توم لەففلەر: گولوۆكين تەك ۇزدىكتەرمەن كۇش سىناسقىسى كەلەدى

ك2 Promotions كومپانياسىنىڭ ديرەكتورى ءارى قازاقستاندىق گەننادي گولوۆكيننىڭ پروموۋتەرى توم لەففلەر مەكسيكالىق ساۋل الۆارەسپەن جەكپە-جەك ۇيىمداستىرۋ ءۇشىن قولايسىز جايتتاردى قابىل الۋعا دايىن ەكەنىن مالىمدەدى. بۇل تۋرالى sports.kz حابارلادى. «قازىر گولوۆكيننىڭ بار ويى – 18 ناۋرىز كۇنى وتەتىن كەزدەسۋ جايلى. GGG-عا قارسىلاس تابۋ قيىنعا سوعىپ جاتادى. سول ءۇشىن ءبارىن الدىن الا جوسپارلاۋدى ءجون كورەمىن. ماسەلەن, وتكەن جىلدىڭ قاراشا ايىنان بەرى ەريك گومەسپەن جۇدىرىقتاسۋ ءۇشىن كەلىسسوزدەر جۇرگىزىپ جاتىرمىن. بۇل شارا بيىل قىركۇيەك ايىندا وتەدى دەگەن ۇمىتتەمىن. بىراق وعان دەيىن گەننادي دجەيكوبستى جەڭۋى قاجەت», – دەدى توم لەففلەر. «گولوۆكين جىلىنا ءتورت مارتە رينگكە شىققىسى كەلەدى. ارينە, مۇمكىن بولعاننىڭ ءبارىن جاساۋعا تىرىسىپ باعۋدامىز. ەگەر «كانەلومەن» بوكس كەشىن ۇيىمداستىرا الماساق, وزگە قارسىلاستار ىزدەۋگە كوشەمىز. بولاشاقتى الدىن الا ءبىلۋ مۇمكىن ەمەس قوي. ماسەلەنىڭ كوبى نيۋ-يوركتەگى ايقاسقا بايلانىستى بولماق. دەنني تەز بەرىلەتىن بوكسشى ەمەس», – دەدى پروموۋتەر. «ال الۆارەسپەن بوكس كەشىن وتكىزۋ ىسىنە كەلەر بولساق, ەكەۋىنىڭ سالماق دارەجەلەرى ءارتۇرلى بولعانمەن, بۇل ولارعا كەدەرگى بولماسى انىق. بىراق وتكەنگە كوز جۇگىرتسەك, ايتۋلى جەكپە-جەكتەر ۇيىمداستىرىلعانمەن, وتپەي قالعاندارى دا بولعان. ەگەر 18 ناۋرىزدان كەيىن «Golden boy» كومپانياسىمەن كەلىسسوزدەردى جۇرگىزۋ كەرەك بولسا, قولىمنان كەلگەننىڭ ءبارىن جاسايمىن. ءبىز بۇعان دەيىن دە وزىمىزگە ىڭعايى كەلمەيتىن تۇستاردى قابىل العانبىز. ەگەر الۆارەستىڭ تاراپى ۇيىمداستىرۋ جۇمىستارىن تولىعىمەن ءوز قولىنا العىسى كەلسە, بۇعان دا كەلىسەمىز. گەننادي شارشى الاڭدا تەك ۇزدىكتەرمەن كۇش سىناسقىسى كەلەدى», – دەدى گولوۆكيننىڭ پروموۋتەرى.