«قازاققا راحمەت ايتۋ – قاسيەتتى پارىزىمىز»
العىس ايتۋ كۇنىنە وراي پرەزيدەنت ارحيۆىندە بەلگىلى قوعام قايراتكەرلەرىنىڭ, ەتنوستىق بىرلەستىكتەر جەتەكشىلەرى مەن ەلىمىزدەگى شەت ەل كونسۋلدىقتارى وكىلدەرىنىڭ, ارحيۆ قىزمەتكەرلەرىنىڭ, ستۋدەنتتەردىڭ قاتىسۋىمەن «بىرلىك – ءبىزدىڭ قاسيەتتى تۋىمىز» اتتى دوڭگەلەك ۇستەل وتىرىسى ءوتتى. پرەزيدەنت ءارحيۆىنىڭ ديرەكتورى, پروفەسسور بوريس جاپاروۆ سالتاناتقا قاتىسقان قوناقتاردى العىس ايتۋ كۇنىمەن قۇتتىقتاپ, قاسىرەتتى تاعدىر تولقىنىمەن قازاقستانعا قونىس اۋدارعان ميلليونداعان ەتنوس وكىلدەرىنىڭ قازاق جەرىنە كەلۋ تاريحىن قايىرا ءبىر تارقاتتى. «پاتشالىق رەسەي مەن كەڭەس وداعىنىڭ قول استىندا بولعان قازاق دالاسى ساياسي جەر اۋدارۋدىڭ مەكەنىنە اينالدى, حالىقتاردى جاپپاي كۇشتەپ كوشىرۋدىڭ ستاليندىك زامانىندا بۇرىن-سوڭدى بولماعان قاسىرەتتى شەگىنە جەتتى. ءوز ەرىكتەرىنەن تىس جانە ونىڭ ۇستىنە قازاق حالقىنىڭ پىكىرىن ەسكەرمەستەن, رەسپۋبليكاعا كورەيلەر, پوۆولجە نەمىستەرى, چەشەندەر, ينگۋشتار, مەسحەتتىك ءتۇرىكتەر, وزگە دە ۇلت وكىلدەرى قونىس اۋداردى. كەڭەستىك بەسجىلدىقتار كەزىندە قولعا الىنعان « ۇلى ەكپىندى قۇرىلىستار» مەن تىڭ جانە تىڭايعان جەرلەردى يگەرۋ كەزەڭىندە قازاقستان وراسان زور كوشى-قون تاسقىنىنىڭ استىندا قالدى», دەدى ارحيۆ ديرەكتورى بوريس جاپاروۆ.
پرەزيدەنت ءارحيۆى قۇجاتتارىنىڭ ءمالىمەتتەرىنە سۇيەنسەك, حح عاسىردىڭ باسىنداعى ستولىپيندىك رەفورما كەزىندە شارۋالاردى كوشىرۋ بارىسىندا قازاقستانعا رەسەي, ۋكراينا, بەلورۋسسيادان 1 ملن 150 مىڭ ادام كەلگەن. جيىرما جىلدان سوڭ, 30-جىلدارداعى ۇجىمداستىرۋ كەزىندە كەڭەس وداعىنىڭ ورتالىق وڭىرلەرىنەن قازاقستانعا كۋلاك رەتىندە جەر اۋدارىلعان 250 مىڭ شارۋا جىبەرىلگەن. بۇدان بولەك, وسى ۋاقىتتا وندىرىستىك قۇرىلىس جۇمىسى ءۇشىن 1 ملن 200 ادام تاعى كەلگەن.
دوڭگەلەك ۇستەلدە باس قوسقان قازاقستان پولياكتار وداعىنىڭ توراعاسى, پولياك مادەني ورتالىعىنىڭ جەتەكشىسى ولەگ چەرۆينسكي, فاشيستىك كونتسلاگەرلەردىڭ تۇتقىنى بولعان, فاشيزم تۇتقىنىندا بولعانداردىڭ قازاقستاندىق قاۋىمداستىعىنىڭ وكىلى ۆلاديمير دەنيسيۋك, ۋكراينا مادەني ورتالىعىنىڭ ءتورايىمى تامارا اگاپوۆا, «مەملەكەتتىك تىلگە قۇرمەت» قوعامدىق ۇيىمىنىڭ ءتورايىمى اسىلى وسمانوۆا, اسسامبلەيا مۇشەسى قازاقپاي قاسيموۆ ءسوز سويلەپ, جوعىن ايتىپ جاسىماعان, دارقان پەيىلمەن بارشا ۇلتتىڭ بالاسىن بوتەنسىمەي, باۋىرىنا باسقان قازاق حالقىنا راحمەت ايتتى. «قازاقتاي ۇلى حالىقتىڭ تاريحىنا تاعزىم ەتىپ, تاعدىرىنا سالاۋات ايتۋ, جاقسىلىعىنا تىلەكتەس بولۋ – ارقايسىمىزدىڭ بۇگىنگى ازاماتتىق بورىشىمىز, قاسيەتتى پارىزىمىز», دەدى قازاقستان حالقى اسسامبلەياسىنىڭ مۇشەسى, اكادەميك ق.قاسيموۆ.
ايگۇل احانبايقىزى,
«ەگەمەن قازاقستان»
الماتى
