جامبىل وبلىسىندا يەسىز سۋ قويمالارى بەلگىلى بولدى

وڭىردە سۋ شارۋاشىلىقتارىن تولىق جوندەۋدەن وتكىزۋ جانە تولىققاندى قارجىلاندىرۋ ءۇشىن كوممۋنالدىق مەنشىكتەن رەسپۋبليكالىق مەنشىككە وتكىزۋ جالعاسىپ كەلەدى. بۇل تۋرالى جانە جامبىل وبلىسىنىڭ اۋماعىنداعى سۋ شارۋاشىلىق نىساندارىنىڭ جاعدايى كەزەكتى وبلىستىق اكىمدىكتەگى جينالىستا ايتىلدى, دەپ حابارلايدى قازاقپارات. «سۋ قويمالارى قازىرگى كوكتەمدە قاۋىپ توندىرمەيدى, ولاردىڭ تولۋ دەڭگەيى 50-70% شاماسىندا. جىل سايىن جوندەۋ جۇمىستارىن جۇرگىزۋدى قارجىلاندىرۋ ارتىپ كەلەدى. 2016 جىلى وبلىستىق بيۋدجەتتەن كوممۋنالدىق مەنشىكتەگى 18 گيدرونىساندى جوندەۋگە 206,2 ملن تەڭگە ءبولىندى. بيىل وسى ماقساتقا 402 ملن تەڭگە ءبولۋ جوسپارلانىپ وتىر. «گيدرونىسانداردى ءتيىمدى پايدالانۋ جانە تولىقتاي جوندەۋ ءۇشىن كوممۋنالدىق مەنشىكتەن رەسپۋبليكالىق مەنشىككە 172 ارنا بەرىلدى. بيىل وسى ۇدەرىس جالعاسادى. ەكىنشى كەزەڭدە رەسپۋبليكالىق مەنشىككە 280 نىساندى وتكىزۋ كوزدەلىپ وتىر. قازىر وبلىستىڭ كوممۋنالدىق مەنشىگىندە 124 ىشكى شارۋاشىلىق ارناسى بار, 90 ارنا يەسىز قالىپ وتىر. ءار ارناداعى جەردەگى جۇمىستار جوباسىن, مەملەكەتتىك اكتىلەردى جانە تەحنيكالىق تولقۇجاتىن ازىرپلەۋگە وبلىس بيۋدجەتىنەن 225 ملن تەڭگە بولىنەدى», – دەدى جامبىل وبلىسىنىڭ تابيعي رەسۋرستار مەن تابيعاتتى پايدالانۋدى رەتتەۋ باسقارماسىنىڭ باسشىسى سەرىك قويباقوۆ. باسقارما باسشىسى جامبىل وبلىسىندا 117 سۋ قويماسى بار ەكەندىگىن ءمالىم ەتتى. ونىڭ بەسەۋى رەسپۋبليكالىق مەنشىكتە, بەسەۋى جەكە تۇلعانىڭ يەلىگىندە, 105-ءى كوممۋنالدىق مەنشىكتە. وبلىستا بارلىق سۋ قويمالارىن ەسەپكە الۋدى جۇرگىزۋ بويىنشا كوميسسيا قۇرىلعان.