بۇگىن - قازاقستاندا العىس ايتۋ كۇنى

بۇگىن ناۋرىزدىڭ ءبىرىنشى كۇنى قازاقستان حالقى العىس ايتۋ كۇنى مەرەكەسىن اتاپ وتۋدە. 2015 جىلدىڭ 15 قاڭتارىندا مەملەكەت باسشىسى نۇرسۇلتان نازارباەۆ «قازاقستان رەسپۋبليكاسىنداعى كاسىپتىك جانە وزگە دە مەرەكەلەر تۋرالى» قازاقستان رەسپۋبليكاسى پرەزيدەنتىنىڭ 1998 جىلعى 20 قاڭتارداعى № 3827 جارلىعىنا وزگەرىس جانە تولىقتىرۋ ەنگىزۋ تۋرالى» جارلىعىنا قول قويدى. وعان سايكەس, 1 ناۋرىز - العىس ايتۋ كۇنى بولىپ بەكىتىلدى. 1995 جىلدىڭ 1 ناۋرىزى كۇنى قازاقستان حالقى اسسامبلەياسى قۇرىلعان بولاتىن. 2015 جىلى اسسامبلەيانىڭ 20 جىلدىعى كەزىندە مەملەكەت باسشىسى بۇل كۇندى العىس ايتۋ كۇنى دەپ جاريالاۋدى ۇسىندى. وسىلايشا, ەلدەگى بارلىق ەتنوستاردىڭ وكىلدەرى ءبىر-بىرىنە جانە قازاقتارعا العىس ايتا الادى. «ستاليندىك رەجيم كەزىندە ءتۇرلى جىلدارى قازاقستانعا كوپتەگەن حالىقتار جەر اۋدارىلدى - 800 مىڭعا جۋىق نەمىس, 102 مىڭ پولياك, 550 مىڭ سولتۇستىك كاۆكاز حالقىنىڭ وكىلدەرى, 18,5 مىڭ قيىر شىعىستاعى كورەي وتباسىلارى كوشىپ كەلۋگە ءماجبۇر بولدى. ولاردى پويىز ۆاگوندارىنان جاپان دالاعا ءتۇسىرىپ كەتتى. ول كەزدەرى مۇندا تەك قازاقتار ءومىر ءسۇردى. سوندىقتان, ولار قابىل الىپ, كومەك كورسەتتى. قيىن ۋاقىتتاردى باستان وتكەرىپ جۇرگەن قازاق وتباسىلارى بالشىق ۇيلەرىنە كىرگىزىپ, قابىلدادى. ءبىزدىڭ جانۇيامىز دا ءۇش بالاسى بار ەرلى-زايىپتىنى قابىلدادى. قازاقستان حالقى اسسامبلەياسىنىڭ قۇرىلعان كۇنىن - 1 ناۋرىزدى جىل سايىن بارلىق ەتنوستاردىڭ ءبىر-بىرىنە جانە مەيىرىمدىلىك كورسەتىپ, ءتۇرلى حالىقتاردى تۋعانىنداي قابىلداعان قازاقتارعا العىس ايتۋ كۇنى دەپ اتاپ وتكەن دۇرىس بولار ەدى. بۇل ءبىزدى ودان ءارى جاقىنداستىرار ەدى. بۇل كۇن بارلىق قازاقستاندىقتاردىڭ ءبىر-بىرىنە مەيىرىمدىلىك, دوستاستىق جانە ماحاببات تانىتۋ مەرەكەسى بولا الادى», - دەپ مالىمدەدى قر پرەزيدەنتى نۇرسۇلتان نازارباەۆ 2015 جىلدىڭ 22 ءساۋىرى كۇنى قحا-نىڭ XXII سەسسياسى كەزىندە سويلەگەن سوزىندە.