جوعالعان ادامداردى ىزدەۋ قىزمەتىن قۇقىقتىق رەتتەۋ ماسەلەسى تالقىلاندى

پارلامەنت سەناتىندا كونستيتۋتسيالىق زاڭناما سوت جۇيەسى جانە قۇقىق قورعاۋ ورگاندارى كوميتەتىنىڭ ۇيىمداستىرۋىمەن «جوعالعان ازاماتتاردى ىزدەۋ بويىنشا قۇقىق قورعاۋ ورگاندارىنىڭ قىزمەتىن ءنورماتيۆتى-قۇقىقتىق رەتتەۋدىڭ جاي-كۇيى مەن پروبلەمالارى» تاقىرىبىنداعى دوڭگەلەك ۇستەل ءوتتى. پارلامەنت سەناتى توراعاسىنىڭ ورىنباسارى بەكتاس بەكنازاروۆ جوعالعان ازاماتتاردى ىزدەۋ ادام مەن ازاماتتىڭ قۇقىقتارىن جانە بوستان­دىق­تارىن قورعاۋ كونستيتۋتسيالىق-قۇقىقتىق قانا ەمەس, سونىمەن قاتار, قازاقستان­نىڭ حالىق­ارا­­ل­ىق مىندەتى بولىپ تابىلاتىنىنا نازار اۋدارتتى. باس پروكۋراتۋرانىڭ مالىمەتتەرى بويىنشا, سوڭعى ءۇش جىلدا ىشكى ىستەر ورگاندارى 13749 حابارسىز كەتكەن ادامعا ىزدەۋ سالىپتى. قابىلدانعان شارالاردىڭ ناتيجەسىندە, ىزدەۋ­دەگى 8515 ادامنىڭ قايدا تۇراتىنى انىق­تالعان. 2016 جىلدىڭ سوڭىنداعى دەرەك بو­يىنشا تابىلماعاندار سانى 1554 ادام ەكەن. سەنات ۆيتسە-سپيكەرى ءىز-ءتۇزسىز جوعالعانداردى ىزدەۋدە يننوۆاتسيالىق تەحنولوگيالاردى پايدالانۋ ولاردى تابۋدىڭ تيىمدىلىگىن ارتتىراتىنىن جانە ىزدەۋ پروتسەسىنە جۇرتشىلىقتىڭ قاتىسۋىنا مۇمكىندىك بەرەتىنىن اتاپ ءوتتى. ب.بەكنازاروۆ, سونداي-اق, جوعالعاندار مەن ولاردىڭ تۋىس­تارىنىڭ قۇقىقتارى مەن مۇددەلەرىن قورعاۋ ماسەلەسى نازاردان تىس قالماۋعا ءتيىس ەكەنىن كولدەنەڭ تارتتى. ونىڭ پىكىرىنشە, حابار-وشارسىز كەتكەن ادامنىڭ بارلىق حابارى انىقتالعانعا دەيىن بۇل iستەگى ونىڭ قامقورىنداعى جانداردى جاپا شەگۋشى رەتىندە تانۋ جونىندەگى ماسەلەنى قاراستىرۋ جانە ۋاكىلەتتى ورگاننىڭ شەشىمىمەن زياندى وتەۋ قورىنان تولەمدەر جۇزەگە اسىرىلۋى ءتيىس. ال ءماجىلىستىڭ قاراۋىندا جاتقان «جابىرلەنۋشىلەرگە زياندى وتەۋ قورى تۋرالى» زاڭدا ول قوردى قۇرۋ قاراستىرىلىپتى. دوڭگەلەك ۇستەلگە قاتىسۋشىلار وسى ءىستى العا جىلجىتۋعا قاجەتتى قۇقىقتىق, جەدەل-ىزدەستىرۋ جانە سوت جۇيەسىن جەتىلدىرۋگە باعىتتالعان ءوز پىكىرلەرىن ءبىلدىردى, دەپ حابارلادى سەناتتىڭ ءباسپاسوز قىزمەتى.