قازىر 7 مىڭ مەكتەپتە ينتەرنەت ورناتىلعان - ساعاديەۆ

قازىرگى كەزدە 7 000 مەكتەپتە ينتەرنەت ورناتىلعان. سونىڭ ىشىندە جىلدامدىعى 4 مب/س اساتىن ينتەرنەت تەك 2000 مەكتەپتە عانا بار. بۇل تۋرالى بۇگىن ۇكىمەت وتىرىسىندا قر ءبىلىم جانە عىلىم ءمينيسترى ەرلان ساعاديەۆ ايتتى. «ەلىمىزدىڭ مەكتەپتەرىندەگى ينتەرنەتتى ورتالىقتاندىرۋ كەرەك. سونداي-اق بارلىق سىنىپقا Wi-Fi قوندىرۋ قاجەت. بۇل وتە ماڭىزدى. مۇنداي اپپارات ورناتۋ اسا قىمبات ەمەس», - دەدى مينيستر. سونىمەن قاتار ول بالالارعا ارنالعان جاڭا دەڭگەيلى تسيفرلىق ءبىلىم رەسۋرستارىن دامىتۋ كەرەكتىگىن اتاپ ءوتتى. «تسبر – بەينە جانە ينتەرناكتيۆتى ساباقتار. ەلىمىزدەگى مىڭنان استام مەكتەپ, ولاردىڭ ىشىندە نازارباەۆ زياتكەرلىك مەكتەپتەرى «BilimMediaGroup» كومپانياسى ۇسىنعان رەسۋرستاردى 2014 جىلدان باستاپ قولدانىپ كەلەدى. بيىلعى جىلى 11 مىڭنان استام «ۇشتىك» - كومپيۋتەر, پروتسەسسور جانە ەكراننان تۇراتىن جيناقتار الىنباق. ەڭ الدىمەن اۋىل مەكتەپتەرى جانە ينتەرنەتكە قوسىلۋ مۇمكىندىكتەرى جوق ءبىلىم وشاقتارى جابدىقتالادى», - دەدى ساعاديەۆ. مينيستر بۇگىنگى تاڭدا 73 اقپاراتتىق جۇيە بارىن باياندادى. ولاردىڭ ءبارى مالىمەتتەردى 4 پلاتفورماعا جىبەرەدى. ءبىرىنشىسى – ۇبمب (ۇلتتىق ءبىلىم بەرۋ مالىمەتتەر بازاسى) – بۇل ءبىلىم بەرۋ جۇيەسى بويىنشا بارلىق اكىمشىلىك اقپارات. ەكىنشىسى – بۇل ەلەكتروندى كۇندەلىك – اعىمداعى ۇلگەرىم, مەكتەپتەر مەن تجانەكب-ءنىڭ اكادەميالىق اقپاراتى. ءۇشىنشىسى – «بۇلتتى» بۋحگالتەريا – ەلىمىز بويىنشا بارلىق ءبىلىم بەرۋ ۇيىمدارىنىڭ بىرىڭعاي بۋحگالتەرياسى. جبببج (جوعارى ءبىلىمدى باسقارۋدىڭ بىرىڭعاي جۇيەسى) – جوو-لاردىڭ اقپاراتتىق جۇيەسى. «اتالعان پلاتفورمالاردى ەنگىزۋ ءۇشىن مەكتەپتەردەگى ينتەرنەت جىلدامدىعىن ارتتىرۋ جانە ولار ءۇشىن بايلانىس تولەمىن بىرىڭعاي ورگاندا ورتالىقتاندىرۋ, سونداي-اق اقپاراتتىق قاۋىپسىزدىكتى قامتاماسىز ەتۋگە جاۋاپكەرشىلىكتى جۇكتەۋ قاجەت», - دەپ اتاپ ءوتتى ە. ساعاديەۆ. ايتا كەتەيىك, بىلتىر وسىنداي 7 300 كومپلەكت الىنسا, 2018 جىلى 12 مىڭ جيناق ساتىپ الىنادى.