بيلىك پەن ازاماتتىق قوعام جاۋاپكەرشىلىگى ارتقانىنىڭ بەلگىسى

وكىلەتتىكتەردى بيلىك تارماقتارى اراسىندا قايتا ءبولۋ تۋرالى اڭگىمە شىققالى بەرى قازاق قاۋىمى قازاقستان رەسپۋبليكاسىنىڭ كونستيتۋتسياسىنا ەنگىزىلەتىن وزگەرىستەر جوباسىن تالداۋ-تالقىلاۋلاردى قىزۋ جۇرگىزدى. كۇنى كەشە اقوردادا وسى ماسەلە جونىندەگى جۇمىس توبىنىڭ قورىتىندى وتىرىسى ءوتتى. ءبىز اتالعان ماسەلەگە بايلانىستى بەلگىلى ساياساتتانۋشى ايدوس سارىمعا جولىعىپ, ءبىر-ەكى سۇراق قويعان بولاتىنبىز. – پرەزيدەنتتىڭ اقورداداعى جۇمىس توبىمەن كەشەگى وتكىزگەن قورى­تىندى وتىرىسقا قاتىستى ءسىزدىڭ پىكىرىڭىزدى بىلسەك دەپ ەدىك. – جالپى, ەلىمىزدەگى م ۇلىك ماسەلە­سىنە, ونىڭ ۇستىنە, وتكەن جىل­عى جەر ماسەلەسىنە قاتىستى ميتينگى­لەر­دىڭ اسەرى بولار, ەلىمىزدە ءبىراز الاڭ­داۋ­شىلىق, ءتىپتى, ءبىراز تولقۋ دا بول­دى. بىرقاتار بەدەلدى ازاماتتار قىز­دى-قىزدىمەن قاتتى-قاتتى اڭگىمە­لەر دە ايتىپ قالدى. اسىقپاي وتكىزىل­گەن قوعامدىق تالقىلاۋلاردىڭ بارى­سىن, بارلىق جاعدايىن ەسكەرىپ, كۇنى كەشە ەلباسىمىز – قازاقستان رەسپۋب­ليكا­سى­نىڭ تۇڭعىش پرەزيدەنتى نۇرسۇلتان نازارباەۆ بۇل ماسەلەنى ودان ءارى قوزعاۋدىڭ قاجەتى جوق, 26-باپ بۇرىنعى نۇسقاسىندا قالسىن دەپ, وزگەرىس ەنگىزبەۋدى ۇسىندى. بۇل – ءبىزدىڭ ەلىمىزدەگى ازاماتتىق قوعامنىڭ, زيالى قاۋىمنىڭ پىكىرىنە, الاڭداۋشىلىعىنا ءتۇسىنىس­تىكپەن قاراپ, ناقتى رەاكتسيا بەرۋ, ءۇن قاتۋ دەپ ويلايمىن. جانە دە بۇل بيلىكتىڭ دە, ازاماتتىق قوعامنىڭ دا جاۋاپكەرشىلىگىنىڭ ۋاقىت تالابىنا ساي ارتقانىنىڭ بەلگىسى دەر ەدىم. – ءسىز ساياساتتانۋشى رەتىندە وسى ساياسي تالقىلاۋ باستالعان كەزەڭنەن بەرگى ۋاقىتتا ونىڭ قورىتىندىسى قانداي بولادى دەگەن ويدا ءجۇر ەدىڭىز؟ – نەگىزى, بۇكىل ماسەلە, تالاپ ەتىل­­­گەن كونس­­تيتۋتسيالىق وزگەرىستەر تۋرا­­لى اڭگىمە بيلىك وكىلەتىكتەرىنىڭ ءتيىس­تى تار­ماقتارىنا قاتىستى بول­دى ەمەس پە؟! قالعان باپتارى بۇرىنعى قازاقستان رەسپۋبليكاسى كونستيتۋتسياسىنىڭ 1995 جىلعى رەفەرەندۋمدا قابىل­دانعان كۇيىندە قالماق دەگەن ءسوز. تالقىلاۋ كەزىندە ەلدىڭ نازارى «اركىم» دەگەن سوزگە اۋىپ, ونىڭ كولەڭكەسىندە شەتەلدىكتەرگە دەگەن ويدىڭ استاسقانى راس. جەر جانە باسقا دا ماسەلەلەرگە تۇپكى­لىكتى ەكونوميكالىق ماسەلە شەشىل­مەي بارۋدىڭ ەرتە ەكەندىگى دە بۇعان دەيىن سان رەت ايتىلدى. مورا­توري قويىلدى. سول سەبەپتى دە, حالىق­تىڭ ىشىندە, قوعامدىق ورتادا وسى­دان سوڭ دا بيلىك سول بۇرىنعى اڭگى­مە­سىن قايتادان باستاپ كەتە مە دەگەن قورقىنىشتىڭ بولعانى دا اقيقات. پرەزيدەنتتىڭ كەشەگى جۇمىس توبىمەن بولعان باسقوسۋىندا مۇنىڭ بارلىعىنا ناقتى جاۋاپ بەرىلدى دەپ ويلايمىن. ەندىگى جەردە بارلىق ماسە­لە بيلىكتىڭ وكىلەتتىكتەرىنە جانە ونىڭ باسقا دا سالالاس تارماقتارىنا قاتىستى بولادى. – اڭگىمەڭىزگە راحمەت. اڭگىمەلەسكەن تالعات ءسۇيىنباي, «ەگەمەن قازاقستان» الماتى