سۋ تاسقىنى احۋالىنا دەن قويۋ جوسپارلارى ازىرلەنىپ, ءوزارا ءىس-قيمىل جوسپارلارى بەكىتىلگەن. حالىقتى ەۆاكۋاتسيالاۋ جاعدايىنا ساي 1707 قابىلداۋ پۋنكتى دايىندالىپ, قاجەتتى كولىكتەر شىعارىلعان. ەۆاكۋاتسيالاناتىن حالىقتىڭ تۇرمىس-تىرشىلىگىن قامتاماسىز ەتۋ ءۇشىن اكىمدىكتەر قاجەتتى قۇرالداردى دايارلاپ, ازىق-ت ۇلىك ءونىمدەرى مەن اۋىز سۋ قورىن ازىرلەپ قويىپتى. وعان قوسا, قازىرگى كۇندەرى وڭىرلەردە ەلدى مەكەندەر اراسىندا رەيدتەر, سۋ تاسقىنى كەزىندە ءتيىستى ءىس-قيمىلدار قاعيدالارى بار جادىنامالار تاراتىلا وتىرىپ, حالىقپەن ءتۇرلى جيىندار بەلسەندى تۇردە جۇرگىزىلىپ جاتقان كورىنەدى.
كوكتەمدەگى قىزىل سۋدىڭ كوزى نەگىزىنەن قىس بويى تۇسكەن قاردىڭ ەرۋىنەن بولاتىندىعى بەلگىلى. سوعان وراي ەلدى مەكەندەردەن 14 ملن م3-دەن استام قار شىعارىلعان. سول سياقتى, مۇز كەپتەلۋىنىڭ تۋىنداۋىنىڭ الدىن الۋ ءۇشىن جاباي, نۇرا (اقمولا وبلىسى), ءۇبى (شقو), سىرداريا (قىزىلوردا) وزەندەرىندە جارۋ جۇمىستارى اتقارىلىپ قويىلسا, اقمولا وبلىسىندا سۋ تاسقىنى بولۋى ىقتيمال ءارى بولىپ قالسا قاۋىپ توندىرەتىن اتباسار اۋدانىندا ەلدى مەكەندەردى قورعاۋ بويىنشا ءىس-شارالار كەشەنى جۇرگىزىلگەن.
اپات ايتىپ كەلمەيدى. سوندىقتان, ۇشاق ارقىلى باقىلاۋ ناتيجەسىندە جانە ءىىم قازگيدرومەتتىڭ دەرەكتەرىنىڭ, وتكەن جىلدارداعى سۋ باسقان ەلدى مەكەندەردى قورعاۋ بويىنشا ءىس-شارالاردى جۇرگىزۋ تۋرالى ءمالىمەتتەردىڭ, سۋ قويمالارىنىڭ تولۋى تۋرالى اقپاراتتىڭ نەگىزىندە ىقتيمال سۋ تاسقىنىنا الدىن الا بولجام جاسالدى. سوعان سايكەس بيىلعى كوكتەمدە سۋ تاسقىنىنىڭ تۋىنداۋ قاتەرى اقمولا, قاراعاندى, قوستاناي, قىزىلوردا, سولتۇستىك قازاقستان جانە وڭتۇستىك قازاقستان وبلىستارىندا باسىمداۋ ەكەنى انىقتالعان. ەگەر الدا-جالدا جاعداي كۇردەلەنسە, وندا ىشكى ىستەر مينيسترلىگىنىڭ جالپى سانى 12 مىڭ ادامنان تۇراتىن توپتارى, 2 مىڭعا جۋىق تەحنيكا جانە 300 ءجۇزۋ قۇرالى بار ارنايى كۇشتەرى مەن قۇتقارۋشىلارى ساقاداي-ساي دايىن.
الەكساندر تاسبولاتوۆ, «ەگەمەن قازاقستان»
