ۇلتتىق مۋزەيدە «مۋزەي كىتاپحاناسىنا سىي تارتۋ» اكتسياسى ءوتتى

بۇگىن قر ۇلتتىق مۋزەيىندە «مۋزەي كىتاپحاناسىنا سىي تارتۋ» اكتسياسى ءوتتى. اكتسيا بارىسىندا ۇلتتىق مۋزەيدىڭ عىلىمي كىتاپحاناسىنا, تۇراقتى قولدانۋ ءۇشىن, تاريح, ارحەولوگيا, ەتنوگرافيا, مادەنيەتتانۋ, رەستاۆراتسيا, مۋزەيتانۋ جانە باسقا باعىتتار بويىنشا كىتاپتار, ماقالالار جيناعى, كونفەرەنتسيا ماتەريالدارى, مونوگرافيالار تابىس ەتىلدى. سونىمەن قاتار, اكتسياعا قاتىسىپ, مۋزەي كىتاپحاناسىنا سىي تارتۋ جاساعان مەكەمەلەر مەن جەكە ازاماتتارعا مۋزەي ديرەكتورىنىڭ العىس حاتى تاپسىرىلدى. سالتاناتتى شارادا ءسوز العان ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ: «بۇگىنگى اكتسياعا قاتىسىپ قولداۋ بىلدىرگەن ازاماتتار مەن ۇيىمدار از بولمادى. اتاپ ايتقاندا, قر ۇلتتىق كىتاپحاناسى, «فوليانت» باسپاسى, سونىمەن قاتار, قويشىعارا سالعارا ۇلى, ەرلان ءباتتاش ۇلى, قارجاۋباي سارتقوجا ۇلى, تۇرسىن جۇرتباي, دارحان قىدىرالى سىندى بىرقاتار زيالى قاۋىم وكىلدەرى اتسالىسقان بولاتىن» – دەي كەلە, اكتسياعا قاتىسۋشىلارعا العىسىن ءبىلدىردى. اكتسيانىڭ ماقساتى – حالىقتىڭ تاريحي-مادەني قۇندىلىقتارىنا, سونىڭ ىشىندە جازبا جادىگەرلەردى ساقتاۋدىڭ وزەكتى ماسەلەلەرىنە قوعام نازارىن اۋدارۋ, مۋزەي كىتاپحاناسىنىڭ قورىن قۇندى قۇجاتتارمەن جانە باسىلىمدارمەن تولىقتىرۋ. ايتا كەتۋ كەرەك, «مۋزەي كىتاپحاناسىنا سىي تارتۋ» – «ۇلتتىق مۋزەيگە سىي تارتۋ» اكتسياسىنىڭ ءبىر تارماعى بولىپ ەسەپتەلەدى. بىلتىر وسى اكتسيا بارىسىندا كىتاپحانا قورىنا ءارتۇرلى ۇيىمدار مەن جەكە تۇلعالالاردان 1110 دانا كىتاپ سىيعا الىنعان بولاتىن.