2016 جىلى وڭتۇستىك قازاقستاندا 300 ملرد تەڭگە سالىق وندىرىلگەن

وڭتۇستىك قازاقستان وبلىسىندا وتكەن جىلى 300 ملرد تەڭگەدەن اسا سالىق وندىرىلگەن. وڭىرلىك مەملەكەتتىك كىرىستەر دەپارتامەنتى باسشىلىعىنىڭ سوزىنشە بۇل سوما بەكىتىلگەن جوسپاردان 11 ملرد تەڭگە ارتىعىمەن قامتاماسىز ەتىلگەنىن كورسەتەدى, دەپ حابارلايدى قازاقپارات. دەپارتامەنت باسشىسىنىڭ ورىنباسارى عالىمجان ورىنوۆتىڭ سوزىنشە, بۇگىندە وڭىردە 325 مىڭنان استام ادام 211 مىڭ شاعىن جانە ورتا بيزنەستە جۇمىس اتقارادى. 2016 جىلى وبلىس بيۋدجەتىنە بيزنەس وكىلدەرىنەن 150 ملرد. تەڭگە تۇسكەن. «بيۋدجەت تۇسىمدەرىن تولىق جانە ۋاقتىلى ءتۇسۋىن قامتاماسىز ەتۋ بويىنشا بەكىتىلگەن جوسپار 104 پايىزعا قامتاماسىز ەتىلدى. ناقتى ايتقاندا, بەكىتىلگەن جوسپار 291 ملرد. 197 ملن. تەڭگە بولسا, بيۋدجەتكە 302 ملرد. 920 ملن. تەڭگە ءوندىرىلىپ, ارتىعىمەن 11 ملرد. 724 ملن. تەڭگە ءتۇستى. وتكەن جىلمەن سالىستىرعاندا, ءوسۋ قارقىنى 126% نەمەسە 62 ملرد. 288 ملن. تەڭگەگە وسكەن»,- دەدى عالىمجان ورىنوۆ. ال رەسپۋبليكالىق بيۋدجەتتىڭ جوسپارى 189 ملرد. 803 ملن. تەڭگە بولسا, ناقتى 196 ملرد. 915 ملن. تەڭگە ءوندىرىلىپتى. كەدەن سالاسىندا اتقارىلىپ جاتقان جۇمىستار بويىنشا بايانداعان دەپارتامەنت باسشىسىنىڭ ورىنباسارى نۇرجان تەڭلىباەۆتىڭ ايتۋىنشا, وبلىستىڭ سىرتقى تاۋار اينالىمى 1 ملرد. 763 ملن. اقش دوللارىن قۇراعان. كەدەندىك تولەمدەر مەن سالىقتار 19,6 ملرد. تەڭگەگە نەمەسە 58 پايىزعا ءوسىپتى. بۇگىنگى كۇنى, مەملەكەتتىك قىزمەتتىڭ ساپاسىن ارتتىرۋ ءۇشىن, وبلىستىڭ 18 اۋدانى مەن قالالارىندا 26 اقپاراتتى قابىلداۋ, وڭدەۋ جانە بەرۋ ورتالىقتارى ورنالاسقان. مەملەكەتتىك كىرىستەر ورگاندارىمەن بارلىعى 53 قىزمەت ءتۇرى كورسەتىلەدى. سونداي-اق, كولەڭكەلى بيزنەسپەن كۇرەس بارىسىندا دەپارتامەنت قىزمەتكەرلەرى  كوپتەگەن كاسىپكەرلەر قۇيتىرقىلىق ارەكەتتەرگە بارىپ جاتاتىندىعىن ايتادى. ماسەلەن, جەكە كومپانيالارىن  بوتەن ادامداردىڭ اتتارىنا تىركەپ قويادى. ولاردىڭ قاتارىندا ستۋدەنتتەر, قارتتار مەن ءۇيسىز جۇرگەن ازاماتتار بار ەكەن.