دەلىنگەن ماقالادا.
Sputnik Azerbaycan اگەنتتىگى مەملەكەت باسشىسىنىڭ «ەگەمەن قازاقستانداعى» ماقالاسىنان ءۇزىندى الا وتىرىپ, لاتىن الىپبيىنە كوشۋ تۋرالى باستاما قازاقستاندى الەمدىك وركەنيەتكە جاقىنداتا ءتۇسۋ جانە كەلەشەك ۇرپاقتىڭ اعىلشىن ءتىلىن ۇيرەنۋىنە بارىنشا قولايلى جاعداي جاساۋ جولى ەكەنىن ايتادى.
فيزۋلي مەدجيدلي,
ارنايى «ەگەمەن قازاقستان» ءۇشىن
