استاناداعى بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ العىس ايتۋ كۇنىنە ارنالعان فورۋمى ءوتتى. وعان مەملەكەتتىك حاتشى گۇلشارا ابدىقالىقوۆا, قحا توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, سونداي-اق, مەملەكەتتىك ورگانداردىڭ باسشىلارى, قحا مۇشەلەرى, ەتنومادەني جانە جاستار بىرلەستىكتەرىنىڭ, انالار كەڭەسىنىڭ, قوعامدىق كەلىسىم كەڭەسىنىڭ, عىلىمي-شىعارماشىلىق زيالى قاۋىمنىڭ وكىلدەرى, حالىقتىڭ ءداستۇرلى قولونەر شەبەرلەرى, مەتسەناتتار, جاستار قاتىستى.
فورۋمدى اشقان مەملەكەتتىك حاتشى: «بىرلىگى جاراسىپ, ىنتىماعى ارتقان تاۋەلسىز قازاقستاندا العىس ايتۋ كۇنى ەل ومىرىندەگى ەلەۋلى داتاعا اينالدى», دەي كەلە, اتالعان مەرەكەگە بايلانىستى قازاقستان پرەزيدەنتىنىڭ حالىققا ارناعان قۇتتىقتاۋىن وقىپ بەردى.
ەلباسى ءوزىنىڭ قۇتتىقتاۋ سوزىندە: «العىس ايتۋ كۇنى – ءبىزدىڭ مەملەكەتتىك جانە قوعامدىق كۇنتىزبەمىزدە جاقىندا عانا پايدا بولعان ەرەكشە كۇن. الايدا, بۇل مەرەكە شىن مانىندە تەرەڭ تاريحي ىرگەتاسقا نەگىزدەلگەن. ول ادامنىڭ بويىنداعى ەڭ اسىل قاسيەتتەر – مەيىرىمدىلىك, راقىمدىلىق, ءوزارا قولداۋ-كومەك, ءوزىن ءوزى قۇربان ەتۋ بارىنشا كورىنىس تاپقان الماعايىپ زاماندى ەسكە سالادى. العىس ايتۋ كۇنىن اتاپ وتە وتىرىپ ءبىز, ءبىر جاعىنان, حالقىمىزدىڭ رۋحاني قاھارماندىعىنا قۇرمەت كورسەتىپ, وتكەنگە كوز جۇگىرتەمىز. ال, ەكىنشى جاعىنان, ادامگەرشىلىكتىڭ اينىماس نەگىزدەرى ارقىلى جول تارتىلعان بولاشاققا زور سەنىممەن قارايمىز», – دەگەن.
سونىمەن قاتار, مەملەكەت باسشىسىنىڭ قۇتتىقتاۋىندا: «مەن تاۋەلسىز ەلىمىزدى بىرلەسىپ قۇرىپ جاتقان قازاقستان حالقىنا ىنتىماعى مەن ەرىك-جىگەرى ءۇشىن العىس ايتامىن. قايىرىمدىلىق پەن ءوزارا كومەك كورسەتۋ ءداستۇرىنىڭ ودان ءارى نىعايا تۇسەتىنىنە سەنىمدىمىن. العىس ايتۋ كۇنىمەن بارشاڭىزدى شىن ءجۇرەكتەن قۇتتىقتايمىن! بارشاڭىزعا باقىت, وتباسىلارىڭىزعا يگىلىك, دوستىق پەن ءوسىپ-وركەندەۋ تىلەيمىن!», – دەلىنگەن.
بۇدان كەيىن قازاقستان حالقى اسسامبلەياسى توراعاسىنىڭ ورىنباسارى ە.توعجانوۆ, «الەف» ەۆرەي مادەني-اعارتۋ قوعامىنىڭ جەتەكشىسى م.گولدبەرگ, قازاقستان كورەيلەرى قاۋىمداستىعىنىڭ وكىلى ا.يۋگاي ءوزارا تۇسىنىستىك پەن قولداۋ ەلىمىزدىڭ رۋحاني قاعيداتىنا اينالعانىن ايتتى. ماسەلەن, ەرالى توعجانوۆ وتكەن جىلى پرەزيدەنتتىڭ العىس ايتۋ كۇنىن مەرەكەلەۋ تۋرالى جارلىققا قول قويعانىنا توقتالا كەلە, 1 ناۋرىز – قازاقستان حالقى اسسامبلەياسىنىڭ نەگىزى قالانعان كۇن ەكەنىن دە اتاپ ءوتتى. «العىس ايتۋ – ادامگەرشىلىكتىڭ بەلگىسى. ونىڭ وزەگىندە قايىرىمدىلىق, مەيىرىمدىلىق, وزگەگە قولۇشىن سوزۋ, شىن جاناشىرلىق تانىتۋ سەكىلدى ىزگى قاسيەتتەر جاتىر. دەمەك, وسىناۋ ەرەكشە كۇننىڭ ازاماتتاردى بىرىكتىرۋدەگى الەۋەتى وراسان», – دەدى قحا توراعاسىنىڭ ورىنباسارى – حاتشىلىق مەڭگەرۋشىسى.
ال قازاقستان كورەيلەرى قاۋىمداستىعىنىڭ وكىلى الەكساندرا يۋگاي: «بيىل كورەي ۇلتىنىڭ كيەلى قازاق جەرىنە تابان تىرەگەنىنە 80 جىل تولدى. وسى جىلدار ىشىندە بىزگە كورسەتكەن ىقىلاس-نيەتتەرىڭىز ءۇشىن اتا-بابامىزدىڭ اتىنان باس يە وتىرىپ, قازاق ەلى مەن جەرىنە العىس ايتامىن. اعا بۋىن وكىلدەرىنىڭ ارقايسىسىنىڭ جۇرەك تۇكپىرىندە: «قازاق ەلىنە مىڭ العىس!» دەگەن ءسوز بار دەپ ويلايمىن. سوندىقتان, 1 ناۋرىز – قازاقستاندى مەكەندەگەن ءاربىر ازاماتقا ءوز وتانىنا العىس ءبىلدىرۋىنە مۇمكىندىك بەرەتىن ماڭىزدى كۇن. بۇل – جىلىلىق پەن مەيىرىمدىلىك مەرەكەسى», – دەدى.
فورۋمعا قاتىسۋشىلار قازاقستاننىڭ ساندىك-قولدانبالى ونەر شەبەرلەرىنىڭ كيىزدەن جاساعان بۇيىمدارى قويىلعان «جان جىلۋى» اتتى ەكسپوزيتسيالىق كورمەنى تاماشالادى. ال ءىس-شارا سوڭىندا اسسامبلەيانىڭ جاڭا مۇشەلەرىنە قازاقستان حالقى اسسامبلەياسى كۋالىكتەرىن سالتاناتتى جاعدايدا تابىس ەتۋ ءراسىمى ءوتتى, سونداي-اق حالىققا جانە ەل پرەزيدەنتىنە العىس ءبىلدىرگەن ۇندەۋ قابىلداندى.
ءلايلا ەدىلقىزى, «ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
