اوك-ءنى دامىتۋ شارالارىن ىسكە اسىرۋ ءۇشىن 2,4 ترلن تەڭگە قاجەت

اۋىل شارۋاشىلىعى مينيسترلىگى ازىرلەگەن 2017-2021 جىلدارعا ارنالعان اوك مەملەكەتتىك باعدارلاماسىن ىسكە اسىرۋدىڭ شارالار جوسپارى مەملەكەتتىك باعدارلامانىڭ 8 مىندەتى بويىنشا 134 شارادان تۇرادى. بۇل تۋرالى بۇگىن  قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ مالىمدەدى. «اۋىل شارۋاشىلىعىنا قارجىلاي قولداۋ كورسەتۋ قورىمەن ينۆەستيتسيالىق سۋبسيديالار ەسەبىنەن العاشقى تولەمدى وتەۋ ارقىلى كووپەراتيۆتەردى باسىم نەسيەلەندىرۋ, سونىمەن قاتار ققس بويىنشا شىعىنداردى وتەۋگە كووپەراتيۆتەرگە سۋبسيديالار ءبولۋ قاراستىرىلۋدا. سونىمەن قاتار, اۋىل شارۋاشىلىعى, ەڭبەك جانە حالىقتى الەۋمەتتىك قورعاۋ مينيسترلىكتەرى مەن اكىمدىكتەر اراسىندا ءار جىلعا وڭىرلەر تۇرعىسىنان العانداعى ناقتى كورسەتكىشتەرى بار ۇشجاقتى جوسپارلارعا قول قويىلاتىن بولادى. 2017 جىلى ارەكەت ەتۋشى كووپەراتيۆتەر سانىن 326-عا دەيىن جەتكىزۋ جوسپاردا بار», - دەدى ءبىرىنشى ۆيتسە-مينيستر. «بيىل 21 اقپاندا جوسپار جوباسى رەسپۋبليكالىق بيۋدجەتتىك كوميسسيا وتىرىسىندا ماقۇلداندى, سونىمەن قاتار پرەزيدەنت اكىمشىلىگىمەن, ءتيىستى مينيسترلىكتەرمەن جانە ۆەدومستۆولارمەن, وبلىستاردىڭ, استانا جانە الماتى قالالارىنىڭ اكىمدىكتەرىمەن بەكىتىلدى», - دەدى ايتۋعانوۆ. ونىڭ ايۋتىنشا, سۋ رەسۋرستارىن ءتيىمدى پايدالانۋمەن قامتاماسىز ەتۋ, سۋ ءسىڭىرۋ جۇيەلەرىنىڭ ينفراقۇرىلىمىن قالپىنا كەلتىرۋ, جاڭا سۋ قويمالارىنىڭ قۇرىلىسى سەكىلدى شارالار مەملەكەت باسشىسىنىڭ  اينالىمعا 600 مىڭنان استام گەكتار جەردى جۇيەلى تۇردە سۋلاندىرۋدى ەنگىزۋ, ولاردىڭ اۋدانىن 2021 جىلى 2 ملن گەكتارعا دەيىن جەتكىزۋ تۋرالى بەرگەن تاپسىرماسىن اتقارۋعا مۇمكىندىك بەرەدى. 2017-2021 جىلداردىڭ شارالار جوسپارىن ىسكە اسىرۋعا شامامەن 2,4 ترلن تەڭگە قاجەت. ونىڭ ىشىندە رەسپۋبليكالىق بيۋدجەت ەسەبىنەن – 1,2 ترلن تەڭگە, جەرگىلىكتى بيۋدجەتتەن – 852 ملرد تەڭگە, شقۇ مەن شارۋاشىلىق سۋبەكتىلەرىنەن – 306 ملرد تەڭگە.