قازاقستاندا كولەڭكەلى ەكونوميكا كولەمى ءىجو-ءنىڭ 20% كەم ەمەس

كولەڭكەلى ەكونوميكانى ازايتۋ, قۇرىلىس بارىسىنا مونيتورينگ جۇرگىزۋدى كۇشەيتۋ, بيۋدجەت قاراجاتىن وڭتايلى پايدالانۋ ماقساتىندا قارجى مينيسترلىگى قۇرىلىس بويىنشا مەملەكەتتىك ساتىپ الۋلاردى قازىناشىلىق سۇيەمەلدەۋدى ەنگىزۋدى ۇسىندى. بۇل تۋرالى پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا قارجى ءمينيسترى باقىت سۇلتانوۆ باياندادى, دەپ جازادى primeminister.kz. ءمينيستردىڭ ايتۋىنشا, ۇلتتىق ستاتيستيكا ورگاندارىنىڭ رەسمي مالىمەتتەرى بويىنشا قازاقستاندا كولەڭكەلى ەكونوميكا كولەمى ءىجو-ءنىڭ 20% كەم ەمەس. ونىڭ باستى قۇراۋشىلارىنىڭ ءبىرى مەملەكەتتىك ساتىپ الۋلار كەزىندە جالعان كاسىپورىندار ارقىلى قاراجاتتى قولما-قول اقشاعا اينالدىرۋ ارقىلى بيۋدجەت قاراجاتىن جۇمساۋمەن بايلانىستى قىلمىستار بولىپ تابىلادى. مۇندايدا بولىنگەن اقشا قاراجاتىنىڭ ۇشتەن ءبىر بولىگى «قۇرىلىس» جانە «ساۋدا» سالالارىنا تيەسىلى. بيۋدجەت زاڭناماسى مەن مەملەكەتتىك ساتىپ الۋلار تۋرالى زاڭدى بۇزۋدىڭ باسىم ۇلەسى قۇرىلىس سالاسىنا تيەسىلى. مكك مالىمەتتەرى بويىنشا 2016 جىلى 380 قىلمىستىق ءىستىڭ 115-ءى قۇرىلىس سالاسىنا تيەسىلى, بۇل 30,2% قۇرايدى. جوعارىدا اتالعان ولقىلىقتاردى جويۋ ماقساتىندا قۇرىلىس بويىنشا مەملەكەتتىك ساتىپ الۋلاردى قازىناشىلىق سۇيەمەلدەۋ ەنگىزىلەدى, بۇل تولەمدەردىڭ ايقىندىعى, سالىقتىڭ تولىق تولەنۋىن, قۇرىلىس ساپاسىن باقىلاۋدى, بيۋدجەت قاراجاتىن ماقساتتى پايدالانۋدى, قازاقستاندىق قۇراۋىشتى باقىلاۋدى قامتاماسىز ەتۋگە مۇمكىندىك بەرەدى.   «قۇرىلىس سالاسىندا مەملەكەتتىك ساتىپ الۋلاردى قازىناشىلىق سۇيەمەلدەۋ تەتىگى مەملەكەتتىك ورگاندارمەن, بيزنەس قاۋىمداستىعىمەن حالىقارالىق تاجىريبەنى جانە كۆازيمەملەكەتتىك جانە بانك سەكتورىنداعى ەسەپشوتتاردى باقىلاۋدىڭ قولدانىستاعى تەتىكتەرىن تالقىلاۋدى ەسكەرۋمەن ازىرلەندى», - دەپ اتاپ ءوتتى ب.سۇلتانوۆ. حالىقارالىق تاجىريبەنى ەسكەرۋمەن العاش رەت تاجىريبەگە جوبانى باسقاراتىن سۋپەرۆايزەرلەر (ينجينيرينگتىك كومپانيالار) قىزمەتتەرى تارتىلاتىن بولادى, ولار قۇرىلىس ساپاسىن عانا ەمەس, بارلىق شىعىنداردىڭ نەگىزدى جۇمسالۋىن قاداعالايدى. بيىل بۇل تەتىك ءۇش ايماقتا (استانا قالاسىندا, اقمولا جانە قاراعاندى وبلىستارىندا) اپروباتسيالاناتىن بولادى. قازىناشىلىق سۇيەمەلدەۋدى ەنگىزۋ بويىنشا جول كارتاسى بەكىتىلدى. پيلوتتىق جوبانى ەنگىزۋ قورىتىندىلارى بويىنشا قۇرىلىس سالاسىندا مەملەكەتتىك ساتىپ الۋلاردى قازىناشىلىق سۇيەمەلدەۋدى نورماتيۆتىك بەكىتۋ ءۇشىن قر زاڭناماسىنا تۇزەتۋلەر پىسىقتالاتىن بولادى, دەپ تۇيىندەدى ءسوزىن مينيستر. ەسكە سالايىق, مەملەكەت باسشىسى ««قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا بيۋدجەت شىعىستارىنىڭ تيىمدىلىگىن تۇبەگەيلى ارتتىرۋ نەگىزگى مىندەتىن قويدى.