قىتايمەن قاتىناس قارقىن الادى

ينۆەستيتسيالار جانە دامۋ ءمينيسترى جەڭىس قاسىمبەك قىتاي حالىق رەس­پۋب­لي­كا­سى­نا جۇمىس ساپارىمەن بارىپ, قحر كولىك مي­نيسترى لي سياوپەنمەن كەزدەستى. ەكى جاقتى كە­لىسسوز ناتيجەسىندە كورشى ەلمەن اۆياتسيا سا­لا­سىنداعى ىنتىماقتاستىقتى نىعايتۋ تۋ­رالى كەلiسiمگە كەلدى. بيىل استانا قالاسىندا وتەتىن ەكسپو-­2017 حالىقارالىق مامان­دان­دى­رىل­­عان كورمەسى قارساڭىندا الماتى-بەيجىڭ اۋە رەيسى اپتاسىنا 5-تەن-7-گە دەيىن, ال استانا­دان بەيجىڭگە اپتاسىنا 2-دەن 4-كە دەي­ىن ارتاتىن بولادى. سونداي-اق, استانا-ءۇرىم­جى جانە الماتى-ءۇرىمجى باعىتتارىنا قو­سىمشا رەيستەر اشىلماق. «بۇگىنگى تاڭدا ەكى ەل اراسىنداعى ىنتىماقتاستىق جان-جاق­تى ستراتەگيالىق ارىپتەستىككە اينالدى. بيىل يندۋستريا, كولىك سالالارى بويىن­شا ءبىر­لەسكەن جاڭا كاسىپورىنداردى ىسكە قوسۋ جوسپارلانىپ وتىر جانە ەكونوميكانىڭ ءتۇرلى سالالارىن قامتيتىن جاڭا جوبالاردىڭ قۇرىلىسى باستالادى. ءبىز ترانزيتتىك-كولىك سالاسىنداعى ەۋرازيالىق الەۋەتتى مەيلىنشە جۇزەگە اسىرۋعا مۇددەلىمىز», دەدى مينيستر. بولجام بويىنشا 2020 جىلعا قاراي اي­ماقتاعى ساۋدا كولەمى 1,2 ترلن دوللارعا جە­تەدى. ال, قىتاي مەن ەۋروپالىق وداق ارا­سىن­داعى تاۋار اينالىمى 800 ملرد دوللاردى قۇ­رايتىن بولادى, جۇك تاسىمالىنىڭ كولەمى 170 ملن تونناعا دەيىن ارتادى. «ءبىز ءۇشىن قىتايدان ورتالىق ازيا ەل­دە­رى­نە, رەسەي, ەۋروپا, سونىمەن قا­تار, يران مەن تاياۋ شىعىس ەلدەرىنە كونتەينەرلىك تا­سىمالدى ارتتىرۋ وزەكتى ماسەلە بولىپ تۇر. قىتاي-قازاقستان-ەۋروپا باعىتى بويى­نشا كونتەينەرلىك جۇك تاسىمالداۋ – ۇتىم­دى جول. قىتاي-ەۋروپا باعىتى بوي­ىنشا 2016 جىلى قاڭتار-قاراشا ايلا­رى ارالىعىندا 725 پويىز­بەن 62 816 كون­تەينەر تاسىمالداندى. ال, ەۋروپا-قى­تاي باعىتى بويىنشا 30 187 كونتەينەر تاسىمالدانعان. پويىزداردىڭ ورتاشا جىل­دامدىعى تاۋلىگىنە 950 شاقىرىمدى قۇرايدى», دەدى جەڭىس قاسىمبەك. اسحات رايقۇل, «ەگەمەن قازاقستان»