ءبىلىم بەرۋدىڭ جاڭا كوكجيەگى

قازاقستان رەسپۋبليكاسىنىڭ تۇڭ­عىش پرەزيدەنتى نۇرسۇلتان ءابىش ۇلى نازارباەۆ ەل تاۋەلسىزدىگىنىڭ العاشقى كۇنىنەن باستاپ ءبىلىم بەرۋ سالاسىنا ەرەكشە كوڭىل ءبولىپ كەلەدى. ءبىلىم مەن عىلىمدى تەرەڭ يگەرگەن ەل عانا الەمدىك باسەكەلەستىككە توتەپ بەرە الاتىنىن باستى نازارعا العان مەملەكەت باس­شىسى تاۋەلسىزدىكتىڭ 25 جىلى ءىشىن­دە قازاق­ستان­دىق ءبىلىمدى حالىقارالىق ستان­دارت­تارعا جاقىنداتۋ, سايكەستەندىرۋ ءۇشىن قانشاما تەر توككەنى بىزگە جاقسى ءمالىم. ەلباسىنىڭ بيىلعى «قازاقستاننىڭ ءۇشىنشى جاڭعىرۋى: جاھاندىق باسەكە­لەستىك­كە قابىلەتتىلىك» تاقىرىبىنداعى جولداۋى دا ءبىلىم سالاسىن اينالىپ وتپەدى. قازاقستان دامۋىنىڭ ءۇشىنشى كەزەڭىندە ەلدىڭ جاھاندىق باسەكەگە قابىلەتتىلىگىن قامتاماسىز ەتەتىن ەكونوميكالىق ءوسىم­نىڭ جاڭا مودەلىن قالىپتاستىرۋ قاجەت­تىگى تۋىنداپ وتىرسا, ەكونوميكامەن قاتار, ونىڭ نەگىزگى تىرەگى بولىپ تابىلاتىن ادامي كاپيتال ساپاسىن جاقسارتۋ, مۇنىڭ ىشىندە ءبىلىم بەرۋ جۇيەسىن تۇبەگەيلى جاڭارتۋ ماسەلەسى ءسوز بولعانى وسى ويىم­نىڭ دالەلى. «ءبىزدىڭ مىندەتىمىز – ءبىلىم بەرۋدى ەكونوميكالىق ءوسۋدىڭ جاڭا مودەلى­نىڭ ورتالىق بۋىنىنا اينالدىرۋ», دەگەن ەلباسى وقىتۋ باعدارلامالارىن, وقۋشى­نىڭ سىني ويلاۋ قابىلەتىن جانە ءوز بەتىمەن ىزدەنۋ داعدىلارىن دامىتۋعا باعىتتاۋ قاجەتتىگىن, اقپاراتتىق-كوم­مۋنيكاتيۆتىك تەحنولوگياعا نەگىزدەل­گەن ءبىلىمدى, قارجىلىق ساۋاتتىلىقتى قالىپ­تاستىرۋعا, ۇلتجاندىلىق قاسيەتتى دامىتۋعا باسا كوڭىل ءبولۋ كەرەكتىگىن اتاپ كور­سەتتى. شىن مانىندە, اقپاراتتىق-كوم­مۋ­نيكاتيۆتىك بىلىممەن قارۋلانعان ءوز ەلىن سۇيەتىن ۇلتجاندى, شىنايى پات­ريوت ۇرپاق تاربيەلەۋ ۇلت بولاشاعى­نىڭ كەپىلى دەسەك, ەلباسىنىڭ ءبىلى­م­دى, باسەكەگە قابىلەتتى وتانشىل جاستار­دى قالىپتاستىرۋ تۋرالى ۇسىنىسى وتە ورىندى دەر ەدىك. ويتكەنى, جالپى ءبىلىم بەرەتىن مەكتەپتەر الداعى ۋاقىتتا ۇلتجاندى ۇرپاق تاربيەلەۋ ءۇشىن ايانباي ەڭبەك ەتۋى كەرەك. جولداۋدىڭ ءبىلىم سالاسىنا قاتىس­تى تاراۋىندا ءۇش ءتىلدى وقىتۋعا دا كەزەڭ-كەزەڭمەن كوشۋ ماسەلەسى ءسوز بولدى. «قازاق ءتىلىنىڭ باسىمدىعى ساقتالادى. ونىڭ ءارى قاراي دامۋىنا زور كوڭىل بولىنەدى. سونىمەن قاتار, بۇگىندە اعىل­شىن ءتىلى – جاڭا تەحنولوگيا, جاڭا يندۋس­تريا, جاڭا ەكونوميكا ءتىلى. قازىرگى كەزدە 90 پايىز اقپارات اعىلشىن تىلىندە جاريالانادى. اعىلشىن ءتىلىن مەڭگەرمەي, قازاقستان جالپىۇلتتىق پروگرەسكە جەتە المايدى. 2019 جىلدان باستاپ 10-11-سىنىپتاردا كەيبىر پاندەردى اعىلشىن تىلىندە وقىتاتىن بولامىز», دەگەن ەلباسى ۇشتىلدىلىك ماسەلەسىن تاعى دا نازارعا سالادى. باقتيار سمانوۆ, ۇعا كوررەسپوندەنت-مۇشەسى, پەداگوگيكا عىلىمدارىنىڭ دوكتورى, پروفەسسور