ۋاقىت اعىمىنا ساي قۇجات
مەن – قازاقستاننىڭ مەملەكەتتىك باعدارلاماسى اياسىندا وسى ەلدە وقىعان العاشقى اۋعان ستۋدەنتىمىن. سوندىقتان, ۇنەمى قازاقستانداعى وزگەرىستەرگە, ونىڭ دامۋ باعىتىنا نازار اۋدارىپ جۇرەمىن.
جاقىندا قازاقستان پرەزيدەنتى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەل حالقىنا جولداۋىن جاريالادى. مەنىڭ ويىمشا, بۇل قۇجات قازاقستاننىڭ ەكونوميكالىق الەۋەتىن ارتتىرۋعا تىكەلەي ىقپال ەتەدى, سونداي-اق حالىقتىڭ تۇرمىسىن ودان ءارى كوتەرۋگە جول اشادى.
پرەزيدەنت نۇرسۇلتان نازارباەۆ ءوز ەلىن دامۋدىڭ داڭعىل جولىمەن باستاپ كەلەدى. وعان قازاقستاننىڭ 25 جىل كولەمىندە قول جەتكىزگەن تابىستارىن ناقتى دالەل رەتىندە ۇسىنۋعا ابدەن بولادى.
ءاربىر مەملەكەتتىڭ باسشىسى ءوز حالقىنىڭ تاريحىن, سالت-ءداستۇرىن, مادەنيەتىن جانە باسقا دا قۇندىلىقتارىن ەسكەرە كەلىپ, ەلدىڭ دامۋ باعىتىن ايقىنداۋى ءتيىس ەكەنىن اتاپ وتكىم كەلەدى. وسى ورايدا, پرەزيدەنت نۇرسۇلتان نازارباەۆ ءوز حالقىنىڭ كوڭىلىنەن شىعاتىن جۇمىستاردى جۇيەلى تۇردە اتقارۋدا.
جالپى, قازاقستان ءوز تاۋەلسىزدىگىنىڭ 25 جىلىندا حالىقارالىق جانە ايماقتىق كۇردەلى ماسەلەلەردى شەشۋدە تالايعا ۇلگى بولۋدا. مۇنداي ءىس تاتۋلىعى جاراسقان, تۇراقتىلىق پەن ورنىقتى دامۋعا قول جەتكىزگەن, ماقساتى ايقىن قۋاتتى مەملەكەتتىڭ عانا قولىنان كەلەدى.
بەسمەللا تابان,
اۋعانستان قارجى مينيسترلىگى ارنايى وپەراتسيالار دەپارتامەنتىنىڭ جەتەكشىسى
جاھاندىق جارىستىڭ ۇلى ءدۇبىرى
قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ 2017 جىلى 31 قاڭتاردا قازاقستان حالقىنا ارناعان جولداۋى بۇگىنگى كۇندەرى الەم ەلدەرىنىڭ نازارىندا. بۇل جولداۋدىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» دەپ اتالۋىنىڭ وزىندىك ءمانى بار دەپ ويلايمىن. ويتكەنى, وسى جولداۋ «قازاقستان-2030», «قازاقستان-2050» ستراتەگيالارىنىڭ, «نۇرلى جول», «100 ناقتى قادام» ۇلت جوسپارى سياقتى تۇبەگەيلى ماقساتتاردىڭ تىكەلەي جالعاسى بولىپ وتىر. قازاقستاننىڭ كوپ ۇلتتى حالقى تاۋەلسىزدىككە قول جەتكىزگەن 25 جىلدىڭ ىشىندە باتىل باستاماشىل, كورەگەن دە بولجامشىل, العىر دا تاباندى ن.ءا.نازارباەۆتاي ەلباسىنىڭ باسشىلىعىمەن ادام ايتقىسىز ۇلكەن بەلەستەردى باعىندىردى. بۇل ءسوزىمىزدىڭ بۇلتارتپاس دالەلى قازاقستاننىڭ ساياسي, ەكونوميكالىق, الەۋمەتتىك سالالاردا قول جەتكىزگەن زور تابىستارى, جاسامپاز جەتىستىكتەرى بولىپ تابىلادى. اتاپ ايتساق, قارقىندى ءوسىپ كەلە جاتقان ەكونوميكالىق كورسەتكىشتەر, اۋىر وندىرىستەردىڭ ءىرى ورتالىقتارى, جاڭادان اشىلعان جۇمىس ورىندارى, سوڭعى جىلدارى جۇزەگە اسقان ينفراقۇرىلىمدار, سارىارقاداي سايىن دالا توسىندە بوي كوتەرگەن ەلوردا – اسەم استانا, تاعىسىن تاعىلار. سونداي-اق, قازاقستان رەسپۋبليكاسى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولدى, سيريادا شيەلەنىسكەن ساياسي داعدارىستى رەتتەۋدە الەمدىك ىقپالدى ەلدەر اراسىنا دانەكەرلىك كورسەتە ءبىلدى, وركەنيەتتى ەلدەرمەن تەرەزەسى تەڭ تۇردە جۇرگىزىپ وتىرعان ساليقالى ساياساتىنىڭ ارقاسىندا قازاقستاننىڭ حالىقارالىق ارەناداعى بەدەلى كۇرت كوتەرىلە ءتۇستى. قازاقستاننىڭ ءۇشىنشى جاڭعىرۋى جولداۋى عىلىمي جانە يننوۆاتسيالىق تەحنولوگيانىڭ زاماناۋي جەتىستىكتەرىنە سۇيەنە وتىرىپ, الەمدىك ءتورتىنشى ونەركاسىپ رەۆوليۋتسياسىن ۇتىمدى قابىلداۋ, جاھاندىق ۇلى وزگەرىستەر مەن باسەكەگە قابىلەتتىلىكتى ارتتىرۋ, جاڭا جاعدايعا ۋاقىت ۇتتىرماي تەز بەيىمدەلۋ, وسى ارقىلى ەكونوميكالىق ءوسىمدى قامتاماسىز ەتىپ, ماكروەكونوميكالىق تۇراقتىلىقتى ساقتاۋ, ادامي كاپيتالدىڭ قادىر-قاسيەتىن كوتەرىپ, حالىقتىڭ الەۋمەتتىك تىرشىلىگىن جاقسارتۋ, جاڭا ەۋرازيالىق لوگيستيكالىق ينفراقۇرىلىمدى دامىتۋ, بيزنەس-ورتانىڭ مۇمكىنشىلىگىن تولىق پايدالانۋدى ارتتىرۋ, ەل ءوركەنىنە تۇساۋ بولعان سىبايلاس جەمقورلىققا قارسى كۇرەستى كۇشەيتۋ سياقتى سان-سالالى اسا ماڭىزدى ماقساتتاردى قامتىعان ستراتەگيالىق كەشەندى باعدارلاما دەپ باعالاۋعا ابدەن لايىق. وسىناۋ ءۇشىنشى جاڭعىرۋ تابىستى ورىندالسا, قازاقستاننىڭ الەمنىڭ وزىق 30 ەلىنىڭ قاتارىنان ورىن الۋ ماقساتىنا مەجەلى ۋاقىتىنان بۇرىن قول جەتكىزەتىنىنە دە ەش ءشۇبا كەلتىرمەۋگە بولادى. قىسقاسى, قازاقستاننىڭ ءۇشىنشى جاڭعىرۋى – جاڭا زامان جاڭعىرىعى, جاھاندىق باسەكە ءداۋىرىنىڭ ۇلى ءدۇبىرى!
سۇلتان تاۋكەي ۇلى, موڭعوليانىڭ ەڭبەك سىڭىرگەن مادەنيەت قايراتكەرى, جازۋشى, عىلىم دوكتورى, پروفەسسور
