باقىت سۇلتانوۆ قۇرىلىس سالاسىنىڭ باستى پروبلەمالارىن اتادى

ۇكىمەتتىڭ بۇگىنگى وتىرىسىندا قر قارجى ءمينيسترى باقىت سۇلتانوۆ مەملەكەتتىك ساتىپ الۋلار اياسىنداعى قۇرىلىس كەلىسىمشارتتارىن قازىناشىلىق باقىلاۋدىڭ جاڭا ۇلگىسىن تانىستىردى. پرەمەر-مينيستر باقىتجان ساعىنتاەۆ ءوز كەزەگىندە مەملەكەت قارجىسىنا سالىناتىن نىسانداردىڭ ساپاسىن بارىنشا كوتەرۋدى كوزدەيتىن وسى ءبىر تاجىريبەنى كەڭىنەن ەنگىزۋدى تاپسىردى, دەپ حابارلايدى قازاقپارات. مينيستر سۇلتانوۆتىڭ ايتۋىنشا, بۇگىندە مەملەكەتتىك ساتىپ الۋلار سالاسىندا بيۋدجەت اقشاسىن جىمقىرۋ فاكتىلەرى از ەمەس. سونىڭ سالدارىنان مەملەكەتتىك تاپسىرىس بويىنشا سالىناتىن قۇرىلىس نىساندارىنىڭ ساپاسى سىن كوتەرمەيدى. قۇرىلىس كومپانيالارى بولسا, جوباعا سان الۋان وزگەرىستەردى ەنگىزىپ, نىساندى پايدالانۋعا بەرۋ مەرزىمىن كەيىنگە شەگەرىپ جاتادى. بۇدان بولەك, قۇرىلىس سالاسىندا جالعان كاسىپورىندار كوپ. وسىلايشا, ساپا دا ورىندالمايدى, سالىق تا تولەنبەيدى. "قازىرگى مەxانيزمگە سايكەس, بيۋدجەت قاراجاتى مەردىگەرلەردىڭ بانكتەردەگى ەسەپ-شوتتارىنا اۋدارىلعاندا تەكسەرىلەدى. ودان كەيىن قاراجاتتىڭ جۇمسالۋى باقىلانبايدى. سول سەبەپتى ونى قولما-قول اقشاعا اينالدىرۋ جاعدايلارى بولىپ جاتادى. وسىعان بايلانىستى مەملەكەتتىك ساتىپ الۋلار سالاسىنداعى قۇرىلىس كەلىسىمشارتتارىنا قازىناشىلىق باقىلاۋ جۇيەسىن ەنگىزۋ ۇسىنىلادى. اتالعان جۇيە تولەمدەردىڭ اشىقتىعىن, سالىقتاردىڭ تولىققاندى تولەنۋىن, قۇرىلىس ساپاسىنىڭ باقىلانۋىن, بيۋدجەت قاراجاتىنىڭ ماقساتقا ساي پايدالانۋىن جانە ساتىپ الۋلاردا وتاندىق ءونىمنىڭ ارتۋىن قامتاسىز ەتەدى. ءسوز جوق, بۇل جاڭالىق قۇرىلىس سالاسىنا اۋىر تيەدى. دەگەنمەن, ونىڭ ارقاسىندا قۇرىلىس نىساندارىنىڭ ساپاسىن كوتەرىپ, بيۋدجەت قاراجاتىنىڭ ءتيىمدى جۇمسالۋىن قامتاماسىز ەتۋگە مۇمكىندىك بار", - دەيدى سۇلتانوۆ. ونىڭ ايتۋىنشا, جاڭا جۇيە اياسىندا بارلىق مەردىگەرلەر مەن سۋبمەردىگەرلەردىڭ ەسەپ-شوتتارى قازىناشىلىق ورگانداردا اشىلادى. ال ارنايى سۋپەرۆايزەرلەر مەن ينجينيرينگتىك كومپانيالار قۇرىلىس ساپاسىن باقىلايدى. بيۋدجەت قاراجاتىنىڭ ءتيىمدى جۇمسالۋىن مەملەكەتتىك كىرىستەر كوميتەتى دە قاداعالاپ وتىرادى. ازىرشە, اتالعان جۇيە نەگىزىندە پيلوتتىق جوبامەن استانا, اقمولا مەن قاراعاندى وبلىستارىندا ءتورت قۇرىلىس نىسانىن سالۋ جوسپارلانعان. وسىدان كەيىن وتاندىق زاڭناماعا وزگەرىستەر مەن تولىقتىرۋلار ەنگىزىپ, ول تاجىريبەنى رەسپۋبليكا بويىنشا تاراتۋ جوسپارى بار. ۇكىمەت باسشىسى باقىتجان ساعىنتاەۆ اتالعان جوسپاردى مىندەتتى تۇردە ىسكە اسىرىپ, كەلەسى جىلدان باستاپ بارلىق ايماقتاردا ەنگىزۋدى تاپسىردى. "مەن بىلەمىن, قازىرگى پيلوتتىق جوبانى ىسكە اسىرۋعا كەدەرگى جاسايتىندار دا بولادى, قارسىلىق بىلدىرەتىندەر دە شىعادى. وعان قاراماي, وسى جۇيەنى ويداعىداي جۇزەگە اسىرۋدى تاپسىرامىن. بالكىم, كەلەسى جىلدان باستاپ بارلىعى سوعان كوشەتىن بولادى", - دەپ اتاپ كورسەتتى پرەمەر-مينيستر.