− جاڭا جىل الدىندا وبلىستاعى ەڭ ءىرى اۋرۋحانانىڭ ءدارىگەرىن شاقىرىپ الىپ, سويلەستىم, − دەيدى د.احمەتوۆ. − سەندەر نەگە ءۇش-ءتورت كۇن بويى حالىقتى قابىلدامايسىڭدار؟ «مەرەكە عوي, دانيال كەنجەتاي ۇلى», دەيدى الگى باس ءدارىگەر ارقانى كەڭگە سالىپ. سوندا 31 جەلتوقساندا وپەراتسيا جاساتقان سىرقات, قالعان ءتورت كۇن بويى دارىگەرلەردىڭ قاراۋىندا بولماۋى كەرەك پە؟! سول سياقتى 8 ناۋرىزدا وسكەمەندەگى وڭالتۋ ورتالىعىندا بولدىم. ەمحانادا كەزەكشى دارىگەردەن باسقا جان كورىنبەيدى. «نەگە ەشكىم جوق؟» دەگەن سۇراعىما: «مەرەكە», دەپ تاق ەتىپ جاۋاپ بەردى. وسى جاعدايدى وزگە دە اۋرۋحانالاردان كوردىم. كونستيتۋتسيانىڭ 29-بابى بويىنشا ەل ازاماتتارى دەنساۋلىقتارىن ەمدەتۋگە قۇقىلى. ال دەمالىس جانە مەرەكە كۇندەرى دارىگەرلەر جۇمىسقا شىقپاسىن دەگەن ءموراتوريدى كىم شىعارىپ وتىر؟ مەديتسينا مەكەمەلەرى وبلىستىڭ بيۋدجەتىنەن حالىق ءۇشىن قاجەتىنشە قارجىلاندىرىلادى. بۇل قالاي؟
وبلىس باسشىسىنىڭ وسى ەسكەرتپەسىنەن كەيىن وسكەمەن مەن سەمەي قالالارىنداعى ءىرى ەمحانالاردىڭ جۇمىستارى تەكسەرىلدى. «نۇر وتان» پارتياسىنىڭ جەرگىلىكتى فيليالدارى تەكسەرگەن كەزدە بەلگىلى بولعانداي, دارىگەرلەر مەرەكە, دەمالىس كۇندەرى حالىققا ەم-دوم قىزمەتتەرىن كورسەتۋدەن باس تارتادى ەكەن. بۇل − رەسپۋبليكانىڭ ءبىراز وڭىرلەرىنە ءتان كورىنىس. ءتىپتى, دەر كەزىندە كومەك كورسەتىلمەگەندىكتەن ادام ءومىرىنە قاۋىپ تونگەن جاعدايلار كەزدەسكەن. دارىگەرلەر ءسوزى «قينالىپ بارا جاتساڭدار, «جەدەل جاردەم» شاقىرىڭدار», دەگەنگە ساياتىن كورىنەدى.
ارينە, مەيرام كۇندەرى ادامدار دەمالۋى كەرەك. بىراق, دەمالىس كۇندەرى ەڭبەك ەتكەن ءدارىگەرلەرگە جالاقى تولەۋ كەرەكتىگى جونىندە دە زاڭناما بار عوي, دەيدى وبلىس باسشىسى.
قاتاڭ تاپسىرما سەمەيگە دە جەتتى. قالا اكىمىنىڭ ورىنباسارى نادەجدا شاروۆا, قالالىق قوعامدىق كەڭەس جەتەكشىسىنىڭ ورىنباسارى جاننا جيبراەۆا ۇلىستىڭ ۇلى كۇنىندەگى دەمالىس كۇندەرىندە قالاداعى دەنساۋلىق ساقتاۋ مەكەمەلەرىنىڭ قىزمەتىن تەكسەرۋدەن وتكىزدى. ەمحانالاردىڭ الدىندا جۇمىس كەستەسىنىڭ ورنىنا قاپتاعان قوقىس, شاڭ باسقان ۇستەلدەر تەكسەرۋ توبىن قارسى الىپتى. وبلىس اكىمى دارىگەرلەر دەمالىس كۇندەرى كەم دەگەندە ساعات 9.00-دەن تۇسكى 13.00-گە دەيىن قىزمەت كورسەتۋى كەرەك دەگەن ەدى. بىراق, ەمحانالاردا ادام جوق. قاداعالاۋشىلار توبى ەڭ الدىمەن, قالانىڭ سول جاعالاۋىندا ورنالاسقان №19 ەمحانانى تەكسەردى. ەم-شارا بولمەسىندە ءبىر كەزەكشى دارىگەر عانا وتىر ەكەن.
مەكەمەگە قانشا حالىق قارايدى؟ قانشا زەينەتكەر, جۇمىس ىستەۋشى, ەرەسەكتەر قاۋىمى تىركەلىمدە تۇر؟ مىندەتتى مەديتسينالىق ساقتاندىرۋ جۇيەسىن ەنگىزۋ ماسەلەسى حالىققا قالاي ءتۇسىندىرىلىپ جاتىر؟ – دەدى ن.شاروۆا.
بىراق, جاۋاپ بەرگەن ادام جوق. ارينە, بارلىق مەكەمە ءبىردەي ەمەس. «وكەان» اۋدانىنداعى ارالاس ۇلگىدەگى №2 ەمحانادا جاعداي مۇلدە باسقاشا. بۇل مەكەمەدە مەرەكە كۇندەرى دە ءدارىگەرلەر جۇمىس ىستەيدى. باس ءدارىگەر ورىنباسارىنىڭ ايتۋىنشا, حالىق ءتيىستى دارىگەرلەرىنىڭ قابىلداۋ كەستەسىن جاتقا بىلەدى جانە الدىن الا جازىلىپ قويادى. مەرەكە كۇندەرى دارىگەرلەردىڭ ورنىن كەزەكشى توپ الماستىرىپ وتىرادى.
ايتا كەتەلىك, شىعىس وڭىرىندە ەلىمىزدىڭ باسقا وبلىستارىنا قاراعاندا دەنساۋلىق ساقتاۋ سالاسىنا بولىنەتىن قارجى كولەمى اۋقىمدى. ال تۇرعىندار تيەسىلى مەديتسينالىق قىزمەتتى الۋدا قولدان جاسالعان كەدەرگىلەردىڭ بولماۋىن قالايدى.
راۋشان نۇعمانبەكوۆا
سەمەي
