وبلىس اكىمى – «جىل ەرىكتىسى»

اتىراۋ وبلىسىنىڭ اكىمى نۇرلان نوعاەۆ «جىل ەرىكتىسى» اتاندى. ارنايى ديپلومدى اتىراۋلىق مۇمكىندىگى شەكتەۋلى بالالاردىڭ اتا-انالارى ايماق باسشىسىنىڭ ەسەبى كەزىندە تابىستادى. ەرلان كۇمىسقاليەۆتىڭ «اتى­راۋ. شاعىن ەل» قوعامدىق بىرلەس­تىگى اۋتيزمگە, پسيحيكالىق دامۋى كەشەۋىلدەگەن جانە تسەرەبرالدى سال اۋرۋىنا شالدىققان بالالاردى يتتەردىڭ كومەگىمەن ەمدەۋدى ماقسات ەتەدى. «دامۋى كەشەۋىلدەگەن, تۋا ءبىتتى اۋرۋعا شالدىققان بالالاردىڭ ەرەكشە الەمدەرى بار. ولار تەك يتتەرگە عانا اشىلادى. بۇل جەردە يت بالا مەن ونى قورشاعان اينالاسىنىڭ اراسىن جالعاۋشى دانەكەر ىسپەت­تى. كانيستەراپيا ءتاسىلى, ياعني ارنايى دايىندالعان يتتەر ارقىلى بالالارعا ساۋىقتىرۋ جۇمىستارىن جۇرگىزەمىز. قازىر امەريكاداعى ادام الەۋەتىن ارت­تىرۋ ينستيتۋتىنىڭ ءادىسىن قول­دانامىز. بىزگە كەلەتىن بالا­لاردىڭ سەكسەن پايىزدان استامى وزدەرىنىڭ اياق-قولدارى بار ەكەنىن سەزىنبەيدى. ارينە, ولاردى ەمدەپ جازۋ ۇزاق ۋاقىتتى تالاپ ەتەدى. بىراق, وتىرماعان بالانىڭ وتىرىپ, سويلەي المايتىن بالا «پاپا, ماما» دەپ, جۇرە الماي كەلگەن ءسابي اياعىن باسقانىن كورىپ, قۋانامىز, جىگەرلەنەمىز», دەيدى ەرلان كۇمىسقاليەۆ. قوعامدىق بىرلەستىكتىڭ جۇمى­سى ءتورت جىل بۇرىن باستال­عان. مەملەكەتتەن كومەك سۇراپ تا, الىپ تا كورمەگەن ول ەرىكتىلەر مەن قايىرىمدىلىق جارمەڭكەلەرىنەن تۇسكەن قاراجاتقا عيمارات جالداپ كەلگەن ەدى. جاقىندا وبلىستىق اكىمدىك باس جانە ج ۇلىن ميىنىڭ جاراقاتىنا شالدىققان بالالاردى بەيىمدەۋ, ەمدەۋ ورتالىعىن سالۋ ءۇشىن 5 گا جەر تەلىمىن ءبولدى. بۇل ورتالىق ەلىمىز بويىنشا ءبىرىنشى رەت اتىراۋدا سالىنادى. قازىر قوعامدىق بىرلەستىك قۇرامىندا 250 ادام بار. ولار بالالارىنىڭ بولاشاعىنا نەمقۇرايلى قاراماي, قولداعان وبلىس اكىمى نۇرلان نوعاەۆتى وتكەن جىلدىڭ قورىتىندىسى بويىنشا «جىل ەرىكتىسى» دەپ اتاۋدى ءبىراۋىزدان ۇيعارىپتى. باقىتگۇل باباش, «ەگەمەن قازاقستان» اتىراۋ