قازاق بوكسىنىڭ تاريحىندا ايشىقتى ءىز قالدىرعان بىلعارى قولعاپ شەبەرلەرىنىڭ ءبىرى, افينى-2004 وليمپياداسىنىڭ قولا جۇلدەگەرى سەرىك ەلەۋوۆ ۇلتتىق قۇراما كوماندادا بو-
لىپ جاتقان وزگەرىستەردى ءجىتى قاداعالاپ وتىرادى. بۇل كۇندە بوكس مەكتەبىنىڭ باسشىسى بولىپ قىزمەت ەتەتىن ماماننىڭ پىكىرى بوكسسۇيەر قاۋىم ءۇشىن قىزىقتى بولادى دەگەن ويدامىز.
«قالاي بولعان كۇندە دە, وزگەرىستەر جاقسىلىققا باستايدى دەپ سەنەمىن, – دەيدى سەرىك ەلەۋوۆ. – قازىرگى قۇرامادا تولىسقان تاجىريبە مەن جالىنداعان جاستىق ۇيلەسىم تاپقان. مەنىڭ
ويىمشا, قۇراماداعى كوشباسشى بوكسشىلار كەتكەنىمەن, ولاردىڭ ورنىن لايىقتىلار باسقانداي. الدا ۋاقىت بار – وليمپيالىق تسيكل ەندى باستالدى. ءبىزدىڭ بوكسشىلار ءالى-اق
وزدەرىن كورسەتەدى دەپ سەنەمىن».
– قۇراماداعى 81 كيلو سالماق دارەجەسىندە قىزىق جاعداي قالىپتاستى: ەكى مىقتى بوكسشىمىز – ءجانىبەك ءالىمحان ۇلى مەن ءادىلبەك نيازىمبەتوۆ كوشباسشىلىققا تالاسادى. ءسىزدىڭ ويىڭىزشا, ءدال وسىنداي باسەكەلەستىك بىزگە پايدالى ما؟
– باسەكەلەستىك – وسۋگە ىنتالاندىراتىن دۇنيە. بۇل جەردە مىقتىلاردى وكشەلەپ كەلە جاتقان جاستاردى دا ۇمىتپاۋىمىز كەرەك. قالاي بولعان كۇندە دە, جاتتىقتىرۋشىلار شىن مىقتىنى تاڭداپ الادى دەگەن ويدامىن. البەتتە, ۋاقىت بارىنە تورەشى.
– ءالىمحان ۇلى مەن نيازىمبەتوۆ اراسىنداعى جەكپە-جەكتىڭ قاي تۋرنيردە جانە قالاي ءوربيتىنىن ەلەستەتىپ كورۋگە بولا ما؟
– قيىن... ەكەۋى دە وڭقاي, حالىقارالىق جارىستاردان جيناعان مول تاجىريبەلەرى بار جانە دە ەكەۋىنىڭ دە تەحنيكالىق دەڭگەيى وتە جوعارى. دەلەبەنى قوزدىراتىن جەكپە-جەك بولادى دەپ ويلايمىن.
– ابىلايحان ءجۇسىپوۆتىڭ 69 كيلو سالماققا اۋىسقانى تۋرالى نە ايتاسىز؟
– بۇل دۇرىس جانە دە دەر كەزىندە قابىلدانعان شەشىم. ونىڭ جاسى ءوسىپ, سالماعى دا ارتىپ كەلەدى. تەحنيكالىق قابىلەتى جاعىنان دا ءجۇسىپوۆتىڭ قۇراماداعى ءبىرىنشى ءنومىر بولىپ بەكۋىنە مول مۇمكىندىگى بار. بىلتىرعى قازاقستان چەمپيوناتىندا ول بارلىق جەكپە-جەكتەرىن سەنىمدى وتكىزىپ, كوپشىلىكتى قۋانتتى. كوز الدىمىزدا ءوسىپ كەلەدى.
– اۋىر سالماقتاعى يۆان دىچكونى لايىقتى تۇردە كىم الماستىرا الادى دەپ ويلايسىز؟
– بۇل سالماقتا نامىستى قولدان بەرمەيدى دەگەن بىرقاتار بوكسشىلار بار. اتاپ ايتقاندا, قامشىبەك قوڭقاباەۆ, ولجاس بوقاەۆ, نۇرلان ساپارباي جانە تاعى باسقالار. راس, تاجىريبە مەن تۇراقتىلىق جاعىنان كەلگەندە يۆان دىچكوعا جەتەرى جوق. دەگەنمەن, جاستاردى تاجىريبە جيناۋى ءۇشىن سىنعا اياماي سالا بەرۋ كەرەك.
– ءىلياس سۇلەيمەنوۆتىڭ 56 كيلو سالماققا اۋىسقانى وزىنە پايدالى ما؟
– مەنىڭ ويىمشا, بۇل سالماق ونىكى ەمەس. قالاي بولعاندا دا, ول 52 كيلو سالماق دارەجەسىندە سەنىمدى ونەر كورسەتتى. اۋىرلاۋ سالماققا نە ءۇشىن اۋىسقانى مەن ءۇشىن تۇسىنىكسىزدەۋ. بۇل ەندى, ونىڭ وزىنە جانە جاتتىقتىرۋشىسىنا عانا ءمالىم دۇنيە. ال ازىرگە, بۇل سالماقتاعى كوشباسشى – قايرات ەراليەۆ.
– قۇراما كوماندادا جاڭا كاپيتان – ادىلبەك نيازىمبەتوۆ...
– ءبارى دۇرىس. ادىلبەك نيازىمبەتوۆ بۇل قۇرمەتكە لايىقتى ەكەنىن ءوزىنىڭ جەڭىستەرىمەن دالەلدەدى. ەكى وليمپيادا سىنىندا كۇمىس جۇلدە الۋ دەگەنىڭىز – ايتۋعا عانا وڭاي. ءتاجىريبەسى مول, قۇراماداعى جولداستارىنىڭ وعان دەگەن سەنىمى دە زور. ول كوماندانى العا باستاپ, ورگە سۇيرەيدى دەپ سەنەمىن.
– بيىل ۇلتتىق وليمپيادا كوميتەتى ءوزىنىڭ 25 جىلدىق مەرەيتويىن اتاپ وتەدى. ەلىمىزدىڭ باستى سپورتتىق ۇيىمى وسى ۋاقىت ارالىعىندا نە تىندىرا الدى دەپ ويلايسىز؟
– شيرەك عاسىر ۋاقىت ىشىندە قازاقستان سپورتى اياعىنا نىق تۇرىپ, حالىقارالىق ارەنادا تولايىم تابىستارعا قول جەتكىزدى. ۇلتتىق وليمپيادا كوميتەتى سپورتشىلاردى جاڭا بيىكتەردى باعىندىرۋعا ىنتالاندىرىپ, ارقاشان دا جان-جاقتى كومەك كورسەتىپ كەلەدى.
– اڭگىمەڭىزگە راحمەت.
اڭگىمەلەسكەن
قايرات ءابىلدينوۆ,
«ەگەمەن قازاقستان»
