ەلوردالىق كاسىپكەرلەرگە جەكە مەنشىك بالاباقشا اشۋ جولدارى ءتۇسىندىرىلدى

استانادا ەلوردالىق وقۋشىلار سارايىنىڭ بازاسىندا جەكە مەنشىك بالاباقشا اشۋعا نيەت تانىتقان بيزنەس-قوعامداستىق وكىلدەرى ءۇشىن «ءمجا شەڭبەرىندە مەكتەپكە دەيىنگى ۇيىمداردى اشۋ بويىنشا كاسىپكەرلەردىڭ باستامالارىن قۇقىقتىق جانە كوسۋلتاتسيالىق قولداۋ» تاقىرىبىندا اشىق ەسىك كۇندەرى ءوتتى. شارانىڭ ۇيىمداستىرۋشىلارى  ەلوردا اكىمدىگىنىڭ قولداۋىمەن ءبىلىم باسقارماسى كاسىپكەرلىك جانە ونەركاسىپ باسقارماسىمەن بىرلەسە وتىرىپ. سونىمەن بىرگە, كاسىپكەرلەرگە قازاقستاندىق مەكتەپكە دەيىنگى ۇيىمدار قاۋىمداستىعىنىڭ, باس پروكۋراتۋرانىڭ, «اتامەكەن» ۇكپ, «دامۋ» كاسىپكەرلىكتى دامىتۋ قورى» اق, قارجى, اۋىل شارۋاشىلىعى, ۇلتتىق ەكونوميكا مينيسترلىكتەرىنىڭ جانە ەكىنشى دەڭگەيدى بانكتەردىڭ قۇرىلىمدىق بولىمشەلەرىنىڭ ماماندارى «ءبىر تەرەزە» قاعيداتى بويىنشا قىزمەت كورسەتەدى. تاڭعى ساعات 9-دان باستاپ جەكە مەنشىك مەكتەپكە دەيىنگى ۇيىم اشۋعا نيەتتى كاسىپكەرلەرگە اتالعان ۇيىمدى اشۋ ارەكەتتەرىنىڭ كەزەكتىلىگى تۋرالى اقپارات بەرىلۋدە. سونداي-اق, بيزنەسمەندەرگە مەكتەپكە دەيىنگى مەكەمەنى اشۋ جانە ونىڭ ارى قاراي جۇمىس ىستەۋى ءۇشىن قويىلاتىن تالاپتاردىڭ ءتىزىمى, مەكتەپكە دەيىنگى تاربيە مەن وقىتۋعا مەملەكەتتىك ءبىلىم تاپسىرىسىن ورنالاستىرۋ ەرەجەلەرى ءتۇسىندىرىلىپ, سونداي-اق, «بيزنەستىڭ جول كارتاسى - 2020» باعدارلاماسى شەڭبەرىندە بالاباقشالاردى قولداۋ جانە دامىتۋ بويىنشا كونسۋلتاتسيالار بەرىلۋدە. قىزىعۋشىلىق تانىتقان تۇلعالاردىڭ دەنى - ايەلدەر, دەيدى شارانىڭ ۇيىمداستىرۋشىلارى. «استانا قالاسىنىڭ اكىمدىگى بىرنەشە باعدارلامانى ىسكە قوستى, سولاردىڭ ءبىرى - «ستارت-بيزنەس استانا». اتالعان باعدارلامانىڭ شەڭبەرىندە ءىسىن ەندى باستاعان كاسىپكەر ەكىنشى دەڭگەيلى بانكتەردەن 8/5% مولشەرلەمەمەن نەسيە الا الادى. وعان قوسا, «بيزنەستىڭ جول كارتاسى - 2020» شەڭبەرىندە مەكتەپكە دەيىنگى وقۋدى ۇيىمداستىرۋ جوباسىن ىسكە اسىرۋدا كومەك كورسەتە الامىز. سونداي-اق, ەگەر كاسىپكەر بالاباقشا سالسا, جول كارتاسىنىڭ شەڭبەرىندە وعان بارلىق مەملەكەتتىك ورگانداردىڭ تەكسەرىسىنەن وتكەن سوڭ تەگىن ينفراقۇرىلىم بەرىلەدى. مەملەكەتتىك-جەكە مەنشىك ارىپتەستىكتىڭ شارتتارى ءوزارا ءتيىمدى. مەملەكەت بالالاردى قامتيدى, جاڭا جۇمىس ورىندارى اشىلادى, سالىق تۇسەدى, ال كاسىپكەر ءوز بيزنەسىن دوڭگەلەتىپ, كىرىسىن كوبەيتىپ, مۇمكىندىكتەرىن ارتتىرادى», - دەيدى كاسىپكەرلىك جانە ونەركاسىپ باسقارماسى باسشىسىنىڭ ورىنباسارى ءاليا قوجاباەۆا. ۆەدومستۆو ماماندارىنىڭ ايتۋىنشا, بۇگىنگى كۇنى استانادا «بيزنەستىڭ جول كارتاسى - 2020» باعدارلاماسى شەڭبەرىندە مەملەكەتتەن قولداۋ تاپقان 30-دان اسا مەكتەپكە دەيىنگى مەكەمە جۇمىس ىستەيدى. ولاردىڭ ىشىندە 3 ملن تەڭگە كولەمىندە قايتارىمسىز مەملەكەتتىك گرانتقا يە بولعان ءبىر جوبا بار. اتاپ وتەرلىگى, اكتسيا وتكەن ءبىر ساعاتتىڭ ىشىندە ماماندارعا جۇزدەن اسا كاسىپكەر جۇگىندى. ازاماتتاردىڭ بەلسەندىلىگىن ەسكەرە وتىرىپ, ەلوردا اكىمدىگى مۇنداي شارالاردى جۇيەلى تۇردە وتكىزىپ تۇرماق.