الەكساندر بوروديۋك: قازاقستان قۇراماسىنا جاس تالانتتاردى تارتۋىم قاجەت

بىرەر كۇن بۇرىن عانا قازاقستان ۇلتتىق قۇراماسىنىڭ جاتتىقتىرۋشىسى بولىپ تاعايىندالعان الەكساندر بوروديۋك «سپورت-ەكسپرەسس» باسىلىمىنا سۇحبات بەردى. وتكەن ايدىڭ باسىندا بوروديۋكتىڭ بەلارۋس قۇراماسىن جاتتىقتىراتىنى حابارلانعان. ال بىلتىر رەسەي قۇراماسىنىڭ تىزگىنىن ۇستايتىنداردىڭ تىزىمىندە بولدى. سونداي-اق, از ۋاقىت بۇرىن ءوز ەلىنىڭ قۇراماسىندا سپورت ديرەكتورى قىزمەتىن اتقارۋى مۇمكىن ەكەندىگى ايتىلدى. «بىلتىر ۆيتالي مۋتكومەن كەزدەسكەنىم راس. بىراق تۇبىندە تاڭداۋ ماعان تۇسپەدى. ستانيسلاۆ چەرچەسوۆكە تەك ساتتىلىك تىلەيمىن. ال سپورت ديرەكتورى, جاستار قۇراماسىن جاتتىقتىرۋ جايلى تەك گازەت بەتتەرىنەن عانا وقىدىم. ونىڭ ءبارىن سىبىس دەپ قابىلداۋ قاجەت. ونىڭ ۇستىنە الداعى جىلدارى جاتتىقتىرۋشى بولىپ قانا قىزمەت ەتكىم كەلەدى», – دەدى قازاقستان قۇراماسىنىڭ جاڭا جاتتىقتىرۋشىسى. «ءبىر جارىم اي بۇرىن مينسكىدە بولدىم. بەلارۋس ۇلتتىق قۇراماسىنداعى جۇمىسىم جايلى تالقىلادىق. بىراق فەدەراتسيا بۇل ماسەلەنى كەيىنگە شەگەرۋ تۋرالى شەشىم قابىلدادى. مىنە, وسى ۋاقىتتا قازاقستاننان ۇسىنىس ءتۇستى. اۋباكىروۆ قانىش قايدار ۇلىمەن (قازاقستان فۋتبول فەدەراتسياسىنىڭ ءبىرىنشى ۆيتسە-پرەزيدەنتى) كەزدەسۋ وتكىزدىم. ءبارى ويداعىداي ءوتتى. ۇسىنىسى ماعان قىزىعىراق بولىپ كورىندى. ءۇش كۇننىڭ ىشىندە ءبارى شەشىلدى. ونىڭ ۇستىنە بىلتىر «قايراتتا» جۇمىس ىستەگەندىكتەن, قازاقستاننىڭ فۋتبولعا دەگەن كوزقاراسىن جاقسى بىلەمىن. «استانا», «توبىل», «ورداباسى», «اتىراۋ» سىندى ۇجىمدار جىلدان جىلعا كۇشەيىپ كەلەدى», – دەدى الەكساندر بوروديۋك. قازاقستان قۇراماسى 2018 جىلى وتەتىن الەم چەمپيوناتىنىڭ ىرىكتەۋ كەزەڭىندە 2 ۇپايمەن سوڭعى ورىندا كەلەدى. ال جاڭا باپكەردىڭ الدىنا قانداي تاپسىرما بەرىلدى؟ «كوماندا قۇرامىنداعى ويىنشىلاردى جاسارتۋ, جاس فۋتبولشىلاردىڭ تالانتىن اشۋ, لايىقتى ويىن كورسەتە الاتىن كوماندا جاساقتاپ شىعارۋىم كەرەك. ارينە, سپورت بولعاننان كەيىن جەڭىس پەن جەڭىلىستىڭ قاتار ءجۇرۋى زاڭدىلىق. بىراق باستىسى بۇل سىندا بارىڭدى سالۋىڭ قاجەت», – دەدى ول. جاڭا باپكەر كەلگەننەن كەيىن جانكۇيەرلەردىڭ ناتيجە كۇتەرى انىق. ال ءاچ 2018-گە جولداما الۋ مۇمكىن بە؟ «فەدەراتسيادا شىندىققا تۋرا قارايتىن كىسىلەر جۇمىس ىستەيدى. كوشباسشى كوماندالاردان ۇپاي ايىرماشىلىعىمىز وتە جوعارى. بىراق ءار باپكەر كومانداسىن تەك جەڭىس تۇعىرىنان كورگىسى كەلەدى. مەن دە سولاي بولسا ەكەن دەيمىن. قاراماعىمداعى جىگىتتەردىڭ ءوز ەلىنىڭ نامىسى ءۇشىن بارىن سالعانىن قالايمىن», – دەدى ول. «قۇرامادا كومەكشىم ۆيكتور لوسەۆ بولادى. ەكەۋىمىز ءبىر كەزدەرى «دينامو» كومانداسىندا, وليمپيادالىق قۇرامادا بىرگە ويناعانبىز. رەسەي فەدەراتسياسىندا, جاستار قۇراماسىندا بىرگە قىزمەت ەتتىك. ەكەۋىمىز بۇرىننان تانىسپىز, فۋتبولعا دەگەن كوزقاراسىمىز دا بىردەي», – دەدى ول. ايتا كەتەيىك, الەكساندر بوروديۋك قازاقستان قۇراماسىمەن ۇشجىلدىق كەلىسىمشارتقا وتىردى.