ءبىز قازاقستاندى ورتالىق ازياداعى ەكونوميكالىق الەۋەتى زور سەنىمدى سەرىكتەس, دوستىق قاتىناستاعى قۋاتتى مەملەكەت رەتىندە سانايمىز. سونىمەن قاتار, وڭىردەگى ساياسي تىنىشتىق پەن تۇراقتىلىق قازاقستاننىڭ «ءتولقۇجاتىنا» اينالدى دەسەك تە بولادى. ەندەشە, ءمالىمدەلگەن باسىمدىقتار ءساتتى جۇزەگە اسۋ ءناتيجەسىندە قازاقستان دامۋدىڭ جاڭا كەزەڭىنە قادام باسادى دەگەن سەنىمدەمىن.
كونستيتۋتسيالىق رەفورمانى جۇزەگە اسىرۋ وڭاي ەمەس. ول – ەداۋىر ەرىك-جىگەردى قاجەت ەتەتىن اۋقىمدى ماسەلە. سەبەبى, مۇنداي وزگەرىس ەنگىزۋ ءوز كەزەگىندە جۇيەلى ءارى مۇقيات دايىندىقتى جانە زور جاۋاپكەرشىلىكتى تالاپ ەتەدى. ءويتكەنى, دامۋدىڭ داڭعىل جولى مەن كەمەلدەنگەن كەلەشەكتىڭ كىلتى وسىنداي شەشىمدەر قابىلداۋمەن تىكەلەي بايلانىستى بولماق.
مەن دەپۋتات رەتىندە باسقارۋ ىسىندە پارلامەنت ءرولىنىڭ كۇشەيۋىن قۇپتايمىن. سولاي دەسەك تە, وسى كەزگە دەيىن پرەزيدەنتتىك ينستيتۋتتىڭ باسىمدىققا يە بولۋى ەلدىڭ قالىپتاسۋ كەزەڭىندەگى العاشقى جىلداردا ءوزىنىڭ تيىمدىلىگىن كورسەتكەندىگىن دە ايتا كەتكەن ءجون. ءويتكەنى, مۇنداي يگى ءىستىڭ ناتيجەسىندە مەملەكەتتىڭ الەۋمەتتىك-ەكونوميكالىق جاعدايىنا قاتىستى رەفورمالار وتە ءساتتى ءجۇزەگە استى. وسىنىڭ ءبارى دە پرەزيدەنت ن.نازارباەۆتىڭ سارابدال ساياساتى مەن جوعارى بەدەلىنىڭ ءارى سەرىكتەستەرى اراسىنداعى دوستىق قارىم-قاتىناسىنىڭ ارقاسىندا ورىندالدى. مۇنى ءبىز مەملەكەتتىڭ قازىرگى قوعامدىق الەۋمەتتىك-ساياسي جاعدايىنا قاراپ تا اڭعارامىز.
ال ەندى قازاقستاننىڭ ءۇشىنشى جاڭعىرۋىنا قاتىستى ايتار بولسام, جەرگىلىكتى حالىقتىڭ قايتا جاڭعىرۋعا دەگەن ىنتا-ىقىلاسى مەن قۇلشىنىسى زور ەكەنى ايقىن كورىنەدى. سونىمەن قاتار, پرەزيدەنت جولداۋىن جۇزەگە اسىرۋ ارقىلى قازاقستاندىقتاردىڭ ەل ەكونوميكاسى مەن تۇرمىس-ءتىرشىلىكتى تۇپكىلىكتى وزگەرتۋگە كۇش-جىگەرى جەتكىلىكتى دەپ سانايمىن. وعان مەملەكەتتىڭ دە مۇمكىندىگى مول. مۇنداي جارقىن كورىنىستەردىڭ قازاقستان مەن ەستونيانىڭ اراسىن ودان سايىن جاقىنداتا تۇسەتىنى كۇمانسىز.
قازاقستان – ەستونيا ءۇشىن ازياعا اشىلعان قاقپا. وعان ناقتى مىسال رەتىندە ەكى ەل اراسىنداعى كولىك-لوگيستيكا سالاسىندا ورناعان تەرەڭ ءارىپتەستىكتى ايتار ەدىم. ءوز كەزەگىندە قۇرلىقارالىق قاتىناستى جانداندىرۋ باعىتىندا كولىك ءدالىزىن قۇرۋ ارقىلى قازاقستانمەن بايلانىسىمىز تەرەڭدەي تۇسەتىن بولادى.
دەنيس بوروديچ,
ەستونيانىڭ ريگيكوگۋ (پارلامەنت) دەپۋتاتى, قازاقستانمەن ارىپتەستىك جونىندەگى پارلامەنتتىك توپتىڭ جەتەكشىسى
