قانات يسلام مەن ساۋل الۆارەس جەكپە-جەك وتكىزە مە؟

اۆستراليالىق پروموۋتەر مايك التامۋرا ءبىرىنشى ورتا سالماقتا WBO Intercontinental جانە WBA Fedelatin بەلبەۋلەرىنىڭ يەگەرى قازاقستاندىق قانات يسلام مەن ءدال وسى سالماقتا WBO نۇسقاسى بويىنشا الەم چەمپيونى ساۋل «كانەلو» الۆارەس اراسىندا ءوتۋى مۇمكىن جەكپە-جەك جايلى وي ءبولىستى. «بۇل كەزدەسۋ ۇيىمداستىرىلادى دەگەن ويدامىن, بىراق جاقىن ارادا وتپەيتىن سياقتى. ناقتى جاۋاپتى «Golden Boy» مەن الۆارەس قانا بەرە الادى. «قازاق» وسى قالپىندا جالعاستىرا بەرەر بولسا, ايگىلى بوكسشىلارمەن جۇدىرىقتاساتىن كۇندەرى دە كوپ كۇتتىرمەس», – دەدى التامۋرا. 18 اقپان كۇنى قانات يسلام اقش-تىڭ دەلاۆەر شتاتىنداعى ۋيلمينگتون قالاسىندا برازيليالىق روبسون اسسيسپەن جۇدىرىقتاسىپ, ءبىرىنشى راۋندتا-اق نوكاۋتپەن جەڭگەن. جەكپە-جەكتەن كەيىن ول ساۋل الۆارەستى, ميگەل كوتتونى ايقاسقا شاقىردى. وسى جەڭىسىنىڭ ارقاسىندا BoxRec پورتالىنىڭ نۇسقاسى بويىنشا pound-for-pound (ر4ر) رەيتينگىندە ۇزدىك ۇشتىككە جاقىنداي ءتۇستى. ايتا كەتەيىك, جاقىندا عانا كاسىپقوي بوكسقا اۋىسقان قازاقستاندىق دانيار ەلەۋسىنوۆ پەن يۆان دىچكو مايك التامۋرانىڭ كومپانياسىمەن كەلىسىمشارتقا وتىرعان.