كەلىسسوزدەردىڭ جاڭا كەزەڭى

جەنەۆاداعى سيريا كەلىسسوزدەرى ءبىر جىلدىق ۇزىلىستەن كەيىن قايتا جانداندى. 23 اقپاندا باستالعان شارادا سيريادا جاڭا ۇكىمەت قۇرۋ, جاڭا كونستيتۋتسيا جوبالارىن دايىنداۋ مەن ەلدە سايلاۋ وتكىزۋ ماسەلەسى قارالۋدا. 4 ناۋرىزعا دەيىن جالعاسادى دەپ جوسپارلانعان كەلىسسوزدەر بۇرىن­عى كەلىسسوزدەرگە قاراعاندا اۋىر ءوتىپ جاتقانىن ايتادى قاتىسۋشى­لار. بۇرىنعى كەزدەسۋدە ءوزارا ءمامى­لەگە كەلۋ ماسەلەسى تالقىلانسا, سوڭ­عى رەت استانادا وتكەن قوس كەزدەسۋ­دەن كەيىن جەرگىلىكتى رەسمي بيلىك پەن وپپوزيتسيا وكىلدەرى تاتۋلاسۋ­عا نيەتتى ەكەنىن اڭعارتا باستا­دى. جالعىز شارت – استانا پروتسەسىندە قول جەتكىزىلگەن كەلىسىمدەردىڭ بۇزىلماۋى. رەسەي سيريا پروبلە­ماسىنىڭ بىرتىندەپ شەشىلىپ كەلە جاتقانىن كولدەنەڭ تارتادى جانە جالپى وسى باعىتتاعى جۇمىستارعا جوعا­رى باعا بەرىپ وتىر. ورتالىق ازيا ەل­دەرىنە ساپارى اياسىندا الماتىعا كەل­گەن رەسەي فەدەراتسياسىنىڭ پرەزي­دەنتى ۆلاديمير پۋتين قازاقستان پرەزيدەنتى نۇرسۇلتان نازارباەۆپەن كەزدەسۋىندە استانانىڭ سيريا داع­دارىسىن رەتتەۋدە ايتارلىقتاي قىزمەت اتقارعانىن اتاپ كورسەتتى. بۇۇ-نىڭ سيريا جونىندەگى ارنايى ەلشىسى ستاففان دە ميس­تۋرا دا جەنەۆاداعى كەلىسسوزدەردىڭ اشىلۋى بارىسىندا استانا پرو­تسەسىن جانە سيرياداعى ءبىتىمدى نىعاي­تۋعا قولعابىس ەتكەن رەسەي, يران, قازاقستان جانە تۇركيانىڭ كۇش-جىگەرىن جوعارى باعالادى. «استانا پروتسەسىنىڭ باستاماشىلارى – رەسەي, تۇركيا, يران جانە قازاقستانعا سيرياداعى اتىستى توقتاتۋعا قوسقان ۇلەستەرى ءۇشىن العىس ايتۋعا رۇقسات ەتىڭىزدەر. جاعدايدىڭ قازىر كۇر­دەلى ەكەنىنە قاراماستان, ىلگەرىلەۋشى­لىك بار», دەدى دە ميستۋرا. ونىڭ ايتۋىنشا, بۇل باستاما ساياسي ۇدە­رىستى جىلجىتۋ ءۇشىن مۇمكىندىكتەر «تەرەزەسىن» اشتى. «ءبىز بۇل «تەرەزەنى» پايدا­لان­عى­مىز كەلەدى», دەپ اتاپ ءوت­تى ارنايى ەل­شى. ەڭ باستى­سى, سيريا ماسەلەسىن­دە نەگىزگى كۇش­تەر – رەسەي, يران, ءتۇر­كيا ەلدەرىنىڭ ورتاق ءتىل تابىسۋى مەن باتىس­تىڭ ماسەلەگە تۇسىنىستىكپەن قاراي باس­تاۋى ايماقتاعى ساياسي داعدارىستىڭ دامىل­داۋىنا ءمۇم­كىندىك بەرگەنگە ۇقساي­دى. ال وپ­پوزيتسيالىق توپتىڭ كەلىس­ىم­گە كەلۋ­گە دەگەن نيەتى ماسەلەنىڭ شەشىم تابۋى­نا تۇرتكى بولۋى ءتيىس. ساراپ­شى­لار مۇنىڭ سەبەبىن اقش-تىڭ اي­ماقتاعى اسكەري ىقپالىن ازايتۋ باس­تا­ماسىنان ىزدەيدى. پرەزيدەنت اۋىس­قاننان كەيىن سيرياداعى باتىس ەل­دەرى ىقپالىنىڭ باسەڭدەۋى ءوڭىردىڭ ءوز بەت­ى­مەن ورتاق سوزگە توقتاۋىنا جول اشۋدا. سوڭعى كەلىسسوزگە دەيىن اتىستى توقتاتۋ ءۇشىن ءبىر ۇستەل باسىنا جينالىپ كەلگەن وكىلدەردىڭ قازىرگى وتىرىسى ەندى ەلدىڭ بىرتۇتاستىعىن قامتاماسىز ەتۋگە باعىتتالۋدا. بۇل دا سيرياارالىق كەلىسسوزدەردىڭ جاڭا دەڭگەيگە كوتەرىلگەنىن بىلدىرەدى, دەيدى ساراپشىلار. ال قازىر ءوتىپ جاتقان كەلىسسوزدەردىڭ ناقتى ناتيجەلەرى تۋرالى كەيىنىرەك بەلگىلى بولاتىنى تۇسىنىكتى. باۋىرجان مۇقانوۆ, «ەگەمەن قازاقستان»