2017 جىلدىڭ باسىندا جاسالعان ساۋالنامالىق زەرتتەۋگە 10,05 مىڭ شەتەلدىك تۋريست قاتىستى. ولاردىڭ 53%-ى ەر ادامدار بولسا, 47%-ى ايەلدەر. 24,5%-ى ىسكەرلىك ماقساتتا نەمەسە جۇمىس بابىمەن, ال قالعان 75,5%-ى جەكە باس سەبەپتەرىمەن قازاقستانعا ات باسىن تىرەگەن. سالىستىرۋ ءۇشىن ايتا كەتەيىك, ءبىر جىل بۇرىن ىسكەرلىك ماقساتتا جانە جۇمىس بابىمەن كەلگەندەردىڭ ۇلەس سالماعى 21,3% بولعان ەدى.
ال ولاردىڭ جۇمساعان قارجىسىن ەسەپتەر بولساق, بيزنەس-تۋريستەردىڭ قازاقستاندا جۇمساعان اقشاسى جالپى شەتەلدىك تۋريستەر شىعىنىنىڭ 42,1%-ىن قۇرادى. ال ءبىر جىل بۇرىن بۇل كورسەتكىش 40,2%, ياعني 408,9 ملن تەڭگە بولعان-دى.
شەتەلدىك ءتۋريستىڭ جۇمسايتىن اقشاسى ورتا ەسەپپەن 96,7 مىڭ تەڭگەنى قۇرادى. بۇل ءبىر جىل بۇرىنعى كورسەتكىشتەن 22%-عا ارتىق.
ال بيزنەس-تۋريستەردىڭ جۇمسايتىن اقشاسى جەكە شارۋامەن كەلۋشىلەر جۇمسايتىن قارجىعا قاراعاندا 2,2 ەسە ارتىق بولىپ شىقتى. ناقتىراق ايتار بولساق, ىسكەرلىك ماقساتتا جانە جۇمىس بابىمەن كەلۋشىلەر ورتا ەسەپپەن 165,8 مىڭ تەڭگە جۇمساسا, جەكە باس سەبەپتەرىمەن كەلۋشىلەر قازاقستاندا 74,3 مىڭ تەڭگە جۇمسايدى ەكەن.
جالپى, قر ۇلتتىق قاۋىپسىزدىك كوميتەتىنىڭ شەكارا قىزمەتىنىڭ مالىمەتىنشە, وتكەن جىلى قازاقستانعا 6,5 ملن شەتەلدىك قوناق كەلگەن. بۇل الدىڭعى جىلعى كورسەتكىشتەن 1,2%-عا ارتىق. شەتەلدىك تۋريستەردىڭ كەلۋ قارقىنى وسى كۇيىندە ساقتالاتىن بولسا, 2017 جىلى قازاقستانعا كەمىندە 6,6 ملن تۋريست كەلىپ, ولار ەل ەكونوميكاسىنا 637,5 ملرد تەڭگە كىرگىزبەك.
ساۋالناما ناتيجەسى كورسەتكەندەي, قازاقستانداعى شەتەلدىك تۋريستەردىڭ ەڭ كوپ قارجى جۇمسايتىنى حالىقارالىق باعىتتاعى كولىك شىعىندارى بولىپ شىقتى. جالپى جۇمسالاتىن قارجىنىڭ 33,4%-ى وسى سەكتورعا تيەسىلى.
ودان كەيىنگى ورىندا تاۋار ساتىپ الۋ. سونىڭ ىشىندە 24,4%-ى كادەسىيعا, 23,8%-ى كيىم مەن اياق كيىمگە, تاعى 22,9%-ى اسىل تاستار مەن مەتاللدار, انتيكۆاريات پەن كوركەمونەر تۋىندىلارىن ساتىپ الۋعا جۇمسالاتىن كورىنەدى.
ال ءۇشىنشى ورىندا تاماق ساتىپ الۋعا جۇمسالاتىن اقشا. تۋريستەردىڭ قالدىراتىن قارجىنىڭ 16,2%-ى تاماقتانۋعا كەتەدى ەكەن.
شەتەلدىك تۋريستەردىڭ تەك 1,7%-ى عانا قازاقستانعا ءبىر كۇنگە كەلەتىن بولسا, قالعاندارى ەكى نەمەسە ودان دا كوپ كۇنگە كەلەدى.
تۋريستەردىڭ 54,5%-ى تانىستارى مەن تۋىستارىنا تۇسسە, 26,8-ى قوناقۇيگە, 12,8%-ى جالدامالى پاتەرگە, تاعى 2,1%-ى شيپاجايلارعا ورنالاسقان.
دايىنداعان باۋىرجان مۇقانوۆ, «ەگەمەن قازاقستان»
