سۇلتانماحمۇت شىعارمالارى جىل تاڭداۋى اتاندى

«ءبىر ەل – ءبىر كىتاپ» رەسپۋب­ليكالىق اكتسياسى سوڭعى ون جىلدان بەرى ۇلتتىق ادەبيەتىمىزدەگى ەڭ ۇزدىك دەگەن تۋىندىنى وقۋ جانە ناسيحاتتاۋ ىسىمەن تانىلىپ ءجۇر. ياعني, قوعامنىڭ وتاندىق ادەبيەتكە, ونىڭ ىشىندە كلاسسيكاعا, قازىرگى ادەبيەت پەن پوەزياعا دەگەن قىزىعۋشىلىعىن جوعارىلاتا تۇسۋگە دانەكەر بولۋدا. كەشەگى اپتادا ۇلتتىق اكادەميالىق كىتاپحانادا وتكەن «ءبىر ەل – ءبىر كىتاپ» اكتسياسىندا زيالى قاۋىم وكىلدەرى «جىل كىتابى-2017» تاڭداۋى بويىنشا ۇسىنىستاردى تالقىعا سالدى. جيىن بارىسىندا «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى بيىل اقىن سۇلتانماحمۇت تورايعىروۆتىڭ شىعارمالارىن وقۋدى ۇسىندى. – بيىل الاش ۇكىمەتىنىڭ قۇرىلعانىنا 100 جىل تولىپ وتىر, – دەيدى بۇل جونىندە دارحان قىدىرالى. – وسىناۋ اتاۋلى جىل ىشىندە جاس­تارىمىز ءتالىمىن, تاعىلىمىن تانىپ بىلسە دەگەن نيەتپەن س.توراي­عىروۆتىڭ شىعارمالارىن وقۋدى ۇسىنار ەدىم. ارقالى اقىن­نىڭ رۋحتى جىرلارى جاستار­دى وتان­شىلدىققا تاربيەلەپ, تاعى­لىمدى عۇمىرى كوپكە ونەگە بولاتىنى انىق. سۇلتانماحمۇتتىڭ «الاش تۋى استىندا, كۇن سونگەنشە ءسون­بەيمىز» دەگەن فيلوسوفياسى ءبۇ­گىندە ەلباسىمىز ايتىپ جۇرگەن «ماڭگىلىك ەل» يدەياسىمەن ۇندەسىپ جاتىر. سوندىقتان اقىننىڭ شىعار­مالارىن جاستارىمىزعا ۇلگى رەتىندە كورسەتۋىمىزگە بولادى. قازاقستان جازۋشىلار وداعى استانا قالالىق فيليالىنىڭ توراعاسى, اقىن نەسىپبەك ايت ۇلى «س.تورايعىروۆ الەۋمەتتىك جىرلارىمەن تانىلعان ابايدان كەيىنگى اقىنداردىڭ ءبىرى دەۋگە ابدەن بولادى. ۇلت ءۇشىن كۇرەسكەن وسىناۋ جالىندى اقىننىڭ شىعارمالارىن وقۋعا كەڭەس بەرەمىن», دەپ بۇل ۇسىنىسقا قولداۋ ءبىلدىردى. شىنىندا «قاراڭعى قازاق كوگىنە, ورمەلەپ شىعىپ كۇن بولام!» دەپ جىرلاعان رۋحتى اقىن سۇلتانماحمۇت تورايعىروۆتى ءبىل­­مەيتىن قازاق كەمدە-كەم. وتتى جىرلارىمەن قازاق پوەزياسىنىڭ كوگىنە ورمەلەپ شىققان ارقالى اقىننىڭ شىعارمالارى قانشا زامان وتسە دە ءوز ماڭىزىن جويعان جوق. سودان بولار وسى جيىننىڭ مودەراتورى, قر ۇعا اكادەميگى, پروفەسسور عاريفوللا ەسىم جانە قالامگەرلەر تۇرسىن جۇرتباي, مىرزاگەلدى كەمەل, ۇلتتىق اكادە­ميالىق كىتاپحاناسىنىڭ باسشىسى ءۇمىتحان مۇڭالباەۆا جانە كوميسسيانىڭ باسقا دا مۇشەلەرى بۇل ۇسىنىستى قىزۋ قولداپ, ۇلت ءۇشىن كۇرەسكەن جالىندى اقىن سۇل­تانماحمۇت تورايعىروۆتىڭ شىعار­مالارىن وقۋ تۋرالى وي-پىكىرلەرىن ورتاعا سالدى. ورالحان ءداۋىت, «ەگەمەن قازاقستان» استانا