قۇرالبەك ورداباەۆ: چەمپيوندىققا تالاس «استانا» مەن «قايراتتىڭ» اراسىندا وتەدى

داڭقتى قاقپاشى, فۋتبول مامانى قۇرالبەك ورداباەۆ الداعى ماۋسىمدا چەمپيوندىق اتاقتى قاي كوماندالار ساراپقا سالاتىنى جايلى پىكىر ءبىلدىردى. ايتۋىنشا بۇل جولى دا «استانا» مەن «قايرات» اراسىندا وتپەك. دەگەنمەن, پرەمەر-ليگا ءۇش اينالىمنان تۇراتىندىقتان كوماندالار اراسىنداعى باسەكەلەستىك كۇشەيىپ, قىزىعۋشىلىق ارتا تۇسەدى دەگەن ويدا, دەپ حابارلايدى vesti.kz. «ماۋسىمارالىق ءۇزىلىستى قاي كوماندانىڭ قانداي ويىنشىنى العانىن بىلمەيمىن. بىراق چەمپيوندىق تالاس "استانا" مەن "قايراتتىڭ" اراسىندا ءوربيتىنى انىق. وزگە كلۋبتار قانداي فۋتبولشى الماسىن, بۇل ۇجىمدارعا باسەكەلەستىك تانىتا المايدى», ­- دەدى داڭقتى قاقپاشى. «التاي» كومانداسى پرەمەر-ليگاعا شىققانمەن, سەرتيفيكاتىنىڭ دۇرىس بولماۋىنان جولدامادان قاعىلعان. ونىڭ ورنىن "تاراز" كلۋبى باستى. «مەنىڭشە, جامبىلدىقتار پرەمەر-ليگاعا قاتىساتىندارى جايلى كەش ءبىلدى. ۆايت تالگاەۆ ءۇشىن بۇل كۇتپەگەن جاڭالىق بوعانى انىق. ەندى بارلىعى ونىڭ بىلىگى مەن تاجىربيەسىنە تاۋەلدى بولماق. ال «التايعا» كەلەر بولساق, باق بەتتەرىندە جازىلعانداي, شقو اكىمىنىڭ ايتقان سوزدەرىن باستى نازاردا ۇستاساق وندا كلۋب باسشىلىعى تولىقتاي كىنالى. ءتيىستى مىندەتتەرىن دۇرىس اتقارمادى. كىمگە سەنگەندەرىن بىلمەيمىن, الايدا بىرىنشىلىكتىڭ رەگلامەنتىن ساقتاۋى قاجەت ەدى. ءبىر سوزبەن ايتقان كلۋبتا ءوز ءىسىن دۇرىس بىلمەيتىن ماماندار كوپ», - دەدى قۇرالبەك ورداباەۆ. «قايرات» كومانداسىنىڭ ارداگەرى بىرىنشىلىكتەگى العاشقى ەكى ورىننىڭ يەگەرلەرىن ايتتى. ال ءۇشىنشى ورىن كىمدە بولماق؟ «قولا جۇلدە ءۇشىن ءۇش بىردەي كوماندا تالاسقا تۇسەدى. الايدا ناقتى كىمدەر ەكەنىن ايتۋ قيىن. چەمپيونات باستالىپ, بەس-التى تۋر وتكەن سوڭ انىقتالا باستايدى. نە دەسەك تە, بۇل جولى بىرىنشىلىك قىزىق بولعالى تۇر. ويتكەنى كوماندالار بۇرىنعىداي ەكى التىلىققا بولىنبەيدى. ەڭ قىزىعى ءۇشىنشى اينالىم بولادى. كىمنىڭ قاي ورىنعا تالاساتىنىن بەلگىلى بولعاندا قىزىعۋشىلىق تا كوبەيە تۇسەدى. ونىڭ ۇستىنە, ەۋروكۋبوك جولداماسى ءۇشىن تالاس باستالادى», - دەدى ول.