جۋرناليستەر بايگەسى اياقتالدى

ەلوردادا قالالىق فۋتبول فەدەراتسياسىنىڭ ۇيىمداستىرۋىمەن بۇقارالىق اقپارات قۇرالدارى وكىلدەرى اراسىنداعى فۋتبول بىرىنشىلىگىنىڭ العاشقى ماۋسىمى اياقتالدى. جارىسقا بارلىعى 11 كوماندا قاتىستى. باق ليگانىڭ العاشقى ماۋسىمىندا ەشكىمگە ەسە جىبەر­مەگەن «حابار» ارنا­سىنىڭ جىگىتتەرى 26 ۇپاي جيناپ, چەمپيون اتاندى. ال سوڭعى تۋرعا دەيىن بۇل اتاقتان ۇمىتكەر بولعان «قازاق راديوسى» 23 ۇپاي ەنشىلەپ, ەكىنشى ورىنعا يە بولسا, ۇزدىك ۇشتىكتى 19 ۇپايمەن «Sportsffa.kz» كومانداسى ءتۇيىن­دەدى. «جۋرناليستەر اراسىنداعى بىرىنشىلىك ءوز مارەسىنە جەتتى. بۇل جارىس الداعى ۋاقىتتا دا جالعاسىن تابادى. كەلەسى چەمپيونات وسى جىلدىڭ مامىر ايىنا جوسپارلانىپ وتىر. ازداعان وزگەرىستەردىڭ بولۋى مۇمكىن», دەدى استانا قالالىق فۋتبول فەدە­راتسياسىنىڭ باس مەنەدجەرى عالىمجان كەنجالينوۆ. باق ليگانىڭ جابىلۋ سالتاناتىندا ۇيىمداستىرۋشىلار ۇزدىكتەردى ماراپاتتادى. ءۇش ايعا سوزىلعان بىرىنشىلىكتە 24 گول سوققان «Sports 59» ۇجىمىنىڭ شابۋىلشىسى ساپارعالي قانات ۇزدىك سۇرمەرگەن اتانىپ, «ال­تىن بۋتسا» سىيلىعىن ءارى «ۇزدىك شابۋىلشى» نوميناتسياسىن جەڭىپ الدى. سونىمەن قاتار, «ۇزدىك قاقپاشى» اتاعى «حا­بار» كومانداسىنىڭ نامىسىن قورعاعان ايبەك قابىلشاعا بەرىلسە, «ۇزدىك قورعاۋشى» بولىپ «Sportsffa.kz» ويىنشىسى اراي ءىزباي تانىلدى. ال جۋرناليستەر اراسىندا ەرەكشە ويىنىمەن كوزگە تۇسكەن «حابار» كومانداسىنىڭ كاپيتانى نۇرسۇلتان قۇرمان «ۇزدىك ويىنشى» اتاندى. «تۋرنير كوزدى اشىپ-جۇم­عانشا وتە شىقتى. كەلەسى ماۋسىم بۇدان دا قىزىقتى ءارى تارتىستى وتەدى دەپ سەنەمىن. الداعى ۋاقىتتا قازاق جۋرناليستيكاسىنا ەڭبەگى سىڭگەن تۇلعالاردىڭ ەسىمىنە ارنالعان جۇلدىزدار ماتچىن وتكىزۋدى جوسپارلاپ وتىرمىز», دەدى باق ليگانى ۇيىم­داس­تىرۋشىلاردىڭ ءبىرى ءازيز ءجۇمادىل. بۇل جارىستا باق سىناعان «ەگەمەن قازاقستان» كومانداسى التىنشى ورىنعا تۇراقتادى. باق ليگانىڭ كەلەر ماۋسىمىندا قاتىسۋشى كوماندا­لاردىڭ دا, الاڭعا شىعاتىن ويىن­شىلاردىڭ دا سانى ارتۋى ابدەن مۇمكىن دەدى جارىستى ۇيىمداستىرۋشىلار. ايان ءابدۋالي, «ەگەمەن قازاقستان»