قازاقستاندىق كلۋبتار الدا كەلەدى

جوعارى حوككەي ليگاسىنداعى پلەي-وفف سىنىندا ونەر كورسەتىپ جۇرگەن قازاقستاندىق قوس كلۋب سىرت ايدىندا وزدەرىنىڭ ءۇشىنشى كەزدەسۋلەرىن وتكىزدى. تۇراقتى چەمپيوناتتىڭ جە­ڭىمپازى – وسكەمەننىڭ «تورپەدو» كومانداسى يجەۆسكىدە «يجستال» كلۋبىمەن كۇش سىناسىپ, 2:3 ەسەبىمەن ۇتىلىپ قالدى. بۇل ويىندا ءبىرىنشى شايبانى ايدىن يەلەرى سالدى. ماتچتىڭ 13-مينۋتىندا كيريلل كنيازەۆتىڭ سوققىسى دىتتەگەن جەرىنە ءدال تيگەن ەدى. بۇدان كەيىن كەزدەسۋدىڭ 16-شى جانە 25-ءشى مينۋتتارىندا «ءيجستالدىڭ» شابۋىلشىسى دەنيس پوليۋدوۆ قاتارىنان ەكى گول سوعىپ, ەسەپتى 3:0-گە جەتكىزدى. «تورپەدونىڭ» قۇرامىنان كونستانتين رومانوۆ (39-ءشى مينۋت) پەن الەكساندر شين (41-ءشى مينۋت) ەسەپ ايىرماشىلىعىن قىسقارتقانىمەن, ويىن 3:2 بولىپ ايدىن يەلەرىنىڭ پايداسىنا شەشىلدى. قاراعاندىنىڭ «سارىارقاسى» چەحوۆ قالاسىندا جەرگىلىكتى «زۆەز­دامەن» ويناپ, 1:0 ەسەبىمەن جەڭىسكە جەتتى. ميحايل ءانيسيننىڭ كەزدەسۋدىڭ 21-مينۋتىندا سوققان جالعىز شايباسى ارقا حوككەيشىلەرىنە جەڭىس سىيلادى. ازىرگە «تورپەدو» مەن «سارى­ارقا» ويىندار سەرياسى بويىنشا 2:1 ەسەبىمەن الدا كەلەدى. ەسكە سالار بولساق, پلەي-وفف ەرەجەسى بويىنشا, ءتورت رەت جەڭىسكە جەتكەن كوماندا جارىستىڭ كەلەسى كەزەڭىنە شىعادى. قايرات ءابىلدينوۆ, «ەگەمەن قازاقستان»