ولاردىڭ اراسىندا شىعىسقا بەت العان اكبار مەن ءجاسميننىڭ وتباسى دا بار ەدى. ءومىردىڭ اۋىر سىنىندا جۇكتى جاسمين سۇيگەن جارىنان كوز جازىپ قالدى. كەيىن ۇلدى بولدى. قيىن كۇندەرىندە دالاداي كەڭ پەيىلىمەن قاناتىنىڭ استىنا العان حالىقتىڭ قۇرمەتىنە اتىن قازاقباي دەپ قويدى. ءار تاڭ سايىن «اكبار كەلىپ قالار» دەگەن ۇمىتپەن كوكجيەككە قاراۋمەن قارتتىققا جەتكەن ءجاسميننىڭ ارزۋ-ارمانى اقىرى ورىندالدى...
جازۋشى, اۋدارماشى مالىك وتارباەۆتىڭ «باياندى باق» پەساسىن ماحامبەت اتىنداعى اتىراۋ وبلىستىق قازاق دراما تەاترىنىڭ ارتىستەرى جوعارى دەڭگەيدە ساحنالادى. قويىلىمنىڭ العاشقى كورسەتىلىمىنە اۆتور تۇركيادان ارنايى كەلىپ قاتىستى. تەاتردىڭ باس رەجيسسەرى مۇقانعالي تومانوۆ از ۋاقىتتىڭ ىشىندە كورەرمەنگە ايتار ويى مەن بەرەر ءتالىمى بار شىعارمانى اسقان شەبەرلىكپەن جەتكىزدى.
- ونەر تۋىندىلارى حالىقتار اراسىنداعى دوستىق پەن ىنتىماقتاستىقتى نىعايتادى, ءبىر-بىرىنە جاقىنداستىرادى. سپەكتاكلدە باياندالعان وقيعا شىنايى ومىردەن الىنعان. رەپرەسسيا كەزىندە قانشاما تاعدىر باقىتسىزدىققا ۇشىرادى. قازاق حالقى جەر اۋىپ كەلگەندەردىڭ بارىنە جاناشىرلىقپەن قارادى. ءبىز وسىنىڭ ءبارىن جاس ۇرپاققا كورسەتۋىمىز كەرەك, - دەيدى مالىك وتارباەۆ.
ال اتىراۋلىق تەاتر ۇجىمى الداعى ۋاقىتتا «باياندى باقتى» انكارا ساحناسىندا قويۋدى جوسپارلاپ وتىر.
باقىتگۇل باباش,
«ەگەمەن قازاقستان»
اتىراۋ.
