ۇلتتىق ستۋديا ءتۇسىرىلىمنىڭ بارلىعى دەرلىك ماڭعىستاۋ وبلىسىندا وتەتىندىگىن مالىمدەپ وتىر. فيلمدە قاراقيا ويىسى, ءۇستىرت شوقىسى جانە كاسپي تەڭىزى كورىنىس تابادى. تۇسىرىلىمدەر ءۇشىن اقتاۋ قالاسىنا جاقىن جەردەگى قانعا اۋىلىندا دەكوراتسيالار تۇرعىزىلىپ, ەلدى مەكەن فاكتۋرالاندى.
پسيحولوگيالىق شيەلەنىسكە تولى درامالىق كارتيناداعى باستى رولدەرگە اسىلحان تولەپوۆ پەن الدابەك شالباەۆ بەكىتىلگەن. سونداي-اق, فيلمگە مۇحامەدجان مىرزاكيەۆ, داۋلەت ءابىش, قاناتبەك قۇرىمباەۆ, ماقسات ءسابيتوۆ, ازامات شارعىن, زۋحرا سايپي جانە باسقالار تۇسەتىن بولادى.
رەجيسسەر ءابىش كەكىلباەۆتىڭ ۇزدىك تۋىندىلارىنىڭ ءبىرى «شىڭىراۋدى» ەكرانداۋ اسا جاۋاپكەرشىلىكتى تالاپ ەتەتىندىگىن ايتادى.
– كوپتەگەن وتاندىق كينەماتوگرافيستەر ءابىش كەكىلباەۆتىڭ پوۆەسى بويىنشا فيلم قويۋدى جانە ەكرانداۋدى ارماندادى. الايدا, ءالى كۇنگە دەيىن پوۆەست ەكران تىلىندە سويلەگەن ەمەس. ستسەناريدى ءتورت جىل بۇرىن جازىپ, تۇزەتۋلەردى كۇنى بۇگىنگە دەيىن ەنگىزىپ وتىردىم. قازىر مەنىڭ بار قالاۋىم – ءابىش كەكىلباەۆتىڭ پوۆەسى دەڭگەيىندەگى فيلم ءتۇسىرۋ. ءبىز لوكاتسيا مەن ناتۋرا تاڭداۋدا كوپ جۇمىس اتقاردىق. بارلىق اكتەرلەر بەكىتىلدى. ءبىر-ەكى كۇندە ماڭعىستاۋ وبلىسىنا تۇسىرىلىمدەردى باستاۋعا جولعا شىعامىز, – دەيدى رەجيسسەر ش.ايمانوۆ اتىنداعى «قازاقفيلم» اق ساراپشىلىق كەڭەسىندە.
– حالىقتى سۋمەن قامتاماسىز ەتىپ ريزاشىلىعىنا بولەنۋدى ماقسات ەتۋمەن باستالعان جۇمىستىڭ سوڭى قىزعانىشقا اينالادى. ال باسەكەدە شەك بولمايدى. شەكسىزدىككە ۇمتىلۋ تىلسىم كۇشپەن تايتالاسقانمەن ءبىردەي. وعان ادامنىڭ اقىلى دا, كۇشى دە جەتپەيدى. ەڭسەپتىڭ قاسىرەتى دە وسىندا. رەجيسسەر رەتىندە ماعان ەڭسەپتىڭ جان-دۇنيەسىن كورسەتۋ ماڭىزدى. پروزانىڭ تىلىندە جاقسى قولدانىلعان ءتاسىل كينەماتوگرافيادا ۇتىمدى بولماي, ءتىپتى ماڭىزىن بەرە الماي قالادى. سوندىقتان دا فيلمگە پوۆەستە جوق كەيبىر وزگەرىستەر ەنگىزدىم. جالپى, پوۆەستىڭ سيۋجەتتىك جەلىسىن, فابۋلاسىن ساقتادىم, – دەيدى جاڭابەك جەتىرۋوۆ.
كارتينانى شىعارما دەڭگەيىندە ءتۇسىرۋدى ماقسات تۇتقان رەجيسسەر تەك كينو تىلىمەن بايانداپ قويماي, ءوز تاراپىنان تىڭ شەشىمدەر جاسايتىنىن ايتۋدا.
فيلم مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلۋدە.
ايناش ەسالي,
«ەگەمەن قازاقستان»
الماتى
