بىلتىر ەلىمىزدە ەكسترەميستىك قىلمىستار بويىنشا 143 ادام جازاعا تارتىلعان

2016 جىلى قۇقىق قورعاۋ جانە وزگە دە مەملەكەتتىك ورگانداردىڭ ەكسترەميزم مەن تەرروريزمگە قارسى ءىس-قيمىل سالاسىنداعى قىزمەتى راديكاليزم بەلگىلەرىن بولدىرماۋعا باعىتتالدى. سونىمەن قاتار, بىلتىر ەكسترەميستىك جانە تەرروريستىك قىلمىستار بويىنشا 143 ادام جازاعا تارتىلدى, دەپ حابارلادى قر باس پروكۋراتۋراسىنىڭ ءباسپاسوز قىزمەتى. باس پروكۋراتۋرا سايتىندا جاريالانعان مالىمەتتەرگە قاراعاندا, قازىرگى تاڭدا راديكالدى يدەولوگيامەن اۋەستەنگەن تۇلعانىڭ تيپتىك بەينەسى جاسالىنعان. «بۇل كوبىنەسە وتكەن ءومىرى كريمينالدى, تۇراقتى جۇمىسى جانە جوعارى ءبىلىمى جوق جاستار. ولاردىڭ ءدىني ساۋاتى تومەن. ءدىني ادەبيەتتەردى وقىماعان جانە وقىعىسى دا كەلمەيدى. وزدەرىنىڭ ءدىن, جاقسىلىق جانە جاماندىق تۋرالى كوزقاراستارىن ينتەرنەتتەن الىنعان كۇماندى ماتەريالدارعا نەگىزدەيدى. تەرروريزمدى ناسيحاتتايتىندارعا ويلانباستان سەنەدى. كۇماندى اقپارات ارقىلى راديكاليزمگە تارتىلۋدىڭ ءبىرىنشى ساتىسى باستالادى. ازعىرىپ كوندىرۋشىلەر ازاماتتاردىڭ ماتەريالدىق جانە الەۋمەتتىك-تۇرمىستىق پروبلەمالارىن پايدالانا وتىرىپ, ولارعا ۇستەمدىك جۇرگىزەدى. وسىنداي ناسيحاتتاۋشىلاردىڭ ىقپالىنا تۇسكەندەر جاڭا ەكسترەميستەردى جاساقتاۋدىڭ قولايلى قۇرالىنا اينالادى. ناتيجەسىندە ولار ەكسترەميستىك جانە تەرروريستىك قىلمىستاردى جاساۋ جولىنا كوشەدى», - دەلىنگەن ءباسپاسوز بايانىندا. وسى فاكتورلاردى ەسكەرە وتىرىپ, بىلتىر اقتوبە وبلىسىندا تۇرعىنداردىڭ الەۋمەتتىك-ەكونوميكالىق پروبلەمالارىن شەشۋ جونىندەگى جوبا ىسكە اسىرىلعان. وعان تەولوگ, تاجىريبەلى يمام, دارىگەر, قارجىگەر, پسيحولوگ جانە جۇمىسپەن قامتۋ ورتالىعىنىڭ قىزمەتكەرلەرىن قوسا العاندا 230 بىلىكتى مامان تارتىلدى. ەكسترەميزم مەن تەرروريزمگە قارسى ءىس-قيمىلدىڭ ماڭىزدى بولىگى  ينتەرنەتتى پايدالانا وتىرىپ قارسى ناسيحات جۇرگىزۋ. جالپى, 2016 جىلى باس پروكۋراتۋرا اقپارات جانە كوممۋنيكاتسيالار مينيسترلىگىنە ينتەرنەت-رەسۋرستاردىڭ 33 ماتەريالىنا قول جەتىمدىلىكتى ۋاقىتشا توقتاتۋ بويىنشا شارالار قابىلداۋ تۋرالى 7 ۇيعارىم ەنگىزدى. مازمۇنىندا ەكسترەميزم مەن تەرروريزمدى ناسيحاتتايتىن 95 سىلتەمە وقشاۋلاندى.