سودان دا بولار, Boxingnewsandviews.com سايتى «شەتەلدەگى ايقاستاردى جاقيانوۆتان ارتىق بىلەتىن ادام جوق», دەپ سانايدى. اتالعان پورتال ءتىپتى, وعان «جولداعى جاۋىنگەر» دەپ ات قويىپ, ايدار تاققان.
سوڭعى جەكپە-جەگىن اقش-تا وتكىزىپ, ءوزىنىڭ باستى ارمانى – WBA تۇجىرىمى بويىنشا الەمنىڭ سۋپەرچەمپيونى اتاعىنا قول جەتكىزگەن بىلعارى قولعاپ شەبەرىمەن ارادا بولعان سۇحباتتاعى اڭگىمە بىلايشا ورىلگەن ەدى...
– ءسىز بوكسقا 16 جاسىڭىزدا كەلىپسىز. ءبارىن كەش باستاعاننىڭ كۇننىڭ وزىندە وسىنداي جەتىستىككە جەتۋىڭىزدىڭ سىرى نەدە؟
– ءوزىم سولتۇستىك قازاقستان وبلىسىنىڭ جامبىل اۋدانىنا قاراستى اۋىلدا دۇنيەگە كەلگەنمىن. مەكتەپتە وقىپ ءجۇرىپ كۇرەسكە قاتىستىم. ال 1998 جىلى پەتروپاۆلعا كوشىپ, ۇيىرمەنىڭ الىس بولۋىنا بايلانىستى سپورتتان قول ءۇزىپ قالدىم. تەك 1999 جىلدىڭ سوڭىنا قاراي سىنىپتاستارىممەن بىرگە بوكس ۇيىرمەسىنە بارا باستادىم. مەنىڭ بۇل ارەكەتىمە ۋاقىتشا قىزىعۋشىلىق دەپ قاراعاندار بولدى. اۋەسقوي بوكستا كوپ جۇرگەن جوقپىن. ال كاسىپقوي بوكستا بەلگىلى بەلەستى باعىندىرسام, ول ەڭبەكتىڭ ارقاسى. ەڭ باستىسى, ماقساتقا جەتۋ جولىندا قورقىنىشتى جەڭە ءبىلۋ كەرەك.
– مەنىڭ بىلۋىمشە, ايگىلى حاتتوننىڭ ەڭ تابىستى شاكىرتىسىز عوي؟ ال ونىمەن ءتىل تابىسۋ قانشالىقتى وڭاي؟
– ازىرگە شاكىرتتەرىنىڭ اراسىنان ءبىرىنشى بولىپ الەم چەمپيونى اتاندىم. ونىڭ قاراماعىندا دارىندى جاستار وتە كوپ. سوندىقتان, ءالى تالاي جەڭىمپاز شىعاتىنىنا سەنىمدىمىن. ونىڭ ۇستىنە ريككي وتە بىلىكتى مامان. كاسىپقوي بوكستىڭ جىلىك مايىن شاققان عوي. كەزىندە شارشى الاڭدا مەنني پاكياومەن كەزدەستى. كوستيا ءتسزيۋدى ۇتتى. مىنە, بىرگە جۇمىس ىستەپ جاتقانىمىزعا ءتورت جىل بولدى. ءبىر-ءبىرىمىزدى تەز ۇعىنىسامىز. پروموۋتەر رەتىندە دە ونىڭ مىقتىلىعىن مويىندايمىن. الەم چەمپيونى اتاعى ءۇشىن جەكپە-جەكتى كەز كەلگەن مەنەدجەر ۇيىمداستىرا المايدى.
– قازىر ءسىزدىڭ الەم چەمپيونى دەگەن دارداي اتاعىڭىز بار. ەندى تانىمال بوكسشىلارمەن كەزدەسۋ مۇمكىندىگىڭىز جوعارىلاعان شىعار؟
– كاسىپقوي بوكس دەگەنىمىز – بيزنەس. مۇندا ءبارىن اقشا شەشەدى. كىمنىڭ ۇسىنىسى كوڭىلدەن شىعادى, سونىمەن كەلىسسوز جاسالادى. سوندىقتان, بۇل تاراپتاردىڭ كەلىسىمىنە بايلانىستى. كەلەسى قارسىلاسىمنىڭ كىم بولاتىنىن بىلمەيمىن. ونىمەن مەنەدجەرلەر مەن باپكەرلەر اينالىسادى.
– ۋوررەنمەن ارادا بولعان جەكپە-جەك ءۇشىن ءسىز 30 مىڭ دوللار الدىڭىز, قارسىلاسىڭىزعا جەڭىلىسىنە قاراماستان سىزدەن بەس ەسە كوپ بۇيىردى...
– بۇل ايقاستا ءبىز ءۇشىن اقشا ەمەس, بەلبەۋ ماڭىزدى بولدى. ۋوررەننىڭ كومانداسى «30 مىڭ دوللار بەرەمىز, ەگەر دايىن بولساڭدار, كەزدەسۋ كۇنىن بەلگىلەيمىز» دەپ ۇسىنىس جاسادى. ءبىز بىردەن كەلىستىك. كاسىپقوي بوكسقا اۋىساتىنداردىڭ كوزدەيتىنى دە نەگىزىنەن اقشا عوي. سوندىقتان جاقسى ۇسىنىستار بولىپ جاتسا, قاراستىرۋعا دايىنبىز. ءبىراق ول ءۇشىن ۇسىنىس الدىمەن باپكەرلەرىمنىڭ كوڭىلىنەن شىعۋى ءتيىس.
– ءسىز سەكىلدى ەۋروپادا نەمەسە مۇحيت اسىپ اقش-تا باعىن سىناعىسى كەلەتىن جاستارىمىز بار. ولاردى كومانداڭىزعا تارتىپ, بىرگە جاتتىعۋ ويدا جوق پا؟
– حاتتون ءوز كومانداسىنا تاجىريبەلى, بىرنەشە كەزدەسۋ وتكىزىپ, ءوزىن دالەلدەپ ۇلگەرگەن بوكسشىلاردى شاقىرادى. ناقتىراعى, شەتەلدىكتەرگە قويىلاتىن تالاپ وسى. ال اعىلشىن بولسا, ونىڭ توپقا كىرۋ مۇمكىندىگى جوعارى. ول ءتىل بىلەدى, ونى جەرگىلىكتى جانكۇيەرلەر تەز قابىلدايدى. سونىڭ ءوزى جارناما.
– جالپى, شەتەلدە قازاقستاندىق بوكسشىلارعا دەگەن كوزقاراس قانداي؟
– بۇرىندارى «I am from Kazakhstan» دەسەڭ, باستارىن شۇلعىپ قالاتىن «ول قاي جەردە؟» دەگەندەي. قازىر بىردەن «Triple G! Good!», دەيدى. گەننادي گولوۆكيندى ءبارى تانيدى, قۇرمەتتەيدى. قۋانىپ قالاسىڭ, ەلىمىزدە وسىنداي برەندتىڭ بارىنا.
– ال گولوۆكيننىڭ دەڭگەيىنە جەتۋ ءۇشىن سىزگە نە ىستەۋ كەرەك دەپ ويلايسىز؟
– اركىمنىڭ ءوز جولى بار. مەن بىرەۋگە قاراپ, سوعان ۇقساۋعا تىرىسپايمىن. وسى دارەجەگە جەتكەنىمە قۋانىشتىمىن. ءدال قازىر ماعان بۇيىرتقان جولمەن ءجۇرىپ كەلە جاتىرمىن.
– استانادا جەكپە-جەك وتكىزگىڭىز كەلەتىندىگىن ايتىپسىز. بۇل تۋرالى ۇسىنىستار بار ما؟
– ۇسىنىستار تۇسكەن جوق, ءوزىمنىڭ قالاۋىم عوي. ەحرو قارساڭىندا وتانداستارىم الدىندا كەزدەسۋ وتكىزسەم دەگەن ارمان ازىرگە.
– ءسىزدىڭ سپورتتىق كارەراڭىزدان بولەك سقو-دا جاتتىقتىرۋشى بولىپ تا قىزمەت ەتەسىز. تەرىسكەي ولكەدەگى بوكستىڭ دامۋىنا قانداي باعا بەرەر ەدىڭىز؟
– 2006 جىلى وقۋدى ءتامامداعان سوڭ ءبىر جىل جۇمىس ىستەپ اسكەرگە كەتتىم دە, كەلگەن سوڭ جاتتىقتىرۋشىلىق قىزمەتىمدى جالعاستىردىم. 91 كەلىدەن جوعارى سالماقتا ءبىر شاكىرتىم ەل بىرىنشىلىگىندە ءۇشىنشى ورىن الدى, تاعى ءبىر شاكىرتىم كادەتتەر اراسىندا ءجۇلدەگەرلەر قاتارىنان كورىندى. ودان بولەك ازيا چەمپيوناتىنىڭ ءفيناليسى ازات ەلۋباەۆ دەگەن دارىندى جىگىت بار. جالپى العاندا, بوكسقا قىزىعۋشىلىق ارتقان.
– ءسىزدى سەگىز ليترگە دەيىن سۋ ىشەدى دەيدى. نەلىكتەن؟ جالپى, سالماقتى قالىپتا ۇستاپ تۇرۋ قانشالىقتى قيىن؟
– تىم بوساڭسىپ كەتپەۋگە تىرىسامىن, قانشا سالماق قۋا الاتىنىمدى بىلەمىن. دايىندىق كەزىندە سۋدى كوپ ىشەتىنىم راس. بۇلشىق ەت سوزىلمالى بولادى. اعزا قۇرعاقشىلىقتى سەزىنبەس ءۇشىن دە سۋ قاجەت. الدىمەن 2 ليتردەن باستاپ دايىندىقتىڭ ورتا تۇسىندا 8 ليترگە دەيىن جەتكىزەمىن. ال تارازىعا تارتىلۋعا ءبىر اپتا قالعاندا كۇنارا 2 ليترگە ازايتا باستايسىڭ. سالماق ولشەيتىن كۇنى مۇلدە سۋ ىشپەيمىن, تەك ءبارى ويداعىداي وتكەن سوڭ عانا سۇيىقتىقتىڭ ورنىن تولتىرىپ, تاماقتانىپ الامىن.
– ەندىگى ارمانىڭىز قانداي؟
– ەكى بالام بار – ءبىر ۇل, ءبىر قىز. ەكەۋى دە ءالى كىشكەنتاي. سولارعا جاقسى تاربيە بەرسەك, امان-ەسەن جەتىلدىرسەك دەپ ارماندايمىن. ەلىمىزگە سىيلى ازامات بولىپ وسسە دەيمىن. تىلەيتىنىم وسى.
– اڭگىمەڭىزگە راحمەت.
اڭگىمەلەسكەن
ءمادينا اسىلبەك,
جۋرناليست
استانا
