مەسسي «بارسەلونامەن» كەلىسىمشارتىن ۇزارتقانى ءۇشىن 40 ملن ەۋرو سىياقى الادى

يسپانيانىڭ «بارسەلونا» فۋتبول كلۋبى باس جۇلدىزى ليونەل مەسسيمەن كەلىسىمشارتىن ۇزارتقان جاعدايدا وعان قوسىمشا 40 ميلليون ەۋرو سىياقى بەرۋدى جوسپارلاپ وتىر. بۇل تۋرالى «ر-سپورت» باسىلىمى حابارلادى. ارگەنتينالىق شابۋلشىنىڭ قازىرگى كەلىسىمشارتى ءبىر جىلعا دەيىن جارامدى. جىلدىق جالاقىسى – 22,8 ميللين ەۋرو. وتكەن جىلدىڭ قازان ايىندا كاتالوندىق كلۋب ەسەپ بەرۋ كەزىندە كەلىسىم ۋاقىتىن ۇزارتقانى ءۇشىن ءۇش فۋتبولشىعا 64 ميلليون ەۋرو بونۋس تولەگەنىن مالىمدەگەن بولاتىن. بىراق ولاردىڭ ەسىمدەرى جاسىرىن كۇيدە قالعان. ال ءوز كەزەگىندە Mundo Deportivo باسىلىمى حاۆەر ماسكەرانو, سەرحيو بۋسكەتس جانە نەيمار ەكەنىن حابارلادى. بۇل تۇستا برازيليالىق شابۋىلشى 30 ميلليون ەۋرو الدى دەگەن اقپارات تا تاراعان. بۇعان دەيىن يسپانيانىڭ بىرنەشە باق وكىلدەرى كلۋبتىڭ مەسسيمەن 2022 جىلعا دەيىن كەلىسىم ۋاقىتىن سوزۋعا نيەتتى ەكەنىن جازعان. بۇل ءىس ورىن العان جاعدايدا 29 جاستاعى شابۋىلشى الەمدەگى جالاقىسى ەڭ جوعارى فۋتبولشى اتانباق. ايتا كەتەيىك, مەسسي مانسابىن ءدال وسى «بارسەلونادا» باستاعان. كاتالوندىقتاردىڭ ساپىندا سەگىز دۇركىن ەل چەمپيونى اتانسا, ءتورت مارتە يسپانيا كۋبوگىنا قول جەتكىزگەن. سونىمەن قاتار, ءتورت مارتە چەمپيوندار ليگاسىندا توپ جارسا, ءۇش رەتتەن ۋەفا سۋپەركۋبوگى مەن كلۋبتار اراسىنداعى الەم چەمپيوناتىندا جەڭىسكە جەتكەن بولاتىن