وسىلايشا قازاقستاندا اسكەري قىزمەتكە شاقىرۋدىڭ كەزەكتى كوكتەمگى ناۋقانى باستالىپ وتىر. ال بيىلعى كوكتەمگى-كۇزگى ناۋقاننىڭ قازاقستان رەسپۋبليكاسى قارۋلى كۇشتەرى قۇرىلۋىنىڭ 25 جىلدىعى اياسىندا وتەتىنىن دە ايتا كەتكەن ورىندى.
ارينە, بۇل كەزەكتى اسكەرگە شاقىرىلىم ادەتتەگىدەي قازاقستان رەسپۋبليكاسى پرەزيدەنتىنىڭ 2017 جىلعى 16 ناۋرىزداعى «مەرزىمدى ءاسكەري قىزمەتتى وتكەرگەن اسكەري قىزمەتشىلەردى, اسكەري قىزمەتتىڭ بەلگىلەنگەن مەرزىمىن ءوتكەرگەن ءاسكەري قىزمەتشىلەردى زاپاسقا شىعارۋ جانە قازاقستان رەسپۋبليكاسىنىڭ ازاماتتارىن 2017 جىلدىڭ ناۋرىز-ماۋسىمىندا جانە قىركۇيەك-جەلتوقسانىندا مەرزىمدى اسكەري قىزمەتكە كەزەكتى شاقىرۋ تۋرالى» جارلىعىنا سايكەس باستالىپ وتىر. وسىعان وراي, بيىلعى جىلعى كوكتەمدە مەرزىمدى ءاسكەري قىزمەتكە 18 بەن 27 جاس ارالىعىنداعى ازاماتتار شاقىرىلۋعا جاتادى. شاقىرىلۋشىلار مەديتسينالىق كۋالاندىرۋ مەن اسكەري قىزمەتكە جارامدىلىعىن انىقتاۋدان وتكىزىلەتىن, وزدەرى اسكەري تىركەۋدە تۇراتىن جەرى بويىنشا قورعانىس ىستەرى جونىندەگى باسقارمالار مەن ءبولىمدەرگە جولىعادى.
بۇل جولى دا اسكەرگە شاقىرۋ وسى كەزگە دەيىنگى قالىپتاسقان ۇردىسكە ساي, بۇرىنعى ايماقتىق قاعيدا بويىنشا جۇزەگە اساتىن بولادى. ياعني, شاقىرىلۋشى اسكەري قىزمەتىن ءوتكەرۋ ءۇشىن باسقا ايماققا جىبەرىلەدى. اسكەر قاتارىن تولىقتىراتىن جاس ازاماتتاردى ىرىكتەۋ جانە اسكەري ءبولىمدەرگە تاراتۋ كەزىندە ولاردىڭ شاقىرىلىمعا دەيىن العان ماماندىقتارى ەسكەرىلەدى. شاقىرۋدى ۇيىمداستىرۋ ءتارتىبى مەن مەديتسينالىق كۋالاندىرۋ شارالارىن وتكىزۋ ماسەلەلەرىن جەدەل تۇردە شەشۋ ءۇشىن قازاقستان قورعانىس مينيسترلىگىندە وسى كەزەڭ ارالىعىندا ارنايى «جەدەل جەلى» جۇمىس جاساماق. جاۋاپتى لاۋازىمدى تۇلعالار ازاماتتاردىڭ قىزىعۋشىلىعىن تۋدىرعان ساۋالدارىنا جاۋاپ بەرىپ, تۇسىندىرەدى. ءتىپتى, حابارلاسىپ, شاقىرىلىمعا بايلانىستى قاجەتتى كەڭەس الۋعا دا بولادى.
جاستاردى اسكەرگە شاقىرۋدا, ەڭ الدىمەن, «اسكەري قىزمەت جانە اسكەري قىزمەتشىنىڭ مارتەبەسى تۋرالى» زاڭ باسشىلىققا الىنادى. سونداي-اق, ءار اسكەردىڭ ۆەدومستۆولىق بۇيرىعى بار. سوندا كورسەتىلگەندەي, اسكەرگە شاقىرىلۋشىنىڭ دەنى ساۋ, بويى 160 سم-دان تومەن بولماۋى ءتيىس. سونىمەن قاتار, اۋماقتىق قاعيدات ۇستالادى. ياعني, شاقىرىلۋشى الماتى قالاسىنىڭ تۋماسى بولسا, تالدىقورعان قالاسىنا اسكەري قىزمەتىن وتەۋگە جىبەرىلمەيدى. ول تۋعان اۋماعىنان الشاقتا بولۋعا ءتيىس. شاقىرۋ ناۋ-
قانى كەزىندە ازاماتتاردىڭ جاقىن وڭىرگە اۋىستىرىلۋىنا جول بەرىلمەيدى. مۇنى, اسىرەسە, ۇلتتىق ۇلان قاتارىنا كەلگەن جاۋىنگەر ناقتى ءتۇسىنۋى قاجەت. سونداي-اق, ۇلتتىق ۇلان قاتارىندا ازاماتتىق قورعانىس اسكەري بولىمدەرى بار. پسيحولوگتارمەن جۇمىس بارىسىندا ءاسكەرگە شاقىرىلۋشىنىڭ ادامعا كومەككە ۇمتىلۋ قاسيەتىنە ءۇلكەن كوڭىل بولىنەدى. بولاشاق ۇلاندىقتار ادامعا كومەكتەسۋگە اسىق بولۋى شارت. وقىس وقيعا كەزىندە تەز شەشىم قابىلداي الاتىن جىلى جۇرەكتى, تەمىر مىنەزدى ازاماتتاردىڭ مۇندا كوپ بولعانى ءجون.
اسكەرگە الاردا تاعى ءبىر كوڭىل بولىنەتىن جاعداي, شاقىرىلۋشى زياندى ادەتتەردەن اۋلاق ازامات بولۋى قاجەت. سالاماتتى ءومىر سالتىن ۇستانۋى شارت. دەمەك, ەڭبەكقور, ەلجاندى, وتباسىلىق قۇندىلىقتارى بەرىك, ازاماتتىق دەڭگەيدە ويلايتىن ادام بولۋى ءتيىس. سول سەبەپتى, شاقىرىلۋشى اسكەرگە جىبەرۋ كومانداسىنا قوسىلماستان بۇرىن ەسىرتكى زاتتارىن پايدالانعانى نە پايدالانباعانى تۋرالى تەستىدەن وتەدى. ەسىرتكىگە ەلىكتەۋى انىقتالسا, وندا ول ازامات اسكەرگە الىنبايدى.
الەكساندر تاسبولاتوۆ,
«ەگەمەن قازاقستان»
