ءاربىر ونەر ادامىنىڭ ءوز الەمى بولادى دەسەك, سۋرەتشى تابىلدى مۇقاتتىڭ الەمى وزگەشە سىرشىلدىعىمەن, نە مۇڭعا, نە شاتتىققا شۇپىلدەپ تولىپ تۇرۋىمەن ءتانتى ەتەرى انىق. بۇل ەرەكشەلىك ونىڭ اقىنجاندىلىعىمەن استاسىپ, سول ءبىر كىرشىكسىز تۇما بۇلاقتان تامىر تارتقان دەر ەدىك.
نارىن قۇمىنىڭ قاق ىشىندەگى اۋىلدان الپىسىنشى جىلداردىڭ ورتاسىندا ارمان قۋىپ الماتىعا جەتكەن بوزبالا كوز الدىمىزعا كەلەدى.
سۋرەتشىنىڭ كوركەمسۋرەت ۋچيليششەسىن تامامداعان كەزدەگى جاستىق جالىنىمەن ورىلگەن گرافيكالىق توپتامالارىندا تۋعان جەر, ونداعى سالت-داستۇرلەردى ساباقتاعان جانىنا جاقىن تاقىرىپ كورىنىس تاپتى. لۆوۆتاعى پوليگرافيكالىق ينستيتۋتتى بىتىرگەننەن كەيىن دە وسى تاقىرىپتى تەرەڭدەپ قاۋزادى.
تابىلدىنى وتكەن عاسىردىڭ 70-80-جىلدارىندا داۋىرلەگەن قازاق كىتابىنىڭ باعىنا كەلگەن سۋرەتشى دەپ تە ايتا الامىز. قازاق پوليگرافيالىق سۋرەت ونەرىنىڭ العاشقى قارلىعاشتارىنىڭ ءبىرى. ول سول كەزدەردە «جازۋشى» باسپاسىنىڭ كوركەمدەۋشى رەداكتورى بولا ءجۇرىپ, وسى سالاداعى مايتالمان ءارىپتەستەرى كارىم بەكەنوۆ, يساتاي يساباەۆ, باقىت ماشراپوۆپەن بىرگە كىتاپ بەزەندىرۋ ءىسىنىڭ وتىمەن كىرىپ, ك ۇلىمەن شىقتى. ءبىر ءوزى 500-گە جۋىق كىتاپتى بەزەندىرىپ, يلليۋستراتسيالىق سۋرەتتەرمەن ايشىقتاپ, مۇقابالارىن كوركەمدەدى. قازاقتىڭ نەبىر ايكول اقىندارىمەن, ايتۋلى جازۋشىلارىمەن كۇنبە-كۇن ءجۇزدەسىپ, پىكىرلەسىپ, قويان-قولتىق جۇمىس ىستەدى.
سۋرەتشىنىڭ دۇنيەنى ىستىقتاي قاۋىپ, ءسابي كوڭىلىمەن قابىلداۋى كەرەمەت. ءاربىر شىعارماسىنىڭ جەرىنە جەتكىزىلگەن مۇقياتتىلىعى – ۇلكەن تالعامنىڭ ايعاعى. تاعى ءبىر ەرەكشەلىگى, سۋرەتشىنىڭ سۇڭعاتتىق جانە گرافيكالىق كارتينالارىنان ادامدى تولقىتىپ-تولعاندىراتىن سازدى اۋەن شالقيتىنداي اسەر قالدىرادى. وسىلايشا, تابىلدى مۇقات بىرتە-بىرتە, قۇددى سيقىرلى ەرتەگىلەر ەلىندەگىدەي, مايلى بوياۋلار دۇنيەسىنىڭ ەسىگىن ايقارا اشىپ ەدى.
ءيا, پاليتراسى باي سۋرەتشى كەنەبىندەگى مايلى بوياۋعا جان ءبىتتى. ەندىگى جەردە ونىڭ جان سىرىن كوبىرەك تەربەگەن كارتينالارى الدەبىر كوڭىل تۇكپىرىنەن جەتكەن كۇرسىنىستەي, كەيدە ءبىر شۋاق شاشا سەبەزدەگەن كۇن ءساۋلەسىندەي, كوكىرەك كۇيىن قوزعاپ وياتقان سيقىرلى سىبىرداي اسەر ەتتى. ىشكى دراما, ءيىرىمدى پسيحولوگيا, ەتنوگرافيالىق كولوريت – ءبارى وسىندا دەرسىز. وسىعان ساي تاقىرىپ اۋقىمى دا كەڭ. وسى رەتتە تابىلدى كارتينالارىنىڭ سەزىمى كۇشتى, بوياۋى قالىڭ ەكسپرەسسيونيزمگە بەيىم تۇرۋى ونىڭ شىعارماشىلىعىنىڭ ەرەكشە مۇراتىن, ىزگىلىگىن تانىتادى. 200-گە تارتا تۋىندىلارىندا ۇستانعان تەمىرقازىق باعدارى دا وسى.
شاعىل قۇمنان شابىت العان, سەزىم مەن بوياۋدى قيىستىرعان, بۇگىندە جەتپىستىڭ جوتاسىنا شىققان سۇڭعىلا سۋرەتشىنىڭ «قۇمداعى قۇدىق», «شاعىلداعى بايگە», «قايران نارىن», «قاراشا ىنگەندى ساۋ», «قورقىت پەن اسان قايعى», «اقىندار», «جۋساعان جىلقىلار», «سۋات باسىندا», «باۋىرساق ءپىسىرىپ جاتقان ايەل» جانە باسقا ونداعان كارتينالارىنان تۋعان ەلىن سۇيگەن جۇرەكتىڭ تىنىمسىز ءدۇرسىلىن, شىنايى جان سىرلارىن كورەمىز. كورەمىز دە قۋانامىز, ويلانامىز. بۇل دا تابىلدى سۋرەتشىنىڭ اقىنجاندىلىعىنان تامىر تارتىپ جاتىر-اۋ...
قورعانبەك امانجول,
«ەگەمەن قازاقستان»
