XXI عاسىردىڭ سوڭىنا دەيىن جەر بەتىندەگى جانۋارلاردىڭ جارتىسى جويىلۋى مۇمكىن

قازىرگى جانۋارلاردىڭ جارتىسى XXI عاسىردىڭ سوڭىنا دەيىن جويىلادى. مۇنداي بولجامدى ۆاتيكاندا وتكەن سيرەك كەزدەسەتىن جانۋارلاردى ساقتاپ قالۋ شارالارىن تالقىلاۋعا ارنالعان كونفەرەنتسيادا الەمدەگى جەتەكشى بيولوگتار جاسادى. مامانداردىڭ دەرەگى بويىنشا قازىرگى تاڭدا بەس ءتۇرلى جانۋاردىڭ ءبىر ءتۇرى جويىلۋدىڭ الدىندا تۇر. عالىمدار ەسكەرتكەندەي, وسىنداي قاۋىپ زاماناۋي تەحنوگەندى وركەنيەتتىڭ سالدارىنان بولعان. ول تەك جەر رەسۋرستارىن پايدالانىپ, ورنىنا ەشقانداي پايدا اكەلمەستەن ەكوجۇيەنى جويۋدا, دەپ حابارلادى قازاقپارات. مىسال رەتىندە ولار قورىقتار ورنالاسقان جەرلەردەگى سيرەك مەتالداردى ءوندىرۋدى, مارجان ريفتەرىن جويۋدى, براكونەرلەردىڭ ءىسىن ايتىپ ءوتتى. كونفەرەنتسياداعى باستى بايانداماشى رەتىندە ستەندفورد ۋنيۆەرسيتەتىنىڭ بيولوگى پول ەرليح مالىمدەمە جاسادى. ونىڭ بولجامىنشا, ەگەر جاعدايدى باقىلاۋعا الماسا, عاسىر سوڭىندا جەردەگى حالىق سانى 12 ميلليارد ادامعا جەتكەندە بارلىق وركەنيەت قۇردىمعا كەتەدى. «ۆاتيكان كونفەرەنتسيا وتكىزۋدى ءوز موينىنا الدى, دەمەك بۇل دەگەنىمىز – جەردى ساقتاپ قالۋ ماسەلەسىندە ءدىن مەن عىلىم اراسىنداعى الاۋىزدىق جويىلدى دەگەن ءسوز», – دەپ اتاپ ءوتتى ءىس-شارانىڭ ۇيىمداستىرۋشىسى ەكونوميست سەر پارت.