كونستيتۋتسيانىڭ 23 بابىنا وزگەرىس ەنگىزىلەدى – ەلباسى

كونستيتۋتسيانىڭ 23 بابىنا وزگەرىستەر ەنگىزىلەدى. بۇل تۋرالى بۇگىن اقوردادا ءوتىپ جاتقان بيلىك تارماقتارى اراسىنداعى وكىلەتتىكتەردى قايتا ءبولۋ جونىندەگى جۇمىس توبىنىڭ كەزەكتى وتىرىسىندا ەلباسى نۇرسۇلتان نازارباەۆ مالىمدەدى. «ءبىز ءۇشىن ءبىر ايقىن ماسەلە – قازاقستاننىڭ نەگىزگى ساياسي مودەلى ساقتالادى. پرەزيدەنتتىك رەسپۋبليكا بولىپ قالا بەرەدى. سونىمەن بىرگە, مەملەكەتتىك باسقارۋ جۇيەسى ءداۋىر تالابىنا ساي يكەمدى بولۋى ءتيىس. رەفورمالاردىڭ ناتيجەسىندە بيلىكتىڭ ءبىر تارماعى وكىلەتتىگىن تولىق يەلەنىپ, دەربەس جۇمىس ىستەيدى. سوعان سايكەس ءار تارماعى جاۋاپكەرشىلىكتى دە سەزىنۋى ءتيىس. وكىلەتتى بيلىكتىڭ ۇكىمەت پەن اتقارۋشى ورگاندارعا باقىلاۋى كۇشەيەدى», – دەدى مەملەكەت باسشىسى. ەلباسىنىڭ پايىمىنشا, بۇل مەملەكەتتىڭ كاسىبيلىگىن ارتتىرۋمەن قاتار كونستيتۋتسياداعى بيلىكتىڭ بىردەن ءبىر باستاۋى حالىق دەگەن قاعيدانى بەكىتە تۇسەدى. «ەل بولاشاعى ءۇشىن ايرىقشا ماڭىزدى وسى قۇجاتتىڭ تاعدىرىن ءبىز شەشۋىمىز كەرەك. ءارى قاراي نە ىستەۋىمىز كەرەك ەكەندىگىنە بۇگىن قورىتىندى جاساپ, قاشان پارلامەنتكە تالقىلاۋعا تۇسەتىندىگىن كەلىسۋىمىز كەرەك. كونستيتۋتسيانىڭ 23 بابىنا وزگەرىس ەنگىزىلەتىن بولدى, زاڭدارعا 35 وزگەرىس ەنگىزىلەدى. بۇل جەردە ايتا كەتەتىن نەگىزگى ماسەلە پرەزيدەنتتەگى وكىلەتتىكتەردى باسقا تارماقتارعا بەرۋ بولىپ وتىر. وزدەرىڭىز دە بىلەسىزدەر, باسقا ەلدەردە, كەرىسىنشە, پرەزيدەنتتىڭ وكىلەتتىگىن جوعارىلاتۋ ءۇشىن رەفەرەندۋمدار وتكىزىپ, كونستيتۋتسيالىق وزگەرىستەر ەنگىزىپ جاتىر. بىزدە كەرىسىنشە. سەبەبى, 25 جىلدىڭ ىشىندە پرەزيدەنتتىك باسقارۋ جۇيەسى ءوزىنىڭ الدىنا قويعان حالىق الدىنداعى ماقساتىن ورىندادى», - دەدى نۇرسۇلتان نازارباەۆ.