«كوزىمنىڭ قاراسى» اتتى كىتاپتىڭ تۇساۋكەسەرى ءوتتى

  ت.جۇرگەنوۆ اتىنداعى قازاق ۇلتتىق ونەر اكادەمياسىندا وسى وقۋ ورداسىنىڭ «كوزىمنىڭ قاراسى» مادەني-تانىمدىق كلۋبى مەن «قازاقفيلم» كينو­ستۋ­دياسىنىڭ ۇيىمداستىرۋىمەن كينورەجيسسەر ساتىبالدى نارىمبەتوۆتىڭ «كوزىمنىڭ قاراسى» اتتى كىتابىنىڭ تۇساۋكەسەرى بولىپ ءوتتى. «كوزىمنىڭ قاراسى» كىتابى تەك كينو سالاسىندا عانا ەمەس, كوركەم پروزا جانرىندا دا ەڭبەكتەنىپ كەلە جاتقان قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى, تاۋەلسىز «تارلان» جانە فرانتسۋز كينوونەر اكادەمياسى جورج جانە ريتا سادۋل اتىنداعى جۇلدەسىنىڭ يەگەرى ساتىبالدى نارىمبەتوۆتىڭ اۆتورلىق الەمىن تەرەڭىرەك اشا تۇسەتىن تۋىندى. بۇدان بۇرىن دا رەجيسسەر-قالامگەردىڭ «تەنتەك» اتتى كىتابى, «اسسالاۋماعالەيكۋم, ات­لان­تي­دا!» اتتى پوۆەست, اڭگىمەلەر جيناعى جا­رىق كورگەن. جا­ڭا تۋىندىدا جازۋشىنىڭ ونەر الە­مى, ارىپتەستەرى تۋ­رالى, قوعام مەن رۋحانيات جايلى تول­عا­مدارى, ەسسەلەرى مەن ەستەلىكتەرى جانە ءارىپ­تەس­تەرىنىڭ اۆتور تۋرالى وي-تولعامدارى قامتىلعان. ونەر تۋرالى اسەرلى اڭگىمەلەر ايتىلعان كەشكە بەلگىلى قوعام قايراتكەرلەرى, شىعارماشىلىق زيالى قاۋىم وكىلدەرى, ستۋدەنتتەر قاتىستى. «ساتىبالدى نارىمبەتوۆ – بۇل قازىرگى قازاق كوركەمونەرىنىڭ بيىگىن, پاراساتىن, ءپالساپاسىن ايقىندايتىن ەسىمدەردىڭ ءبىرى. ونەرى الەمگە تانىمال, رەسمي دە, بەيرەسمي دە مويىندالعان, ءومىر ۇستانىمى, ءومىر سالتى, جالپى بولمىسىمەن سۋرەتكەرلىك تابيعاتتىڭ ماڭىزىن, ءمانىسىن اشا تۇسەتىن تۇلعا», دەيدى كىتاپتىڭ العىسوزىن جازعان بەلگىلى سىنشى, مادەنيەتتانۋشى, قازاقستاننىڭ ەڭبەك سىڭىرگەن قايراتكەرى ءاليا بوپەجانوۆا. ايگۇل احانبايقىزى, «ەگەمەن قازاقستان» الماتى