30 ناۋرىز كۇنى ماڭعىستاۋ وبلىسى اكىمدىگى مەن «Global Project Capital Ltd» اراسىندا ءوزارا تۇسىنىستىك تۋرالى مەموراندۋمعا قول قويىلدى. قۇجاتقا ايماق باسشىسى ەرالى توعجانوۆ جانە كومپانيانىڭ باس ديرەكتورى كەننەت فۋلتون قول قويدى.
مەموراندۋم اقتاۋ قالاسىنداعى ينفراقۇرىلىمدىق جانە كولىكتىك نىسانداردىڭ, جول قۇرىلىسى سالاسىنداعى جوبالاردىڭ كەزەڭ-كەزەڭىمەن جۇزەگە اسىرىلۋىنداعى ىنتىماقتاستىقتى كوزدەيدى. جەرگىلىكتى اتقارۋشى ورگان ءوز كەزەگىندە ينجەنەرلىك ينفراقۇرىلىمدى – گاز, سۋ, ەلەكتر جەلىلەرىن, جول جانە جىلۋ جۇيەسىن جۇرگىزىپ بەرۋ جۇمىستارىن مىندەتىنە الا وتىرىپ, 800 گەكتار كولەمىندە جەر ۋچاسكەلەرىن جالعا بەرەدى.
- «Global Project Capital Ltd» كومپانياسى قارجى رەسۋرستارىن ءبولىپ, وبلىستىڭ الەۋمەتتىك دامۋىنا ۇلەس قوساتىن بولدى. بولاشاقتا ءبىزدىڭ ىنتىماقتاستىعىمىز جاقسى ناتيجەلەرگە جەتكىزەتىنىنە سەنىمدىمىن. بۇگىنگى تاڭدا ءبىز تۋريستىك شاعىن اۋداننىڭ قۇرىلىسى بويىنشا جوبانى جۇزەگە اسىرۋدى باستاپ كەتتىك. جوسپار بويىنشا جاڭا شاعىن اۋداننىڭ اۋماعىندا مەديتسينالىق مەكەمەنىڭ, مەكتەپتىڭ, ويىن-ساۋىق نىساندارى مەن ساۋدا ورتالىقتارىنىڭ قۇرىلىستارى جۇرگىزىلەتىن بولادى. سونداي-اق, جاڭا جۇمىس ورىندارى اشىلادى. ءبىزدىڭ تاراپىمىزدان ينفراقۇرىلىمدى جۇرگىزۋگە قاتىستى بارلىق جۇمىستار جاسالادى, - دەپ اتاپ ءوتتى ماڭعىستاۋ وبلىسىنىڭ اكىمى ەرالى توعجانوۆ.
جوسپارلانىپ وتىرعان نىساندارعا – سۋ تازالاۋ مەن جىلۋ جۇيەلەرى, اقتاۋ حالىقارالىق اۋەجايى مەن اقتاۋ حالىقارالىق تەڭىز ساۋدا پورتىن دامىتۋ, جاسىل ەنەرگيا كوزدەرىن (كۇن جانە جەل) پايدالانا وتىرىپ سۇيىتىلعان تابيعي گاز بەن تەحنولوگيالاردى قولدانۋ ارقىلى ەنەرگيانى جەتكىزۋ, مەديتسينالىق جانە وزگە دە الەۋمەتتىك نىسانداردى قارجىلاندىرۋ, وبلىستاعى اۋىل شارۋاشىلىعىن دامىتۋ, جىلىجاي كەشەندەرىنىڭ قۇرىلىسى مەن ازىق-ت ۇلىك تاۋارلارىن شىعارۋ, ءىرى تۋريستىك نىسانداردى تۇرعىزۋ سەكىلدى سالالارعا جاڭا تەحنولوگيالار ەنگىزۋ كىرەدى. العاشقى كەزەڭگە 500ملن. اقش دوللارى كولەمىندە ينۆەستيتسيا بولىنەدى.
- بۇگىن ءبىز ۇلكەن جوبامىزدى ىسكە اسىرۋ جولىندا العاشقى قادامىمىزدى جاسادىق. جاسىل ەنەرگەتيكا كوزىن پايدالانا وتىرىپ ءارى قاراي ماڭعىستاۋ وبلىسىنىڭ جۇرتشىلىعىنا بەرۋ جانە سۋ تازالاۋ, ساۋلەت, ءبىلىم مەن دەنساۋلىق ساقتاۋ سالالارىنا جاڭا يننوۆاتسيا اكەلۋ ارقىلى وسى ءوڭىردىڭ دامۋىنا ءوز ۇلەسىمىزدى قوسۋدامىز. بۇل قالا جاڭا تەحنولوگيالار بويىنشا الىنعان جانە قۇرىلعان شاھار بولماق. ول تەڭىز جاعالاۋىنان باستالىپ, ۇيلەر ءوسۋ دەڭگەيى بويىنشا تۇرعىزىلادى. ياعني باسىندا شاعىن ۇيلەر سالىنسا, سودان كەيىن ۇزىن جانە ودان دا ۇزىن ۇيلەر بوي كوتەرەدى. ۇيلەردىڭ جارتىسى شىنى شاتىر سەكىلدى دالىزدەر ارقىلى بايلانىساتىن بولادى, ولارعا اۋا-رايىن باقىلايتىن قوندىرعىلار ورنالاستىرىلادى. بارلىق ۇيلەردە تەك قانا جەر استى پاركينگتەرى بولادى, - دەپ اتاپ ءوتتى «Global Project Capital Ltd» كومپانياسىنىڭ ديرەكتورى كەننەت فۋلتون.
ءوزارا ىنتىماقتاستىقتىڭ ءتيىمدى بولۋى ءۇشىن جانە جوبالاردى ساپالى ىسكە اسىرۋ ءۇشىن بىرلەسكەن كاسىپورىن قۇرىلاتىن بولادى. قالانىڭ كوركىنە كورىك قوسار جاڭا ينۆەستيتسيالىق جوباعا ماڭعىستاۋ جۇرتشىلىعى قىزىعۋشىلىق تانىتۋدا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
