بۇل ۇزدىك الەۋمەتتىك فوتوسۋرەتتەر كورمەسىن «باۋىرجان» قايىرىمدىلىق قورى «Make It Clear!» الەۋمەتتىك فوتوسۋرەتتەر بايقاۋى اياسىندا ۇيىمداستىرىپ وتىر.
وندا الەمدىك فوتوگرافتاردىڭ جۇمىستارىن كەز كەلگەن قالا تۇرعىنى 19 ساۋىرگە دەيىن تاماشالاي الادى. كورمەدە الەۋمەتتىك تاقىرىپتاعى ءتۇرلى ماسەلەلەردى قوزعايتىن فوتوسۋرەتتەر قويىلدى.
ۇيىمداستىرۋشىلاردىڭ ايتۋىنشا, اتالمىش كورمەنىڭ ماقساتى − الەۋمەتتىك فوتوسۋرەتتەر ارقىلى ادامداردىڭ نازارىن قوعامداعى تۇيتكىلدى ماسەلەلەرگە اۋدارۋ. «فوتوسۋرەتتەر ءتۇرلى تاعدىرلار مەن قيىندىقتاردىڭ سىرىن شەرتىپ, ولاردىڭ شەشىلۋ جولدارىن ىزدەۋگە وي سالادى. سەبەبى, وسى كۇنى حالىق ۆيزۋالدى تۇردە باسا نازار اۋداراتىندىقتان, اينالاسىنداعى ماسەلەلەرگە كوزقاراسى وزگەرۋى مۇمكىن», – دەيدى قايىرىمدىلىق قورىنىڭ وكىلدەرى.
كورمەدە جالپى الەمدىك جانە قازاقستاندىق فوتوگرافتاردىڭ 50 فوتوسۋرەتى ۇسىنىلىپتى. مەترو كوپشىلىك شوعىرلاناتىن ورتا بولعاندىقتان, الەۋمەتتى فوتوسۋرەتتەر جۇرت نازارىنان تىس قالمايدى دەپ سانايدى.
ەسكە سالساق, جەڭىمپازداردى ءوز كاسىبىنىڭ شەبەرلەرى – تانىمال فوتوگرافتار انىقتايتىن بولادى. ولاردىڭ قاتارىندا دامير وتەگەن, ليۋبوۆ حارلاموۆا, پاۆەل ميحەەۆ, نيكيتا باسوۆ ءجانە تاعى باسقالار بار. بايقاۋ مىنا بەس اتالىم بويىنشا انىقتالادى: «وتباسىنا ءجانە وتانعا دەگەن ماحاببات», «جاقىنىڭا دەگەن ماحاببات», «جانۋارلارعا دەگەن ماحاببات», «بالالارعا دەگەن ماحاببات», «ەكى جارتى – ءبىر ءبۇتىن». سونداي-اق, جەلى قولدانۋشىلارىنىڭ داۋىس بەرۋ ناتيجەسى بويىنشا «كورەرمەندەر كوزايىمى» اتتى دا ارناۋلى ماراپات تاعايىندالماق. جۇلدە قورىندا Canon/Nikon فوتواپپاراتى, Leica وپتيكاسىمەن Huawei سمارتفونى, Samsung 360 بەينەكامەراسى, فوتوتۇسىرىلىمگە ارنالعان كۆادروكوپتەر, فوتوگرافقا ارنالعان ريۋگزاك, (GoPro, Sony) ەكشن-كامەراسى بار.
ساپارباي پارمانقۇلوۆ,
«ەگەمەن قازاقستان»
الماتى
