جيىن بارىسىندا بەلگىلى بولعانداي, قازاقستاندا جولدىڭ قاراما-قارسى جولاعىنا شىعىپ كەتكەنى ءۇشىن جۇرگىزۋشى كۋالىگىنەن ايىرۋ جازاسى ەنگىزىلەدى.
«ءبىز زاڭنامادا تىيىم سالىنعان جولدىڭ قاراما-قارسى جولاعىنا شىعۋ تۋرالى نورمانى كۇشەيتەيىك دەپ شەشتىك. بۇل رەتتە قاراما-قارسى جولاققا شىعىپ بۇرىلىس جاساۋ دا جۇرگىزۋشى كۋالىگىنەن ايىرۋعا الىپ كەلەدى», - دەدى ول.
ونىڭ ايتۋىنشا, زاڭعا موتوتسيكلمەن ءجۇرىپ كەلە جاتقاندا جۇرگىزۋشىدە, جولاۋشىدا موتوشلەمدى كيۋىن مىندەتتەۋ تۋرالى تالاپ ەنگىزىلەدى. بۇعان دەيىن اتالعان نورما جول قوزعالىسى ەرەجەسىندە عانا بولعان.
سونىمەن قاتار ەندى قازاقستاندا جۇرگىزۋشى كۋالىگىنىڭ مەرزىمى وتكەن جاعدايدا قايتا ەمتيحان تاپسىرۋ جويىلادى.
جالپى, دەپۋتاتتار اتالعان زاڭعا ەنگىزىلۋى ءتيىستى 120-دان استام تۇزەتۋدى قاراستىرعان. ناتيجەسىندە ونىڭ 55-ءى قالىپ وتىر. زاڭدا جول ءجۇرىسى ەرەجەسىن بۇزعانى ءۇشىن اكىمشىلىك ايىپپۇلداردى ازايتۋ, قۇجاتتاردى تەكسەرۋ بارىسىندا كولىك جۇرگىزۋشىگە فوتو جانە بەينەتۇسىرىلىم جاساۋعا رۇقسات بەرۋ, كۇندىزگى ۋاقىتتا ەلدى مەكەندەر ىشىندە جۇرگەن كەزدە كولىكتىڭ جاقىن جارىعىن قوسۋ مىندەتىن الىپ تاستاۋ, ىشكى ىستەر ورگاندارىنىڭ قىزمەتكەرلەرى توقتاتقان جاعدايدا ونىڭ رۇقساتىنسىز جولاۋشىلاردىڭ كولىكتەن شىعۋعا تىيىمدى الىپ تاستاۋ, جۇرگىزۋشى كۋالىگىنىڭ جارامدىلىق مەرزىمى ءوتىپ كەتكەن جاعدايدا قايتا ەمتيحان تاپسىرۋ تالابىن الىپ تاستاۋ كوزدەلگەن.
