«بارسەلونانىڭ» باس باپكەرى قىزمەتىنەن كەتەتىن بولدى

«بارسەلونا» فۋتبول كلۋبىنىڭ باس جاتتىقتىرۋشىسى لۋيس ەنريكە ماۋسىم سوڭىندا قىزمەتىنەن كەتەتىن بولدى. بۇل تۋرالى ول يسپانيا بىرىنشىلىگىنىڭ 25-تۋرىندا «سپورتينگ» كومانداسىن 6:1 ەسەبىمەن جەڭگەن ماتچتان كەيىن مالىمدەدى, دەپ حابارلادى eurosport.ru. «كەلەسى ماۋسىمدا «بارسەلونادا» جۇمىس ىستەمەيتىنىمدى ايتقىم كەلەدى. ماۋسىم سوڭىندا كەلىسىمشارتىمنىڭ مەرزىمىن ۇزارتپايتىن بولدىم. قازىر وسى شەشىمىمدى ايتاتىن ۋاقىت كەلگەن سياقتى. باسشىلىق ماعان مۇنداي شەشىم قابىلداۋدا اسىقپاۋىمدى ءوتىندى. بىراق ماعان ازداعان ءۇزىلىس كەرەك, دەمالعىم كەلەدى. سول ءۇشىن كلۋبتان كەتۋدى جوسپارلاپ وتىرمىن. كوماندا باسشىلىعىنىڭ سەنىمىنە, فۋتبولشىلاردىڭ كاسىبيلىگىنە, جانكۇيەرلەردىڭ قولداۋىنا العىسىمدى بىلدىرەمىن», – دەدى ەنريكە. لۋيس ەنريكە كاتالوندىق كلۋبقا 2014 جىلدىڭ مامىر ايىندا كەلگەن. ونىڭ باستاۋىمەن كوماندا العاشقى ماۋسىمىندا-اق يسپانيا چەمپيوناتىندا, يسپانيا كۋبوگىندا, چەمپيوندار ليگاسىندا توپ جاردى. سونداي-اق, ۋەفا سۋپەركۋبوگىنا قول جەتكىزگەن. جىل سوڭىندا كلۋبتار اراسىنداعى الەم چەپيوناتىن ۇتىپ الدى. 2015/2016 ماۋسىمىندا لا ليگا مەن ەل كۋبوگىندا جەڭىسكە جەتتى. ال چەمپيوندار ليگاسىنىڭ شيرەك فينالىندا ەكى ماتچتىڭ قورىتىندىسى بويىنشا «اتلەتيكوعا» ەسە جىبەرگەن بولاتىن. بيىل كاتالوندىق ۇجىم يسپانيا كۋبوگىنىڭ فينالىنا جولداما الدى. اقتىق سىندا بۇل جۇلدەنى «الاۆەسپەن» ساراپقا سالادى. ال چەمپيوندار ليگاسى 1/8 فينالىنىڭ العاشقى ويىنىندا «پاري سەن جەرمەننەن» 0:4 بولىپ ۇتىلدى. ەل بىرىنشىلىگىندە 25 ويىندا 57 ۇپاي جيناپ, ازىرگە كوش باستاپ كەلەدى.