سيرياداعى گۋمانيتارلىق احۋال تالقىلاندى

قازاقستان دەلەگاتسياسى بۇۇ قاۋىپسىزدىك كەڭەسىنىڭ سيرياداعى گۋمانيتارلىق احۋالعا ارنالعان كەزەكتى وتىرىسىنا قاتىستى. وندا بۇۇ باس حاتشىسىنىڭ ورىنباسارى ستيۆەن و’برايەننىڭ گۋمانيتارلىق ماسەلەگە بايلانىستى حابارلاماسى تىڭدالدى. ستيۆەن و’برايەن ءوز سوزىندە سيريا­لىقتاردىڭ كوپشىلىگىنىڭ, اسىرەسە, ايەلدەر, بالالار مەن باسقا دا وسال توپتاردىڭ مۇشكىل ءحالى, سونداي-اق ەلدەگى ءدارى-دارمەك تاپشىلىعى تۋرالى قاۋىپسىزدىك كەڭەسىن حاباردار ەتتى. ماجىلىسكە قاتىسۋشىلار سيريا داعدارىسىن بەيبىت جولمەن شەشۋدەن وزگە امال جوق ەكەنىن جەتكىز­دى. سونداي-اق, جيىندا قاۋىپسىزدىك كەڭەسى­نىڭ مۇشەلەرى سيرياداعى سوعىس قيمىل­دارىن توقتاتۋ ءىسىن ىلگەرىلەتۋدە بەلسەندى ءرول اتقارعان قازاقستاننىڭ كۇش-جىگەرىن اتاپ كورسەتتى. قازاقستان دەلەگاتسياسى بۇۇ-نىڭ سيرياداعى گۋمانيتارلىق ماسەلەلەردى ۇيلەستىرۋ جونىندەگى باسقارماسىنا قاراستى گۋمانيتارلىق جانە مەديتسينا قىزمەتكەرلەرىنىڭ قاۋىپ-قاتەر­گە تولى جاعدايلارداعى جۇمىسىن جو­عارى باعالادى. بۇعان قوسا, قازاق­ستان وكىلدەرى سيريا ماسەلەسىن شەشۋ­دىڭ جالعىز ءتاسىلى رەتىندە كەلىسسوز­دەر جال­عاستىرىلۋ قاجەت ەكەنىن ءسوز ەتتى. سونىمەن قاتار, وتىرىستا سيرياداعى جانجالدى بەيبىت رەتتەۋ جولدارىن ىزدەستىرۋ بويىنشا استانا پروتسەسى بۇۇ قامقورلىعىنداعى جەنەۆا پلاتفورماسىن ساپالى تۇردە تولىقتىراتىندىعى ايتىلدى. قازاقستان جاعى جانجالداسۋشى تاراپتاردى قاراپايىم حالىقتى ادام توزگىسىز ازاپتاۋدان, قالالاردى قور­شاۋعا الۋ تاكتيكاسىن پايدالانۋ­دان تو­لى­عىمەن ءارى تەز باس تارتۋعا شاقىر­­دى. سونداي-اق, قازاقستاندىق دەلەگا­تسيا الەمدىك قوعامداستىققا گۋمانيت­ار­لىق كومەكپەن از قامتىلعان سيريا قا­لا­لارىنا قاجەتتى جاردەمدى قاۋىپسىز جانە كەدەرگىسىز جەتكىزۋ ءۇشىن بۇۇ گۋماني­تارلىق اگەنتتىكتەرىمەن ىقپالداسۋ قاجەتتىگىن ەسكەرتتى. قازاقستاندىق ديپلوماتتار يليم (قازاقستاندا تىيىم سالىنعان) توبى­نىڭ ءال-راككا مەن ەل-باب قالا­لارىن­داعى سۋ كوزدەرى, الەۋمەتتىك ينفر­ا­قۇ­رى­لىم, كوپىرلەر, جولدار مەن اۋرۋحانالاردى جويۋىن ايىپتادى. وسى رەتتە, ادام­داردىڭ ازاپتالۋىنا بايلانىستى لاڭ­كەس­تىك توپتارعا قارسى قاتاڭ شارالار قا­بىل­­داۋ قاجەتتىگىنە نازار اۋدارىلدى. دايىنداعان جولدىباي بازار, «ەگەمەن قازاقستان»