«چەحيا قۇراماسىمەن وتكەن شەشۋشى ويىن وتە اۋىر بولدى. ولاردىڭ الەم, ەۋروپا چەمپيوناتتارىندا تاجىريبەسى كوبىرەك. ءبىرىنشى ورىندى كوزدەپ كەلگەندەرى انىق», – دەدى قاقپاشى.
ىرىكتەۋ كەزەڭىندە قازاقستان قۇراماسى ءۇش ويىن وتكىزىپ, ءوز قاقپاسىنا گول وتكىزبەدى.
«بۇل جالعىز مەنىڭ ەڭبەگىم ەمەس, سونداي-اق, قارسىلاستارىمىزدىڭ وسالدىعى دەپ تە ايتا المايمىن. بۇل قورعانىسىمىزدىڭ مىقتىلىعىنان. الەسيونىڭ قاجەت ويىنشىلاردى ىرىكتەپ الىپ, ىڭعايلى تاكتيكانى قولدانعانىنىڭ ارقاسى. سونىمەن قاتار, قاقپاشىلارعا جاۋاپتى باپكەرىمىز گاروتتەنىڭ دە بۇل ناتيجەگە تيگىزگەن پايداسى زور.
ال جالپى ايتار بولساق, ءاربىر قاقپاشىنىڭ باستى مىندەتى – گول وتكىزىپ الماۋ. العاشىندا قاقپامىزعا دوپ وتكىزبەۋ كەرەك دەگەن ناقتى جوسپارىمىز بولعان ەمەس. مەن تەك سوققىلاردىڭ ءبارىن قايتارعىم كەلەدى. ارىپتەستەرىم دە «نولگە» ويناۋدى ءجون كورەدى», – دەدى يگيتا.
بيىل قاڭتار ايىندا ۇلتتىق قۇرامانىڭ باس باپكەرى كاكاۋ قىزمەتىنەن كەتىپ, ورنىنا جوزە الەسيو دا سيلۆا كەلدى. يگيتانىڭ ايتۋىنشا, ول كاكاۋدىڭ ءستيلىن دامىتىپ, ءوزىنىڭ دە يدەيالارىن قوسىپتى. سول سەبەپتى الەسيونىڭ قول استىندا قازاقستان قۇراماسى جاقسى ناتيجە كورسەتىپ ءجۇر.
«كاكاۋ ىلعي دا قاسىمىزدا. الەسيوعا ءجيى كومەكتەسىپ تۇرادى. ول ماتچ كەزىندە بىزبەن بىرگە قوسالقى قۇرامدا وتىرماسا دا, الەسيومەن ءجيى حابارلاسىپ تۇراتىنىن بىلەمىن. ارقايسىسىنىڭ وزىندىك يدەياسى بار. كاكاۋ دا ءبىزدىڭ جەتىستىكتەرىمىزگە ۇلكەن ۇلەس قوسقانىن ۇمىتپاعانىمىز ءجون», – دەدى لەوناردو دە مەلو ۆيەيرا لەيتە.
قاقپاشى سلوۆەنيادا وتەتىن ەۋروپا چەمپيوناتى, العا قويعان ماقساتتارى جايلى دا پىكىر ءبىلدىردى.
«ءاربىر جاڭا ويىنىمىزدا دەڭگەيىمىزدى ارتتىرۋىمىز كەرەك. قازىرگى قالپىمىزدا توقتاپ قالۋعا بولمايدى. سلوۆەنياعا ءبىز قازىرگىدەن دە كۇشتى بولىپ بارامىز دەپ ويلايمىن. ەۋروپا چەمپيوناتىندا قارسىلاستارىمىز وڭاي بولماسى انىق. ءبىز ول جاقتا فۋتزالىمىزدىڭ دەڭگەيى جوعارى ەكەنىن تاعى ءبىر مارتە كورسەتۋىمىز كەرەك.
قانداي ورىنعا يە بولاتىنىمىزدى قازىر ايتۋ قيىنداۋ. بىراق قولىمىزدان كەلگەننىڭ ءبارىن جاسايمىز. الدىمەن, پلەي-وففقا شىعۋدى ويلاۋىمىز كەرەك, كەيىننەن شيرەك فينالعا, ءارى قاراي جارتىلاي فينال, فينال ءۇشىن تالاساتىن بولامىز. مۇنداي جارىستا قاتەلىك جىبەرۋگە بولمايدى. ءاربىر ويىن فينالعا پارا-پار. سوندىقتان باستاپقى ماتچتان-اق جەڭىستى ويلاۋىمىز كەرەك», – دەدى قازاقستان ۇلتتىق قۇراماسىنىڭ قاقپاشىسى.
قۇرامانىڭ ناتيجەسى تۋرالى باس باپكەر جوزە الەسيو دا سيلۆا دا پىكىر ءبىلدىردى.
«مەن بىرنەشە گول سوعىپ, سونداي-اق وزىمە گول وتكىزىپ العاننان نەبارى 1:0 ەسەبىمەن جەڭگەندى ءجون كورەمىن. وسىعان دەيىن قورعاۋشى بولعاندىقتان ۇستانىمىم – گول جىبەرمەۋ. باستى ارتىقشىلىعىم مىنە, وسى. تۋرنير كەزىندە گول وتكىزىپ الماۋ ءۇشىن جىگىتتەردى جىگەرلەندىرىپ وتىردىم. كوماندا بۇل ويىمدى جۇزەگە اسىرا ءبىلدى. ەندى قارسىلاستارىمىز بىزدەن بۇرىنعىدان دا قاتتىراق جاسقاناتىن بولادى. قورعانىسىمىزدى بۇزىپ ءوتۋ جولدارىنا ەرەكشە ءمان بەرەدى دەپ ويلايمىن», – باس باپكەر.
ەستەرىڭىزگە سالا كەتەيىك, ىرىكتەۋ كەزەڭنىڭ ويىندارى الماتى قالاسىندا ءوتتى. قازاقستان قۇراماسى العاشقى ويىنىندا ماكەدونيامەن كەزدەسىپ, 3:0 ەسەبىمەن جەڭدى. گولداردىڭ اۆتورلارى: لەو 13, سەرىك جامانقۇلوۆ 19, البەرت اقبالىقوۆ 33.
سونىمەن قاتار, دانيا قۇراماسىن 5:0 ەتىپ ۇتتى. گولداردىڭ اۆتورلارى: سەرىك جامانقۇلوۆ 4, لەو 9, ميحايل پەرشين 17, دۋگلاس 17, دىنمۇحامبەت سۇلەيمەنوۆ 40.
ال شەشۋشى ويىندا چەحيامەن كۇش سىناسىپ, 3:0 ەسەبىمەن باسىم ءتۇستى. گولداردىڭ اۆتورلارى: دۋگلاس 5, ميحايل پەرشين 20, دۋگلاس 38.
ايتا كەتەرلىگى, قازاقستان قۇراماسىنان بولەك ىرىكتەۋ ويىندارىندا ەۋروپانىڭ ۆيتسە-چەمپيونى رەسەي قۇراماسى دا ءوز قاقپاسىن گولدان امان ساقتاپ قالدى.
ەۋرو-2018 چەمپيوناتى كەلەسى جىلى 30 قاڭتار مەن 10 اقپان ارالىعىندا ليۋبليانا (سلوۆەنيا) قالاسىندا وتەدى.
