سوعان وراي, توتەنشە جاعدايلاردىڭ الدىن الۋ شارالارى دا بەلسەندىلىكپەن جۇرگىزىلۋدە. مۇنى وسى ماقساتقا 900 ميلليون تەڭگەدەن استام قارجى قاراستىرىلعانىنان بايقاۋعا بولادى. اتقارىلعان جۇمىستار اۋقىمدى ءارى ۇنەمى باقىلاۋدا ۇستالۋدا.
سەنبى كۇنى وبلىس اكىمى مالىك مىرزالين, ىشكى ىستەر ۆيتسە-مينيسترى يۋري يلين جانە اتالعان مينيسترلىكتىڭ توتەنشە جاعدايلار كوميتەتىنىڭ توراعاسى ۆلاديمير بەككەر جاعدايدى تىكۇشاق ارقىلى بايقاپ شىقتى. شاعالالى, استانا, ءبىرسۋات سۋ قويمالارىن تەكسەرىسكە العان ولار اتباسار اۋدانىندا كەڭەس وتكىزدى.
«ءبىز بۇگىن سۋ تاسقىنى بولۋى مۇمكىن التى اۋدان ايماعىن اۋەدەن باقىلاپ شىقتىق, – دەدى اقمولا وبلىسىنىڭ اكىمى م.مىرزالين. – قاردىڭ كوپ ءتۇسۋى جانە ىلعالدىڭ مول قورلانۋى سالدارىنان اتباسار, استراحان, ارشالى جانە تسەلينوگراد اۋداندارىندا كۇردەلى جاعداي ساقتالىپ وتىر. توتەنشە جاعدايلارعا دايىندىق جامان ەمەس. تابيعي اپاتتىڭ الدىن الۋ شارالارى جازعى-كوكتەمگى ماۋسىمنان بەرى تياناقتى ءجۇرگىزىلىپ كەلەدى. وبلىستىڭ بارلىق ايماقتارىندا ينجەنەرلىك جۇمىستار كەشەنى اتقارىلدى. ال اتباسار قالاسىنداعى جاباي وزەنى جاعالاۋىندا 9,5 شاقىرىمدىق مىقتى بوگەت سالىندى».
سونداي-اق, 12 شاقىرىمدىق كانال تازارتىلىپ, 32 شاقىرىمدىق اۋماقتا جوندەۋ جۇمىستارى اتقارىلعانى, توعاندار نىعايتىلىپ, كۇشەيتىلگەن 13 سۋاعار سالىنعانى ءمالىم بولدى. وزەندەردىڭ قاۋىپتى تەلىمدەرىندە مۇزدى جارۋ جۇمىستارى جۇرگىزىلدى. الدىن الا جۇمىس جوسپارىنا سايكەس, 23,7 مىڭ توننا ينەرتتى ماتەريالدار دايىندالىپ, 102 مىڭ دانادان استام قاپ, 268,3 توننا جانار-جاعارماي جانە 16,7 توننا ازىق-ت ۇلىك تاۋارلارى دايىندالعان. ەلدى مەكەندەردەن 850 مىڭ تەكشە مەتر قار شىعارىلسا, جول بويى قىزمەتى سۋاعارلار مەن كوپىرلەردى تازالاۋدى اياقتاپ كەلەدى.
ىقتيمال تابيعي اپاتپەن كۇرەسكە 2 588 ادام, 1 220 دانا تەحنيكا مەن 66 سۋدا ءجۇزۋ قۇرالى جۇمىلدىرىلاتىن بولادى. بۇعان قوسا, اۆاريالىق-قۇتقارۋ جۇمىستارىن جۇرگىزۋگە ىشكى ءىستەر ورگاندارى تاراپىنان 485 كىسى, 103 تەحنيكا مەن 5 قايىق قاتىستىرىلماق. ايماقتاعى گيدروبەكەتتەر تاۋلىك بويى كەزەكشىلىك اتقارادى. قاجەتتى جاعدايلار تۋىنداعاندا, قوسىمشا كۇشتەر جۇمىلدىرىلىپ, ادامداردى, مالدى كوشىرۋ, ورنالاستىرۋ ماسەلەلەرى تياناقتالعانى ايتىلدى.
وبلىس باسشىسى باستاعان توپ اتباسار قالاسىنداعى وزەن بويىنداعى جاڭا بوگەت قۇرىلىسىنىڭ ساپاسىن تەكسەرىپ, ارنايى تەحنيكالاردىڭ ازىرلىگىمەن تانىستى جانە جەرگىلىكتى شتاب ءمۇشەلەرىمەن, ەرىكتى كومەكشىلەر قۇرامىمەن اڭگىمەلەستى. سونداي-اق, اۋدان اكىمى اندرەي نيكيشوۆتىڭ, وبلىستىق توتەنشە جاعدايلار دەپارتامەنتىنىڭ باسشىسى الەكسەي سوۆەتوۆتىڭ ەسەبى تىڭدالدى.
– ءبىز سۋ تاسقىنىنا قاتىستى كۇندەلىكتى عارىشتىق مونيتورينگ جاساۋدامىز, – دەدى ا.سوۆەتوۆ. «قازگيدرومەتتىڭ» دەرەكتەرى بويىنشا وبلىسىمىزدىڭ باسىم بولىگىندە قار جامىلعىسىنىڭ قالىڭدىعى بىلتىرعى جىلعىدان 1,2-1,6 ەسە جوعارى. اتباسار ءوڭىرىندەگى اناعۇرلىم قاۋىپتى سيپاتتاعى جاباي, كولۋتون وزەندەرىندە 5 ساۋىردەن سەڭ جۇرە باستايدى دەپ كۇتىلۋدە. بارلىق ايماقتا تۇرعىنداردى شۇعىل تۇردە قونىس اۋدارۋعا مۇمكىندىك بەرەتىن 200 شتاب قۇرىلىپ وتىر. سونداي-اق, سامارقان, ىنتىماق, شەرۋباي, شاعالالى قويمالارىنان سۋدى بوساتۋ جانە ونىڭ قورىن قالىپتاستىرۋ ماسەلەلەرى سۋ رەسۋرستارى كوميتەتىمەن كەلىسىلۋدە. قازىر وڭىردە 45 مەتەوستانسا, 37 گيدروبەكەت جانە 21 اگرومەتەوبەكەت جۇمىس ءىستەۋدە. ارنايى رەيدتەر كەزىندە اۋىل تۇرعىندارىمەن كەزدەسۋلەردە جان-جاقتى تۇسىنىك جۇمىستارى جۇرگىزىلدى.
مەملەكەتتىك ورگاندار تاراپىنان دا كوكتەمگى سۋ تاسقىنىنا قاتىستى ماسەلەلەر قاتاڭ باقىلاۋدا ۇستالىپ وتىرعانىن ايتۋ قاجەت. جۋىردا قازاقستان پرەزيدەنتىنىڭ اكىمشىلىگى جالپى ءماسەلەلەر ءبولىمىنىڭ ينسپەكتورى عالىم ءاۋشارىپ باستاعان توپ ارشالى اۋدانىنداعى «بەزىمياننايا» سۋ قويماسىنىڭ جۇمىسىمەن تانىسىپ, اۋدان اكىمى ازامات تايجانوۆتىڭ حابارلاماسىن تىڭدادى.
اۋا رايىن بولجاۋ ستانساسىنىڭ حابارلاۋىنشا, اقمولا وبلىسىندا ناۋرىز ايىنداعى تەمپەراتۋرا قالىپتى دەڭگەيدە بولعان, ال ساۋىردە اۋانىڭ تەمپەراتۋراسى كۇندىز 16-17 گرادۋسقا كوتەرىلمەك. ياعني, ساۋىردە سىن ساعاتتارى باستالماق. ال ماسەلەلەردىڭ كەشەندى سيپاتتا شەشىلىپ جاتقاندىعى ءتوتەنشە جاعدايلارعا جول بەرىلمەيتىندىگىنە سەنىم قالىپتاستىرادى.
باقبەرگەن امالبەك,
جۋرناليست
اقمولا وبلىسى
