كەش «سەڭ قوزعالدى... قالجىڭنىڭ قورجىنىن اقتارىڭدار!» دەپ اتالدى. ساحنادا ەڭ الدىمەن ي. يلف پەن ە. پەتروۆتىڭ «12 ورىندىق» شىعارماسى ورىندالدى. وستاپ بەندەردىڭ ءدال بۇگىنگى كۇندەگى كەيبىر ادامدارمەن تىرلىگى وتە ۇقساس ەكەندىگىن اڭعارتقان استارلى ويدىڭ يەسى پەداگوگ-مۋزىكانت تيمۋر اۋباكىروۆتىڭ ءازىل-قالجىڭى كوپشىلىكتىڭ كوڭىلىنەن شىقتى. «ءبىز پروبلەماسى كوپ بولسا دا, شارشامايتىن قاراپايىم S. قالاسىندا تۇرامىز», دەپ قالجىڭداعان تيمۋر وستاپ بەندەر كينوفيلمىنەن ناقىشىنا كەلتىرە اندەر ورىندادى. 12 ورىندىق ساحناعا قويىلىپ, «سونىڭ ىشىندە جاسىرىنعان اقشا بار» دەگەندى ىزدەگەن كورەرمەندەردىڭ ءبىرى 1000 تەڭگەنى ولاردان ەمەس, ءوزى وتىرعان ورىندىقتىڭ استىنان تاۋىپ العاندا تاڭ-تاماشا قالدى. تاعى دا باسقا ساتتىلىككە تاپ بولعاندار تاپقان مىڭ تەڭگەلەرىن «كىلت» كلۋبىنىڭ دامۋىنا دەپ ارنادى. كەشكە قاتىسۋشىلار ءتۇرلى كونكۋرستارعا قاتىسىپ, ەڭ باستىسى, ءازىل-قالجىڭمەن كوڭىلدەرىن كوتەرىپ, كوزدەرىنەن جاس اققانشا ءبىر كۇلدى. وسىنىڭ ءبارى كۇلكى كۇنىنە ارنالدى.
راۋشان نۇعمانبەكوۆا
سەمەي
سۋرەتتى تۇسىرگەن اۆتور
